နေပြည်တော်၊ စက်တင်ဘာ ၅
တပ်မတော်(လေ)မှ လေ့ကျင့်ပျံသန်းရေး G-4 ဂျက်တိုက်လေယာဉ်တစ်စီးသည် လေယာဉ်မှူးနှင့်အတူ ယနေ့နံနက်ပိုင်း ပျောက်ဆုံးလျက်ရှိသည်ဟု တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်သည်။
အဆိုပါ G-4 ဂျက်လေယာဉ် သုံးစီးသည် ပုသိမ်လေဆိပ်မှ ယနေ့နံနက်ပိုင်းတွင် စတင်ပျံသန်း လေ့ကျင့်ခဲ့ကြသည့်အနက် လေယာဉ်မှူး ဗိုလ်မှူးကောင်းထိုက် မောင်းနှင်သည့် လေယာဉ်သည် ပုသိမ်-ဟင်္သာတ-ဂွ-ပုသိမ်လမ်းကြောင်းအတိုင်း ပျံသန်းလေ့ကျင့်စဉ် နံနက် ၉ နာရီ ၁၈ မိနစ်တွင် ပျောက်ဆုံးသွားခြင်းဖြစ်သည်ဟု ဖော်ပြထားသည်။
လေယာဉ်နှင့် ပုသိမ်လေဆိပ် နောက်ဆုံးအဆက်အသွယ်ရရှိသည့်အနေရာမှာ ပုသိမ်မြို့၏ အနောက်မြောက်ဘက် ၃၅၀ ဒီဂရီ၊ အကွာအဝေးအားဖြင့် ၃၆ မိုင်ခန့်အကွာ၌ ဖြစ်သည်ဟုလည်း ဖော်ပြထားသည်။
“အဆိုပါပျောက်ဆုံးလျက်ရှိသည့် G-4 ဂျက်လေယာဉ်အား မြေပြင်တပ်များနှင့် တပ်မတော်(လေ)မှ လေယာဉ်၊ ရဟတ်ယာဉ်များဖြင့် ရှာဖွေရေးလုပ်ငန်းများဆောင်ရွက်လျက်ရှိကြောင်း သတင်းရရှိသည်” ဟု ထုတ်ပြန်ချက်တွင် ဖော်ပြထားသည်။
Soko G-4 Super Galeb ဟုလည်း ခေါ်ဝေါ်သည့် အင်ဂျင်တစ်လုံးတပ်အဆိုပါ လေ့ကျင့်ပျံသန်းရေးနှင့် မြေပြင်တိုက်ခိုက်ရေး လေယာဉ်များကို ယူဂိုစလားဗီးယားနိုင်ငံက ထုတ်လုပ်ထားခြင်းဖြစ်သည်။
၁၉၉၁ ခုနှစ်တွင် လက်နက်တပ်ဆင်ထားသည့် Soko G-4 Super Galeb လေယာဉ်အစီး ၂၀ ကို မြန်မာ့တပ်မတော်က ယူဂိုစလားဗီးယားနိုင်ငံမှ ဝယ်ယူခဲ့သည်ဟု သတင်းများ ထွက်ပေါ်ခဲ့သည်။ သို့သော် တပ်မတော်(လေ) တွင် G-4 ဂျက်တိုက်လေယာဉ်လေးစင်းရှိသည်ဟု GlobalSecurity.org က ရေးသားထားသည်။
ပြီးခဲ့သည့်ဇွန်လအတွင်းကလည်း တပ်မတော်(လေ) မှ Y8 အမျိုးအစား သယ်ယူပို့ဆောင်ရေးလေယာဉ် ပျက်ကျမှုကြောင့် လူပေါင်း ၁၂၂ ဦးသေဆုံးခဲ့ရသည်။