ရန်ကုန်၊ မတ် ၁၄
လုံခြုံရေး ဆောင်ရွက်နေသည့် တပ်မတော်သားများအား ရှမ်းပြည်နယ်တစ်နေရာတွင် တွေ့ရစဉ်။ ဓာတ်ပုံ- အေအက်ဖ်ပီ
အရွယ်မရောက်သေးသူ ကလေးသူငယ်များအား တပ်မတော်တွင်းသို့ စစ်သည်များအဖြစ် စုဆောင်းခဲ့မှုဖြင့် အရာရှိနှင့် စစ်သည် ၃၈၂ ဦးအား စစ်စည်းကမ်းနှင့်အညီ အရေးယူခဲ့ကြောင်း တပ်မတော်က သတင်းထုတ်ပြန်ခဲ့သည်။
အရွယ်မရောက်သေးသူ ကလေးသူငယ်များအား လုံးဝစုဆောင်းခြင်း မပြုရန်နှင့် အကြောင်းအမျိုးမျိုးဖြင့် မှားယွင်း စုဆောင်းခဲ့သူများရှိပါကလည်း အမြန်ဆုံးထွက်ခွင့်ပြုရန် စိစစ်ဆောင်ရွက်လျက်ရှိကြောင်းနှင့် ၂၀၁၆ ခုနှစ်၊ ဖေဖော်ဝါရီလကုန်အထိ တာဝန်ရှိသူ အရာရှိ ၇၃ ဦးနှင့် စစ်သည် ၃၀၉ ဦးကို စစ်စည်းကမ်းနှင့်အညီ အရေးယူခဲ့သည်ဟု မတ် ၁၃ ရက်နေ့က တပ်မတော်ပိုင် မြဝတီသတင်းစာတွင် ဖော်ပြထားသည်။
တပ်မတော်အတွင်းရှိ အရွယ်မရောက်သေးသူ ကလေးသူငယ်များကို စိစစ်ဖော်ထုတ်ကာ မိဘများထံ လွှဲပြောင်းပေးအပ်လျက်ရှိရာ ထပ်မံစိစစ် တွေ့ရှိရသည့် ကလေးစစ်သား ၄၆ ဦးအား မိဘများထံ မတ် ၁၂ ရက်နေ့က လွှဲပြောင်းပေးခဲ့သည်။
၂၀၁၂ ခုနှစ်၊ ဇွန်လတွင် မြန်မာနိုင်ငံအစိုးရက ကုလသမဂ္ဂနှင့်အတူ ပူးတွဲလုပ်ငန်းဆောင်ရွက်မှု စီမံချက် (Joint Action Plan) ကို သဘောတူလက်မှတ်ရေးထိုးပြီးသည့်အချိန်မှ ယနေ့အထိ ကလေးသူငယ် စုစုပေါင်း ၇၄၅ ဦးကို တပ်မတော်က နှုတ်ထွက်ခွင့်ပြုခဲ့ပြီးဖြစ်သည်ဟု ကုလသမဂ္ဂကလေးများ ရံပုံငွေအဖွဲ့(ယူနီဆက်)က မတ် ၁၂ ရက်နေ့က သတင်းထုတ်ပြန်ခဲ့သည်။
မြန်မာနိုင်ငံရှိ ကြီးမားသော ကလေးသူငယ်အခွင့်အရေး ချိုးဖောက်မှုများ စောင့်ကြည့်လေ့လာရေးနှင့် အစီရင်ခံတင်ပြရေး အထူး တာဝန်အဖွဲ့ (CTFMR) ပူးတွဲဥက္ကဋ္ဌများဖြစ်သည့် မစ္စရီနားတားလော့ ဒန်စဲလီယန်နှင့် ယူနီဆက်မှ မြန်မာနိုင်ငံဌာနေ ကိုယ်စားလှယ် ဘာထရန်ဘိန်ဗဲလ်တို့က ယခုကဲ့သို့ နှုတ်ထွက်ခွင့်ပြုခြင်းအပေါ် ကြိုဆိုကြောင်းနှင့် မြန်မာနိုင်ငံတွင် ဖြစ်ပေါ်လျက်ရှိသည့် ပဋ္ဋိပက္ခများတွင် ကလေးသူငယ်များကို ထည့်သွင်း ပါဝင်နေမှုအား အပြီးသတ်စေရန် အပြုသဘောဆောင်သည့် နောက်ထပ် ဖွံ့ဖြိုးမှုအဆင့် တစ်ခုဖြစ်ကြောင်း ပြောကြားလိုက်သည်ဟုလည်း ဖော်ပြထားသည်။
ပူးတွဲလုပ်ငန်းစီမံချက်ကို သဘောတူ လက်မှတ်ရေးထိုးခဲ့သည့် အချိန်မှစ၍ ခေါ်ယူစုဆောင်းမှုများကို ဗဟိုက ချုပ်ကိုင် ဆောင်ရွက်ခြင်းနှင့် လက်နက်ကိုင်ပဋိပက္ခအတွင်း ကလေးသူငယ်များ ပါဝင်နေမှုအတွက် ကလေးသူငယ်အခွင့်အရေးများဆိုင်ရာ ညီလာခံသဘောတူစာချုပ်ကို အတည်ပြုပြီးဆက်လက် ရေးထိုးရသည့် နောက်ဆက်တွဲ အခြေပြစာချုပ်အား ၂၀၁၅ ခုနှစ်တွင် လက်မှတ်ရေးထိုးခြင်းအစရှိသည့် အရေးကြီးသည့် လုပ်ဆောင်မှုများကို မြန်မာနိုင်ငံအနေဖြင့် လုပ်ကိုင်ခဲ့ပြီး ဖြစ်သည်။
၂၀၁၂ ခုနှစ်၊ ဇွန်လက ပူးတွဲလုပ်ငန်းစီမံချက် လက်မှတ်ရေးထိုးချိန်တွင် နှုတ်ထွက်ခွင့်ပြုခဲ့သော လူငယ်များ အားလုံးမှာ အသက် ၁၈ နှစ် အောက်ဖြစ်ကြသည်ဟု ယူနီဆက်က ပြောကြားသည်။
မြန်မာကလေးသူငယ်များအားလုံး အကြုံးဝင်သည့် ကာကွယ်ပေးမည့် ပတ်ဝန်းကျင်တခု ဖြစ်လာစေရေး၊ အသက် ၁၈ နှစ်အောက် ကလေးငယ်များအား တပ်သားအဖြစ် ခေါ်ယူစုဆောင်းခြင်းနှင့် အသုံးချခြင်းတို့မှ ကာကွယ် ရပ်တန့်စေရေးနှင့် လုပ်ငန်းစီမံချက်များ လက်မှတ်ရေးထိုးရန် ကုလသမဂ္ဂအထွေထွေ အတွင်းရေးမှူးချုပ်၏ လက်နက်ကိုင်ပဋိပက္ခအတွင်း ကလေးသူငယ်များ ခေါ်ယူစုဆောင်းခြင်းနှင့် အသုံးပြုခြင်းစာရင်းတွင် ပါဝင်ခဲ့သည့် တိုင်းရင်းသားလက်နက်ကိုင်အဖွဲ့ ခုနစ်ဖွဲ့ကို CTFMR အနေဖြင့် အပြန်အလှန်ဆွေးနွေးပြောဆိုခြင်းများ စတင်ပြုလုပ်နေပြီဖြစ်သည်ဟု ယူနီဆက်၏ ထုတ်ပြန်ချက်တွင် ဖော်ပြထားသည်။
ကလေးသူငယ်များအား တပ်သားအဖြစ် ခေါ်ယူစုဆောင်းအသုံးပြုမှုကို အကြိမ်ကြိမ် ကျူးလွန်ခဲ့သည့် အဖွဲ့အစည်းများစာရင်း၌ တပ်မတော်အပြင် ဒီကေဘီအေ Democratic Karen Benevolent Army (DKBA)၊ ကချင်လွတ်မြောက်ရေး တပ်ဖွဲ့ Kachin Independence Army (KIA)၊ ကရင်အမျိုးသား လွတ်မြောက်ရေး တပ်ဖွဲ့ Karen National Liberation Army (KNLA)၊ ကရင်အမျိုးသား လွတ်မြောက်ရေး တပ်ဖွဲ့ ငြိမ်းချမ်းရေးကောင်စီ Karen National Liberation Army Peace Council၊ ကရင်နီတပ်ဖွဲ့ Karenni Army (KA)၊ ရှမ်းပြည်နယ်တပ်ဖွဲ့တောင်ပိုင်း Shan State Army South (SSA-S) နှင့်”ဝ” ပြည်သွေးစည်း ညီညွတ်ရေး တပ်ဖွဲ့ United Wa State Army (UWSA) တို့လည်း ပါဝင်ကြသည်။
သတင်း- ဆန်းဦး
