နေပြည်တော်၊ ဇန်နဝါရီ ၉

မြန်မာနှင့် အိန္ဒိယနယ်စပ်၌ နယ်စပ်ခြံစည်းရိုးကာရံရာတွင် နယ်စပ်ဒေသနေ ပြည်သူများအား ကန့်သတ်မှု မဖြစ်ပေါ်စေရန် ဆောင်ရွက်သွားမည်ဟု မြန်မာနိုင်ငံခြားရေးဝန်ကြီးဌာနက ယနေ့သတင်းထုတ်ပြန်ခဲ့သည်။

မွန်ပြည်နယ်ဝန်ကြီးချုပ်နှင့် တနင်္သာရီတိုင်းဒေသကြီး လွှတ်တော်ဥက္ကဋ္ဌနှင့် ဒုဥက္ကဋ္ဌတို့အပေါ် တိုင်ကြားချက်များနှင့် ပတ်သက်ပြီး စုံစမ်းစစ်ဆေးပြီးဖြစ်သဖြင့် ဆုံးဖြတ်ချက်များကို အမျိုးသား ဒီမိုကရေစီအဖွဲ့ချုပ်(NLD)က ယခုရက်သတ္တပတ်အတွင်း ထုတ်ပြန်ပေးမည်ဖြစ်သည်။

ကုလသမဂ္ဂ၏ မြန်မာနိုင်ငံဆိုင်ရာ အထူးအစီရင်ခံစာရေးသားသူ မစ္စယန်ဟီလီသည် ၎င်း၏ ၁၂ ရက်ကြာ ခရီးစဉ်အဖြစ် မြန်မာနိုင်ငံသို့ ယနေ့ ရောက်ရှိမည်ဖြစ်သည်။

ယခုလ ၁၆ ရက်နေ့မှ စတင်ကာ မော်တော်ယာဉ်လိုင်းပေါင်းစုံ ထိန်းသိမ်းရေးကော်မတီ (မထသ) ၏ တာဝန်အရပ်ရပ်ကို ရန်ကုန်တိုင်းဒေသကြီး သယ်ယူပို့ဆောင်ရေးအာဏာပိုင်အဖွဲ့က ဆက်လက်တာဝန်ယူသွားမည်ဖြစ်ကာ အဆိုပါနေ့တွင် အများပိုင်ယာဉ်လိုင်း ၅၈ လိုင်းကို စတင်ပြေးဆွဲတော့မည်ဖြစ်သည်။

တိုင်းဒေသကြီးနှင့် ပြည်နယ်အသီးသီးရှိ မြို့နယ်များတွင် သံဃာ့နာယကအဖွဲ့ ဆိုင်းဘုတ်များနှင့် စင်ပြိုင်ကာ စိုက်ထူထားသည့် မဘသအဖွဲ့၏ ဆိုင်းဘုတ်များကို သက်ဆိုင်ရာအာဏာပိုင်အဖွဲ့နှင့် သံဃာ့နာယကအဖွဲ့တို့က ပူးပေါင်းကာ ဖယ်ရှားပေးရန် ၂၀၁၆ ခုနှစ်၊ ဒီဇင်ဘာ ၇ ရက်နေ့တွင် မဟနက ညွှန်ကြားစာ ထုတ်ပြန်ခဲ့ခြင်းဖြစ်သည်။

ရခိုင်ပြည်နယ်တွင် ကျေးရွာသားများအား ရဲတပ်ဖွဲ့ဝင်များက ရိုက်နှက်ကန်ကျောက်နေသည်ကို ရိုက်ကူးထားသည့် ဗီဒီယို ပေါ်ထွက်လာပြီးနောက် အဆိုပါဖြစ်စဉ်တွင် ပါဝင်သည့် ရဲတပ်ဖွဲ့ဝင် ခုနစ်ဦးကို ရဲစည်းကမ်းထိန်းသိမ်းရေးဥပဒေအရ ထိရောက်စွာ အရေးယူဆောင်ရွက်လျှက်ရှိသည်ဟု ပြန်ထဲရေးဝန်ကြီးဌာနက ဇန်နဝါရီ ၅ ရက်နေ့တွင် သတင်းထုတ်ပြန်ခဲ့သည်။