တယ်လီနောက အများစု ပိုင်ဆိုင်ထားတဲ့ DTAC ဟာ ထိုင်းနိုင်ငံမှာ နေထိုင် အလုပ်လုပ်ကိုင်နေကြတဲ့ မြန်မာ ရွှေ့ပြောင်းလုပ်သားတွေကို ပစ်မှတ်ထားပြီး ဈေးကွက်ချဲ့ထွင်နေပါတယ်။
ပီတာ ဂျင်ဆင် ရေးသားသည်။
ထိုင်းနိုင်ငံမှာ အိမ်အကူအဖြစ် အလုပ်လုပ်ကိုင် နေထိုင်နေတဲ့ အသက် ၂၁ နှစ် Teng ဟာ တစ်လတစ်ခါလောက် ဖခင်နဲ့ ညီမတွေရှိတဲ့ ကရင်ပြည်နယ်ကို ဖုန်းခေါ်လေ့ရှိပါတယ်။ ဖုန်းခေါ်ရင် တစ်နာရီကို ဘတ် ၁၀၀ (၃,၀၀၀ ကျပ်) ကျသင့်ပြီး ဒါဟာ ထိုင်းနိုင်ငံက ဒုတိယအကြီးဆုံး မိုဘိုင်းအော်ပရေတာဖြစ်တဲ့ DTAC ရဲ့ မြန်မာဘာသာစကားအခြေခံ Happy Myanmar က ရောင်းအားမြှင့်တင်ရေး အစီအစဉ်နဲ့ ဖြစ်ပါတယ်။ ထိုင်းနိုင်ငံ အခြေခံ အလုပ်တွေကို အများဆုံးလုပ်ကိုင်နေကြတဲ့ မြန်မာနိုင်ငံသားတွေဟာ အခုအချိန်မှာတော့ ထိုင်းဆက်သွယ်ရေးလုပ်ငန်းတွေရဲ့ အဓိကဖောက်သည်တွေ ဖြစ်လာပါတယ်။
“မြန်မာလူမျိုးတွေဆီကနေ ကျွန်တော်တို့ ဝင်ငွေတော်တော်များများကို ရရှိပါတယ်”လို့ Total Access Communications (DTAC) ရဲ့ ဒုတိယဥက္ကဋ္ဌ Supavas Prohritak က ဆိုပါတယ်။
DTAC ဟာ ၂၀၁၂ ခုနှစ်ကစလို့ Happy Myanmar ဆိုတဲ့ ဈေးကွက်မြှင့်တင်မှု အစီအစဉ်နဲ့အတူ မြန်မာနိုင်ငံသားတွေရဲ့ ဈေးကွက်ကို စတင်ထိုးဖောက်ခဲ့ပါတယ်။ ထိုင်းနိုင်ငံအတွင်းမှာနေထိုင်၊ အလုပ်လုပ်ကိုင်နေတဲ့ မြန်မာနိုင်ငံသား သန်းပေါင်းများစွာကြောင့် တိုးတက်လာဖို့ အလားအလာရှိတဲ့ ဈေးကွက်ကို ပထမဆုံး ဂရုပြုမိတဲ့ ထိုင်းဆက်သွယ်ရေးလုပ်ငန်း ဖြစ်လာပါတယ်။
“လူဦးရေ တိုးတက်များပြားလာတာကို သတိထားလာမိပြီးခဲ့တဲ့အတွက် ဒီအစိတ်အပိုင်းကို ကျွန်တော်တို့ အော်ပရေတာက ပထမဆုံး လက်ဦးမှုရယူနိုင်ခဲ့တယ်”လို့ Supavas က Frontier ကို ပြောပါတယ်။ လက်ရှိအချိန်အထိ ထိုင်းနိုင်ငံမှာ နေထိုင်ကြတဲ့ မြန်မာလူမျိုးအရေအတွက်ဟာ သုံးသန်းကနေ ငါးသန်းအထိရှိပါတယ်။ ဒါဟာ တရားဝင်ကော တရားမဝင်မှတ်တမ်းအရပါ ဖြစ်ပါတယ်။ DTAC ရဲ့ ခန့်မှန်းချက်အရတော့ ငါးသန်းလောက်ရှိမယ်လို့ဆိုပြီး ဒါဟာသူတို့ ဆင်းကတ်တွေကို သုံးဆွဲသူဦးရေကို အခြေခံ တွက်ချက်ထားတာ ဖြစ်ပါတယ်။ DTAC ရဲ့ အသုံးပြုသူဦးရေ ၂၅ ဒသမ ၅ သန်းရှိပြီး ဒီအထဲမှာ မြန်မာနိုင်ငံသား ဘယ်လောက်ပါဝင်တယ်ဆိုတဲ့ အရေအတွက်အတိအကျကိုတော့ သူတို့က ထုတ်ဖော် ပြောဆိုခြင်း မရှိပါဘူး။ ထိုင်းနိုင်ငံမှာ ဆင်းမ်ကဒ်အသုံးပြုသူ ၈၂ သန်းရှိပြီး ထိုင်းနိုင်ငံလူဦးရေ ၆၅ သန်းထက် ကျော်လွန်ပါတယ်။ ထိုင်းနိုင်ငံရဲ့ နံပါတ်တစ် တယ်လီဖုန်း အော်ပရေတာက Advanced Info Service (AIS) ဖြစ်ပြီး DTAC နဲ့ TRUE တို့က ဒုတိယနဲ့ တတိယနေရာတို့မှာ ရှိနေပါတယ်။
ထိုင်းနိုင်ငံရဲ့ တတိယအကြီးဆုံး တယ်လီဖုန်း အော်ပရေတာဖြစ်တဲ့ TRUE ကလည်း DTAC လို မြန်မာဘာသာအခြေခံ အစီအစဉ်တွေ ပေးနေပေမယ့် DTAC ရဲ့ Happy Myanmar ဟာ အခုဆိုရင် ပြည်ပရောက် မြန်မာအသိုင်းအဝိုင်းရဲ့ ဈေးကွက်ကို အခိုင်အမာ ရရှိထားပြီဖြစ်ပါတယ်။ စစ်တမ်းတွေအရတော့ DTAC ဟာ ဈေးကွက်ရဲ့ ၇၀ ရာခိုင်နှုန်းကို ပိုင်ဆိုင်ထားပြီးဖြစ်တယ်လို့ သိရပါတယ်။
“DTAC က အခြားဟာတွေထက် ပိုဈေးပေါပြီး ပရိုမိုးရှင်းအများကြီးရှိတာကြောင့် ကျွန်မသူငယ်ချင်းတွေက DTAC ကိုပဲရွေးဖို့ ပြောခဲ့ကြတယ်”လို့ လွန်ခဲ့တဲ့ သုံးနှစ်ကတည်းက သူမရဲ့ ပထမဆုံး DTAC ဆင်းမ်ကဒ်ကို ဝယ်ယူခဲ့တဲ့ Teng ကဆိုပါတယ်။
တစ်ကယ်တော့ DTAC ဟာ သူ့ရဲ့ ဈေးကွက်ဝေစုကိုရဖို့ အတော်လေးရုန်းကန်ခဲ့ရတယ်လို့ သိရပါတယ်။ ၂၀၁၂ ခုနှစ်က Happy Myanmar ကို စတင်ခဲ့တဲ့အချိန်မှာ သူတို့ဟာ ပြည်တွင်း ဖုန်းခေါ်ဆိုခနှုန်းထားကို လျှော့ချပေးခဲ့ပါတယ်။ ဥပမာအနေနဲ့ဆိုရင်တော့ Super Mouth ဆိုတဲ့ အစီအစဉ်မှာ ဖုန်းအသုံးပြုသူတွေဟာ တစ်ရက်လုံး ဖုန်းခေါ်ဆိုခအတွက် ၁၂ ဘတ်ပဲ ကျသင့်တာဖြစ်ပါတယ်။ စမတ်ဖုန်းတွေ ခေတ်စားလာတဲ့နောက်ပိုင်းမှာတော့ DTAC ဟာ Happy Myanmar အစီအစဉ်ထဲမှာ Facebook နဲ့ LINE သုံးစွဲနိုင်တဲ့ ဝန်ဆောင်မှုတွေ ထပ်တိုးပေးခဲ့ပါတယ်။ ထိုင်းဘာသာစကားလေ့လာမှုနဲ့ နောက်ဆုံးပေါ် ထီရလဒ်တွေလည်း ထည့်သွင်းပေးခဲ့ပါတယ်။ နောက်ပိုင်းမှာတော့ သူတို့ဟာ နိုင်ငံတကာနဲ့ တိုက်ရိုက် ဖုန်းခေါ်ဆိုနိုင်တဲ့ ဝန်ဆောင်မှုကို စတင်ခဲ့ပြီး မိုဘိုင်းငွေလွှဲမှု ဝန်ဆောင်မှုကိုလည်း စတင်နိုင်ခဲ့တယ်လို့ သိရပါတယ်။
“ကျွန်တော်တို့ရဲ့ အဓိက ဝင်ငွေက ဖုန်းခေါ်ဆိုတာတွေကနေ ရတယ်ဆိုပေမယ့် နိုင်ငံတကာ ဖုန်းခေါ်ဆိုမှုကလည်း အဓိကကျခဲ့ပါတယ်”လို့ Supavas က ရှင်းပြပါတယ်။ DTAC ဟာ Teng လို မိခင်နိုင်ငံဖြစ်တဲ့ မြန်မာနိုင်ငံကို တစ်လတစ်ခါလောက် ဖုန်းပြန်ခေါ်သူတွေအပေါ်ကိုလည်း အားကိုးနေရပါတယ်။ Happy Myanmar အစီအစဉ်နဲ့ နိုင်ငံတကာကို တိုက်ရိုက်ဖုန်းခေါ်ဆိုယ်ဆိုရင် တစ်မိနစ်ကို သုံးဘတ်ကျသင့်ပြီး ဒါဟာ AIS ထက် တစ်ဘတ် သက်သာပါတယ်။ ဒါပေမယ့် ထိုင်းပြည်တွင်းဖုန်းခေါ်ဆိုမှုထက်တော့ ခြောက်ဆလောက် ဈေးပိုများပါတယ်။ ဒါကြောင့် DTAC ရဲ့ မြန်မာဖောက်သည်တွေက ဘယ်လောက်အရေးပါလဲဆိုတာ မြင်သာပါတယ်။
“DTAC ကွန်ယက်အတွင်းမှာ နိုင်ငံတကာဖုန်းခေါ်ဆိုမှုတွေက ပုံမှန်ထက် တိုးမြင့်လာတဲ့အတွက် မြန်မာဈေးကွက်က ပိုပြီးအကျိုးအမြတ်ရှိပါတယ်”လို့ Supavas ကဆိုပါတယ်။ “ဒီလိုဆိုတော့ ကျွန်တော်တို့အနေနဲ့ တစ်ခြားကုမ္ပဏီကို ပေးရတဲ့ အခကြေးငွေ သက်သာသွားပါတယ်၊ အကယ်လို့ DTAC ကနေ AIS ကိုခေါ်ရင် ကျွန်တော်တို့က AIS ကို ပိုက်ဆံပေးရပါတယ်”လို့ သူက ရှင်းပြပါတယ်။
Happy Myanmar ဝန်ဆောင်မှုကို သရုပ်ပြနေသော ဘန်ကောက်တွင် နေထိုင်သူတစ်ဦး။ ဓာတ်ပုံ- ပီတာ ဂျင်ဆင်
ထိုင်းနိုင်ငံကနေ မြန်မာနိုင်ငံကို ခေါ်ဆိုတဲ့ နိုင်ငံတကာ ဖုန်းခေါ်ဆိုမှုအများအပြားက DTAC ရဲ့ ကွန်ယက်အတွင်းမှာပဲ ဖြစ်ပါတယ်။ ဒါဟာ DTAC အနေနဲ့ မြန်မာနိုင်ငံနယ်စပ်မြို့တွေဖြစ်တဲ့ ကရင်ပြည်နယ်နဲ့ ရှမ်းပြည်နယ်တို့မှာလည်း နာမည်ကြီးလို့ ဖြစ်ပါတယ်။ “ကရင်ပြည်နယ်မှာ နေကြတဲ့သူတွေရဲ့ ဆွေမျိုးတော်တော်များများက ရန်ကုန်မှာမဟုတ်ဘဲ ထိုင်းမှာပဲ အများဆုံးရှိကြတော့ ကရင်ပြည်နယ်မှာဆို အားလုံးနီးပါး DTAC ပဲသုံးကြတယ်”လို့ Teng ကဆိုပါတယ်။
နော်ဝေအခြေစိုက် တယ်လီဖုန်း ဆက်သွယ်ရေးကုမ္ပဏီဖြစ်တဲ့ တယ်လီနောက အများဆုံး ပိုင်ဆိုင်ထားတဲ့ DTAC ဟာ သူတို့ရဲ့ ကြီးမားကျယ်ပြန့်လာနေတဲ့ ဒေသတွင်း ကွန်ယက်ကတစ်ဆင့် မြန်မာနိုင်ငံကွန်ယက်ကို အဆင့်မြင့်ဖို့ ကြိုးစားနေပါတယ်။ တယ်လီနောမြန်မာဟာဆိုရင် ၂၀၁၄ ခုနှစ်အတွင်းက မြန်မာနိုင်ငံအတွင်းမှာ မိုဘိုင်းအော်ပရေတာ လုပ်ငန်းလုပ်ဆောင်ခွင့်ရရှိခဲ့တဲ့ နိုင်ငံခြား ကုမ္ပဏီ နှစ်ခုထဲက တစ်ခုဖြစ်ပါတယ်။ ဒါ့အပြင် တယ်လီနောမြန်မာဟာ အသုံးပြုသူ ၁၅ ဒသမ ၅ သန်းနဲ့ မြန်မာနိုင်ငံရဲ့ ဒုတိယအကြီးဆုံး တယ်လီကွန်းအော်ပရေတာအဖြစ်လည်း ရပ်တည်နေပါတယ်။
“DTAC အတွက် ကောင်းသွားတာက တယ်လီနောမြန်မာ ရှိနေတာကြောင့်ပါ။ ထိုင်းနိုင်ငံကတစ်ခြား တယ်လီကွန်းတွေမှာ ကုမ္ပဏီခွဲတွေမရှိကြပါဘူး။ ဒါကြောင့် DTAC နဲ့ တယ်လီနောတို့ကြားက ပူးပေါင်းဆောင်ရွက်မှုတွေကို ကောင်းသထက်ကောင်းအောင် လုပ်သွားဖို့ပဲ လိုပါတော့တယ်။ ဒါဟာ ကျွန်တော်တို့အတွက် နောက်ထပ် ခြေလှမ်းတစ်ရပ်ပါပဲ”လို့ Supavas ကဆိုပါတယ်။ DTAC အနေနဲ့ Happy Myanmar အစီအစဉ်အတွင်းမှာ မြန်မာနိုင်ငံသားတွေပါဝင်ဖို့အတွက် တယ်လီနောမြန်မာရဲ့ ကွန်ယက်ကို အသုံးပြုလိုတယ်လို့ သိရပါတယ်။ ဒါ့အပြင်နိုင်ငံတကာ တိုက်ရိုက်ဖုန်းခေါ်ဆိုမှုတွေကို တယ်လီနောရဲ့ ကွန်ယက်အတွင်းမှာပဲ ထားမှာဖြစ်တဲ့အတွက် ဈေးနှုန်းတွေလည်း သက်သာလာနိုင်တဲ့အပြင် ကွန်ယက်ကိုလည်း မြှင့်တင်နိုင်မယ်လို့ ဆိုပါတယ်။ “ဒါဟာ ကျွန်တော်တို့ရဲ့ ရည်မှန်းချက်ပဲ”လို့ Supavas က ပြောပါတယ်။
DTAC ရဲ့ အဓိက ပြိုင်ဘက်က တစ်ခြားတယ်လီကွန်းတစ်ခုတော့ မဟုတ်ပါဘူး။ သူတို့ရဲ့ အဓိကပြိုင်ဘက်က ခေတ်ဟောင်းက အိုင်ဒီဒီဖုန်းခေါ်ဆိုမှုတွေက မလိုအပ်ပဲ ငွေကုန်ကြေးကျမှုတွေ ဖြစ်သွားစေတဲ့ နည်းပညာသစ်တွေဖြစ်ပါတယ်။ “အခုခေတ်မှာဆိုရင် ထိုင်းမှာရှိတဲ့ မြန်မာလုပ်သားတွေ၊ ကျောင်းသားတွေ၊ နိုင်ငံရေးသမားတွေက မြန်မာနိုင်ငံကို ဆက်သွယ်ဖို့ Facebook Messenger၊ Viber (သို့) LINE တို့ကို အသုံးပြုလာကြပါပြီ”လို့ ထိုင်းနိုင်ငံမှာ အချိန်ကြာမြင့်စွာနေထိုင်ခဲ့သူဖြစ်ပြီး မြန်မာနိုင်ငံ ဒီမိုကရေစီဖိုရမ်ရဲ့ ပြောရေးဆိုခွင့်ရှိသူ ဦးစိုးအောင်ကပြောပါတယ်။
“မြန်မာနိုင်ငံအတွင်းက အင်တာနက်ကွန်နက်ရှင်က အရင်ကလောက်မဆိုးတော့တဲ့အတွက် Facebook Messenger တွေ Viber လိုဟာတွေနဲ့ LINE လို ထိုင်းနိုင်ငံမှာ နာမည်ကြီးတဲ့ အပလီကေးရှင်းတွေကတစ်ဆင့် ဆက်သွယ်လာနိုင်ပြီ ဖြစ်ပါတယ်”လို့ သူကပြောပါတယ်။ “ဒါပြင် အဲဒါတွေက အခမဲ့ဖြစ်ပါတယ်။ DTAC၊ AIS (သို့) TRUE လို မိုဘိုင်းအော်ပရေတာတွေ ဆက်သုံးနေတဲ့ မြန်မာလူမျိုးဘယ်လောက်ရှိလဲကတော့ ကျွန်တော်လည်းမသိပါဘူး”လို့ သူကဆက်ပြောပါတယ်။ဒီကိစ္စနဲ့ ပတ်သက်ပြီး အတိအကျပြောရမယ်ဆိုရင်တော့ ထိုင်းမိုဘိုင်းဖုန်း အော်ပရေတာတွေက ထုတ်ပြန်တဲ့ စစ်တမ်းတွေအရ အသုံးပြုသူဦးရေက ဆယ်စုနှစ်အတွင်းမှာ ပထမဆုံး ကျဆင်းလာခဲ့တယ်လို့ သိရပါတယ်။ ၂၀၁၄ ခုနှစ်မှာ ၉၈ သန်းရှိနေရာကနေ ၂၀၁၅ ခုနှစ်မှာ ၈၂ သန်းကို ကျဆင်းသွားတာဖြစ်ပါတယ်။ တစ်ချိန်တည်းမှာပဲ အင်တာနက်အသုံးပြုမှုတွေဟာ ၂၀၁၄ ခုနှစ်မှာ ၂၉ သန်းသာရှိနေရာကနေ သန်း ၄၀ အထိ မြင့်တက်လာခဲ့တယ်လို့ သိရပါတယ်။ ဒီအပြောင်းအလဲတွေကြောင့် ဖုန်းအသုံးပြုပြီး ဖုန်းခေါ်ဆိုတဲ့သူတွေအပေါ် အားထားနေရတဲ့ မိုဘိုင်းဖုန်း အော်ပရေတာတွေအပေါ်မှာ များစွာသက်ရောက်စေပါတယ်။
“ကျွန်တော်တို့ ဘာလုပ်လုပ် ကွန်ပြူတာပေါ်မှာ ချက်ချင်း ကူးလိုက်လို့ရပါတယ်။ ဒါကြောင့် ကူးယူလို့မရတဲ့အရာတစ်ခုကို ကျွန်တော်တို့ ရှာဖွေရလိမ့်မယ်”လို့ Supavas ကပြောပါတယ်။
“အကုန်လုံးက ပြည်တွင်းခေါ်ဆိုတဲ့ ဝန်ဆောင်မှုကို ပေးနိုင်ပါတယ်။ ဒါကြောင့် ခြားနားတဲ့ ဝန်ဆောင်မှုက နိုင်ငံတကာ ဖုန်းခေါ်ဆိုမှုထဲမှာပဲ ရှိပါလိမ့်မယ်။ အဲဒါက ကျွန်တော်တို့အတွက် အဓိက အချက်ပဲ”လို့ Supavas ကဆိုပါတယ်။ မြို့ကြီးပြကြီးတွေမှာရှိတဲ့ ဆွေမျိုးတွေကို ဖုန်းခေါ်ဖို့ အခမဲ့ ဖုန်းအပလီကေးရှင်းတွေသုံးလာကြတဲ့ မြန်မာနိုင်ငံသား ဈေးကွက်မှာတော့ ရွှေ့ပြောင်းလုပ်သားအများစု လာရောက်အလုပ်လုပ်ကိုင်ကြတဲ့ နယ်စွန်နယ်ဖျားဒေသအတွက် နိုင်ငံတကာဖုန်းခေါ်ဆိုမှုနည်းပညာကို ဆက်လက်အသုံးပြုသွားရမှာ အသေအချာပဲ ဖြစ်ပါတယ်။
