ရန်ကုန်၊ မေ ၂
ကျေးလက်နေဒေသများတွင် လျှပ်စစ်စွမ်းအင်ဖြန့်ဝေရန်နှင့် နိုင်ငံအတွင်း ဆက်သွယ်ရေးမျှော်စင်များအတွက် လိုအပ်သည့် လျှပ်စစ်ဓာတ်အားပေးစက်ရုံများနှင့် လျှပ်စစ်မီးပေးစက်များတည်ဆောက်ရန်အတွက် နော်ဝေအစိုးရပိုင် Norfund နှင့် ပူးပေါင်းဆောင်ရွက်သွားမည်ဟု Yoma Strategic က ကြေညာလိုက်သည်။
ဖက်စပ်ကုမ္ပဏီဖြစ်လာမည့် Yoma Micro Power (S) Pte.Ltd. တွင် Yoma Strategic နှင့် Norfund တို့က အစုရှယ်ရာ ၄၇ ဒသမ ၅ ရာခိုင်နှုန်းစီပိုင်ဆိုင်မည်ဖြစ်ကာ ကျန်ရှိသည့် ရှယ်ယာ ငါးရာခိုင်နှုန်းကို စီမံကိန်းအား ဦးဆောင်မည့် Mr. Alakesh Chetia က ပိုင်ဆိုင်မည်ဟု ရိုးမ၏ ယနေ့ သတင်းထုတ်ပြန်ချက်တွင် ဖော်ပြထားသည်။
စီမံကိန်းစတင်ရန် ရင်းနှီးမြှုပ်နှံမည့် အမေရိကန်ဒေါ်လာနှစ်သန်းအနက် တစ်သန်းကို Yoma Strategic က ထည့်ဝင်မည်ဖြစ်သည်။ အဆိုပါ ရင်းနှီးမြှုပ်နှံမှုကို ကုမ္ပဏီစတင်ရန်နှင့် မြန်မာနိုင်ငံ စစ်ကိုင်းဒေသအတွင်းတွင် ကနဦး လေ့လာစမ်းသပ်မှုများ ပြုလုပ်ရန်အတွက် အသုံးပြုသွားမည်ဟု ထုတ်ပြန်ချက်တွင် ဖော်ပြထားသည်။
ယခုစီမံကိန်းသည် ကျေးလက်ဒေသများ၏ လျှပ်စစ်စွမ်းအင်ပြဿနာကို ဖြေရှင်းပေးနိုင်သည့်အတွက် ၎င်းတို့အနေဖြင့် အလွန် စိတ်လှုပ်ရှားမိသလို ယုံကြည်အားကိုးရသည့် သဘာဝလျှပ်စစ်စွမ်းအင်များ ပေးအပ်လိုသည့် ၎င်းတို့၏ဆန္ဒ အကောင်အထည်ပေါ်ရန် အောင်မြင်သော ကနဦးစမ်းသပ်လေ့လာမှုများကို မျှော်မှန်းထားကြောင်း Yoma Strategic ၏ အမှုဆောင်အရာရှိချုပ် Melvyn Pun က သတင်းထုတ်ပြန်ချက်ထဲတွင် ပြောကြားထားသည်။
ယခုစီမံကိန်းသည် ကျေးလက်နေဒေသများတွင် ဆက်သွယ်ရေးမျှော်စင်နှင့် ကွန်ယက်များအတွက် လိုအပ်သည့် လျှပ်စစ်စွမ်းအင်ကို ရေရှည်တွင် ရရှိစေမည်ဟု ဆိုသည်။
လျှပ်စစ်စွမ်းအင်မရရှိသေးသည့် နေရာဒေသများတွင် နေရောင်ခြည်သုံး စွမ်းအင်စနစ်များ၊ ဒီဇယ်သုံး မီးပေးစက်များနှင့် စွမ်းအင်သိုလှောင်မှုစနစ်တို့ဖြင့် ပူးပေါင်းဆောက်လုပ်ထားသည့် လျှပ်စစ်ဓာတ်အားပေး စက်ရုံများကို တည်ဆောက်သွားမည်ဖြစ်ပြီး နီးစပ်ရာအိမ်ထောင်စုများသည် လျှပ်စစ်ဓာတ်အားကို လျှပ်စစ်မီးပေးစက်များမှတဆင့် ရယူသုံးစွဲနိုင်မည်ဟု ထုတ်ပြန်ချက်တွင် ဖော်ပြထားသည်။