ဝက်ဝက်ကွဲအောင်မြင်ခဲ့သော နိုင်ငံရေးလျှို့ဝှက်သည်းဖို “နိုင်ငံကြီးသား” ရုပ်ရှင်ကြည့်ပရိသတ်သည် ရုပ်ရှင်ဆင်ဆာဘုတ်အဖွဲ့၏ သက်ညှာစွာ စဉ်းစားတတ်မှုကို အကြီးအကျယ်အံ့အားသင့်လျက် နှစ်ထောင်းအားရရှိခဲ့ကြသည်။ သို့သော် ဒါရိုက်တာကတော့ သူ့ဇာတ်ကားအတွက် မြန်မာ့ရုပ်ရှင်ထူးချွန်ဆု ရွေးချယ်ရေးအဖွဲ့ထံမှ ချီးမြှင့်လာမည့်ဆုများကို မျှော်လင့်မထားပါချေ။
မြင့်မြတ်သူ ရေးသားသည်။
သြဂုတ်လအတွင်းက ရုံတင်ခဲ့သော အိန္ဒိယနွယ်ဖွား မြန်မာဒါရိုက်တာ စတီးလ်၏ နိုင်ငံရေးရုပ်ရှင် “နိုင်ငံကြီးသား” ဇာတ်ကားသည် စီးပွားရေးအရအောင်မြင်ခဲ့သည်သာမက တချိန်က နာမည်ဆိုးဖြင့် ကျော်ကြားလှသော ရုပ်ရှင်ဆင်ဆာဘုတ်အဖွဲ့၏ သက်ညှာစွာ စဉ်းစားတတ်သော တစ်ဖက်မျက်နှာအသစ် တစ်ခုကိုလည်း ထုတ်ပြလိုက်သကဲ့သို့ဖြစ်သွားသည်။
သောက်သောက်လဲရရှိခဲ့သော ရုံဝင်ခငွေနှင့် ရုပ်ရှင်ထွက်လာအပြီး ဖေ့စ်ဘွတ်ခ်ပေါ်မှ ချီးမွမ်းသံတို့သည် ဤကား၏အောင်မြင်မှုကို ဖော်ပြနေသည်။ မြန်မာ့ရုပ်ရှင်ကြည့် ပရိသတ်သည် သူတို့အားလုံးအပေါ် အနိုင်ကျင့်ဗိုလ်ကျ လူပါးဝနေခဲ့ကြသော ဘုံလူဆိုး လူယုတ်မာများအား ရုပ်ရှင်ပိတ်ကားပေါ်တွင် ပီပီပြင်ပြင် သရုပ်ဖော်ရိုက်ကူးသည်ကို ကာလကြာရှည်စွာ တောင့်တမျှော်လင့်နေခဲ့ကြခြင်းကို ဤကား၏အောင်မြင်မှုက ထင်ဟပ်ပြလျက်ရှိသည်။
“နိုင်ငံကြီးသား” ရုပ်ရှင်၏တင်ပြပုံဟန်မှာ အထူးတလည် ဆန်းပြားလှသည်တော့မဟုတ်ပါ။ သို့သော် ဇာတ်လမ်းကတော့ အဂတိလိုက်စားမှုနှင့် လာဘ်ပေးလာဘ်ယူမှုကို အားမနာတမ်း ပီပြင်စွာ သရုပ်ဖော်ထားသည်။ သူရဲကောင်းနှင့် လူဆိုးလူယုတ်တို့၏ ဂန္ထဝင်ယှဉ်ပြိုင်ပွဲတွင် မျိုးချစ်ရဲအရာရှိ တစ်ယောက်မှာ ကောက်ကျစ်ယုတ်မာသော ဝန်ကြီးများနှင့် ခရိုနီလုပ်ငန်းရှင်များ၏ ပျက်စီးယိုယွင်းနေသော လောကကြီးတွင် ကိုယ်ကျင့်တရား စံသတ်မှတ်ချက်တို့ကို အသစ်ပြန်ရေးရတော့မည့် ဥပဒေပြင်ပလမ်းကို မလွှဲသာ မရှောင်သာ လိုက်ပါလျှောက်နေရလေသည်။
ဤရုပ်ရှင်ကပေးသော သတင်းအမှာစကားမှာ မဟုတ်မမှန်၊ မတရားမှု လုပ်နေသူများအား ဆန့်ကျင်တွန်းလှန်ရန်မှာ တာဝန်သိနိုင်ငံသားတိုင်း၏ တာဝန်ဖြစ်သည်ဟူ၍ပင်ဖြစ်သည်။ တပ်မတော်ကို ဖေ့စ်ဘွတ်ခ်တွင် သရော်စာရေးမိသဖြင့် ဒါရိုက်တာ မင်းထင်ကိုကိုကြီးခင်မျာ အလုပ်ကြမ်းနှင့် ထောင်ဒဏ်တစ်နှစ် ကျခံနေရစဉ်တွင် “နိုင်ငံကြီးသား” ဇာတ်ကားထဲမှ မီးလောင်ပေါက်ကွဲစေနိုင်သော အပြန်အလှန်ပြောစကား ဒိုင်ယာလော့များမှာ ရုံထဲတွင် ဟိန်းထွက်နေသည်။
“ရန်ကုန်မြို့လယ်က ရုပ်ရှင်ရုံအိုကြီးတွေကို ကျွန်တော်တို့ဖြိုချပြီး ဟိုတယ်တွေ ဆောက်ချင်ပါတယ်။ ဆောက်ခွင့်ရအောင် ကျွန်တော်တို့ကိုကူညီပါ၊ ဒီစီမံကိန်းရဲ့ ၂၀ ရာခိုင်နှုန်းကို ဝန်ကြီးကို ကျွန်တော်တို့ပေးပါ့မယ်” ဟု ခရိုနီက ဝန်ကြီးအားပြောနေပုံကို ရုပ်ရှင်ရိုက်ပြသည်။
မြန်မာနိုင်ငံတွင် စစ်အုပ်စုက သူတို့အတွက်ဝါဒဖြန့်ရန် နိုင်ငံရေးရုပ်ရှင်များကို ကာလကြာမြင့်စွာကပင် အသုံးချခဲ့ကြသည်။ ငွေကုန်ကြေးကျ အမြောက်အမြားခံကာ နာမည်ကြီးရုပ်ရှင်သရုပ်ဆောင်များဖြင့် ရိုက်ကူးသော စစ်တပ်ဝါဒဖြန့်ရုပ်ရှင်များသည် တချိန်က စစ်တပ်ပိုင် မြဝတီရုပ်သံလိုင်း၏ အဓိကဦးစားပေး အစီအစဉ်များဖြစ်ခဲ့သည်။ သို့သော် လွန်ခဲ့သော ဆယ်စုနှစ်အတွင်း တီဗီလိုင်းသစ်များ ပေါ်လာသောအခါ ယခင်ကလို လူထုကို ဆွဲဆောင်မှုမရှိတော့ပေ။
နိုင်ငံကြီးသားရုပ်ရှင်သည် ထိမိလှသဖြင့် နိုင်ငံရေးရုပ်ရှင်လောကကို လှုပ်ခါသွားစေခဲ့သည်။ ဤရုပ်ရှင်ထွက်ပေါ်လာချိန်သည် သက်ငယ်မုဒိန်းမှုတစ်ခုကို စုံစမ်းစစ်ဆေးနေချိန်နှင့်ပတ်သက်၍ လူထုမကျေနပ်ချက်ကြီးမားနေချိန်၊ နိုင်ငံရေးသမားများအပေါ် လူထု၏ယုံကြည်မှု ကျဆင်းနေချိန်နှင့်လည်း တိုက်ဆိုင်နေသည်။
ဤရုပ်ရှင်သည် ဒါရိုက်တာ၏ စိတ်ကူးယဉ်ဖန်တီးမှုထက် တကယ့်ဖြစ်ရပ်များအပေါ် အခြေခံထားသည်ဟု အချို့ကယုံကြည်ကြသည်။
နိုင်ငံကြီးသားရုပ်ရှင်မှ ဇာတ်ဝင်ခန်း တစ်ခန်း။ ဓာတ်ပုံ – ပံ့ပိုး
အန္တရာယ်ပြုနိုင်သော ဝန်ကြီးသားများက စူပါမော်ဒယ်တစ်ဦးအား အဓမ္မပြုကျင့်ပြီး သတ်ဖြတ်လိုက်သော အမှုတစ်ခုဖြစ်ပွားသည်။ သားတစ်ဦးအမည်က ကောင်းတေဇ၊ မူးယစ်ဆေးများသုံးစွဲနေသော ဝန်ကြီးသားများကို ဘယ်သူကမျှ မထိရဲ၊ မတို့ရဲ။ နိုင်ငံရေးလူထု စည်းဝေးပွဲတစ်ခုတွင် ပွင့်ပွင့်လင်းလင်းထုတ်ပြောလိုက်သော လယ်သမားကို ဝန်ကြီးတစ်ယောက်က နှိပ်စက်ညှဉ်းပန်းပုံ၊ ခရိုနီများလက်ဝါးကြီးအုပ်နေကြပုံနမူနာများ၊ သြဇာကြီးမားသော လူသုံးလေးယောက်လက်၌ တရားစီရင်ရေးစနစ် ပြိုကျပျက်စီးနေပုံတို့ကို ပီပြင်အောင်သရုပ်ဖော်ထားသည်။
“ကျွန်တော့်လုံခြုံရေးနဲ့ ဆင်ဆာအတွက် စိုးရိမ်လို့သာ စိတ်ကူးယဉ်အခြေအနေတွေ၊ စိတ်ကူးယဉ်ဇာတ်ကောင်တွေကို ဖန်တီးလိုက်ရတာ၊ တကယ်တော့ ကျွန်တော်စိတ်ကူးယဉ်ဖန်တီးထားတာ တစ်ခုမှမဟုတ်ဘူး” ဟု ဒါရိုက်တာ စတီးလ်က Frontier ကို ပြောသည်။
“ဥပမာတစ်ခုပြောမယ်ဗျာ၊ မြန်မာပြည်မှာ အစိုးရရုံးတစ်ရုံးမှာ အလုပ်တစ်ခုပြီးဖို့ ဘယ်လောက်ကြာတယ်ဆိုတာ ခင်ဗျားပြလို့မရဘူး၊ ဒါဟာ မြန်မာပြည်မှာ တကယ်ဖြစ်နေတယ်ဆိုတာ အားလုံးသိတယ်။ ဒါပေမဲ့ ဒါတွေကို ရုပ်ရှင်နဲ့ သရုပ်ဆောင်ပြသဖို့ လိုပါသေးတယ်”
ဒါရိုက်တာ စတီးလ်၏ ဖခင်မှာ ရဲအရာရှိတစ်ဦးဖြစ်သည်။ ငယ်စဉ်ကတည်းက အရာရာကို စည်းမျဉ်းစည်းကမ်းအတိုင်း လုပ်ရမည်ဟု လေ့ကျင့်သင်ယူ ကြီးပြင်းခဲ့သူဖြစ်သည်။ သူ့စိတ်ကြိုက်သာ ဤဇာတ်ကားကို ရိုက်ရလျှင် အဂတိလိုက်စားသော ဝန်ကြီး၏သားဆိုးသားမိုက်များကို စူပါမော်ဒယ်အား သတ်ဖြတ်မှုဖြင့်ဖမ်းကာ အချုပ်ကားထဲသို့ ပစ်ထည့်ခံရပုံဖြင့် အဆုံးသတ်ရပေမည်။
သို့သော် စတီးလ်မှာ သူ့ဇာတ်ကားကို ထိုသို့အဆုံးမသတ်ရဲချေ။ ဆင်ဆာထိမည်စိုး၍ တခြားနည်းရှာရသည်။ အခြားတနည်းဖြင့် သူတို့အား ဥပဒေဘောင်အတွင်း သွတ်သွင်းရန် နည်းရှာရသည်။ သို့သော် ဆင်ဆာအဖွဲ့သည် “နိုင်ငံကြီးသား”ကို တကယ့်ကို ထူးထူးခြားခြား သက်သက်ညှာညှာကိုင်တွယ်ခဲ့ကြောင်း တွေ့ရသည်။ အထူးသဖြင့် ဤရုပ်ရှင်က အမှာပါးလိုသော ပွင့်လင်းသည့် သတင်းစကားကို ချင့်တွက်၍လည်းကောင်း၊ ဆင်ဆာဖြတ်တောက်မှုကို တတ်နိုင်သလောက် နည်းပါးအောင် လုပ်လိုပုံကို ပြသလို၍လည်းကောင်း ဤမျှခွင့်ပြုခဲ့ပုံရပါသည်။
ရုပ်ရှင်ထုတ်လုပ်သူများသည် မရိုက်ကူးမီ ဇာတ်ညွှန်းကို ဆင်ဆာတင်ပြ၍ ခွင့်ပြုချက်ယူရပါသေးသည်။ ရိုက်ပြီးပြန်တော့ ဆင်ဆာပြရပါသေးသည်။ “နိုင်ငံကြီးသား” သွားကြည့်သူ ပရိသတ်များကတော့ ဒီကားဆင်ဆာဘယ်လို လွတ်လာပါလိမ့်ဟု စဉ်းစားမရအောင် ရှိနေပေသေးသည်။
အွန်လိုင်းပေါ်မှ ရုပ်ရှင်ဝေဖန်ရေးများရေးနေသူ ကိုဇင်ကိုကိုကမူ “နိုင်ငံကြီးသား” ကို အံ့သြမိသည်ဟုဆိုသည်။ “ရုပ်ရှင်ဆင်ဆာကြောင့် သူတို့ဟာ ဈေးပေါပေါနဲ့ “ပေါကား” တွေ ရိုက်နေရတာပါဟု ပြောနေကြသူ ဒါရိုက်တာတွေကို ဒီကားက စိန်ခေါ်လိုက်တာပဲ” ဟုလည်း ကိုဇင်ကိုကိုက ပြောသည်။
“ကျွန်တော် နိုင်ငံကြီးသားကို ကြည့်ပြီးတော့ ဒီလူတွေ အမှန်ပြောနေတာလား၊ သူတို့ ရုပ်ရှင်တွေရဲ့ အရည်အသွေး ညံ့ဖျင်းလွန်းတာကို ဆင်ခြေပေးနေတာလားဆိုတာ တွေးမရဖြစ်ရတယ်” ဟု သူကပြောသည်။
ဆင်ဆာထိမည်စိုး၍ စိတ်ကူးယဉ်ဇာတ်ကောင်များ ဖန်တီးရိုက်ကူးရပါသည်ဟုဆိုသည့် ဒါရိုက်တာ စတီးလ်။ ဓာတ်ပုံ – ခွန်းလီ
နိုင်ငံကြီးသား နောက်ဆုံးရုံတင်ဖို့အတွက် ဖြတ်တောက်ရလိုက်သည့်အခန်းများရှိ မရှိကိုတော့ ဒါရိုက်တာစတီးလ်ကလည်းကောင်း၊ ဆင်ဆာဘုတ်အဖွဲ့ဝင် တစ်ဦးဦးကလည်းကောင်း ထုတ်ဖော်ပြောဆိုခြင်းမပြုပေ။ မည်သို့ပင်ဖြစ်စေ ဆင်ဆာလုပ်ငန်းသည် လူများထင်ထားသည်ထက် များစွာပို၍လွတ်လပ်ပြီး ပွင့်လင်းစွာ ညှိနှိုင်းဆွေးနွေးနိုင်သည်ဆိုတာကတော့ အလွန်သိသာထင်ရှားပါသည်။
ဆင်ဆာဘုတ်အဖွဲ့နှင့် ဆက်ဆံရာမှာ စိတ်ရှည်ဖို့တော့ အရေးကြီးသည်ဟု စတီးလ်ကပြောသည်။ ဇာတ်ညွှန်းကို သူ ဆင်ဆာတင်ရာမှာ ခါတိုင်းထက်ပိုပြီး အသေးစိတ်အောင်တင်ခဲ့ကြောင်း၊ ရိုက်ကူးနေစဉ် အပြောင်းအလဲလုပ်လိုသည်များ ရှိလာလျှင်လည်း ဆင်ဆာအဖွဲ့ကို အသိပေးတင်ပြခဲ့ကြောင်းဆိုသည်။ ထိုသို့ သတိဝီရိယများဖြင့် လုပ်နေသည့်တိုင် ရုပ်ရှင်ထဲက အကြောင်းအရာများကြောင့် လိပ်ခဲတည်းလည်း ဖြစ်ရသည်များရှိသေးကြောင်းဆိုသည်။
“ရုပ်ရှင်စရိုက်ကတည်းက ဒါက စိတ်ကူးယဉ် ဇာတ်လမ်းပါလို့ ကျွန်တော်တို့ ပြောထားပါတယ်။ ဒါပေမဲ့ ဒီထဲကအတော်များများဟာ လူပုဂ္ဂိုလ်တစ်ဦးတစ်ယောက်ကို တိုက်ရိုက်ဖြစ်စေ၊ သွယ်ဝိုက်ဖြစ်စေ သိက္ခာကျစေနိုင်တယ်လို့ ဆင်ဆာက ယူဆတာတွေ ရှိခဲ့ပါတယ်” ဟု စတီးလ်က ပြောပြသည်။
သူ့ဘက်က မှားယွင်းပါက ဆင်ဆာအဖွဲ့၏တောင်းဆိုချက်ကို လိုက်လျောရန်၊ ပြောင်းလဲမှုများလုပ်ရန် အသင့်ပြင်ထားသကဲ့သို့ သူ့ဘက်ကမှန်ပါက ယဉ်ယဉ်ကျေးကျေးဖြင့် ပွင့်လင်းရဲတင်းစွာ ပြောဆိုရန် ပြင်ဆင်ထားမှုကို ယင်းအချက်က အထောက်အကူဖြစ်စေခဲ့သည်ဟု စတီးလ်ကပြောသည်။ “ရိုးရိုးသားသားပြောရရင် အခုထိ ဆင်ဆာနဲ့ပတ်သက်လို့ ကောင်းကောင်းနားမလည်သေးပါဘူး။ ဒီဇာတ်ကား အသက်ဝင်လာဖို့ ကျွန်တော့်မှာရှိတဲ့ ဆက်ဆံရေးစွမ်းရည်တွေ အကုန်ထုတ်သုံးခဲ့ရတယ်” ဟုလည်း စတီးလ်ကပြောသည်။
နိုင်ငံကြီးသားဇာတ်ကားတွင် ရိုင်းစိုင်းသော အပြန်အလှန်ပြောစကားအချို့ပါဝင်သော်လည်း ဇာတ်ကား၏ ရည်ရွယ်ချက်နှင့်သက်ဆိုင်ပါက ခွင့်ပြုရန်ဆုံးဖြတ်ခဲ့သည်ဟု ဆင်ဆာဘုတ်အဖွဲ့ဝင် အကယ်ဒမီ ဒေါ်ဆွေဇင်ထိုက်ကပြောသည်။
ရုပ်ရှင်ထုတ်လုပ်သူများက ပိုမိုကောင်းမွန်သောဇာတ်ကားများ ထုတ်လုပ်နိုင်စေရန် ဆင်ဆာဘုတ်အဖွဲ့က ဆန္ဒရှိသည်ဟုလည်း သူကပြောသည်။
“ကျွန်မတို့ သူတို့ကို လမ်းညွှန်ချက်ပေးတယ်ဆိုတာကလည်း သူတို့ပြချင်တာ ဘယ်လိုပြလို့ရတယ်ဆိုတာကို အကြံပြုရုံလောက်ပါပဲ။ ဆင်ဆာဘုတ်အဖွဲ့မှာတောင် အသံတစ်ခုတည်းထွက်တာ မဟုတ်ပါဘူး။ လေးငါးမျိုးလောက် ထွက်နိုင်ပါတယ်” ဟုလည်း သူကပြောသည်။
ဆင်ဆာဖြတ်တောက်မှုလုပ်ငန်းစဉ်မှာ ညိနှိုင်းမှုသာဖြစ်ကြောင်း ဆင်ဆာဘုတ်အဖွဲ့ဝင်နှင့် ထင်ရှားသည့် ရုပ်ရှင်ထုတ်လုပ်သူ ဦးမြင့်သိန်းဖေကလည်း သဘောတူသည်။ ရုပ်ရှင်ထုတ်လုပ်သူများက သူတို့၏ ဖန်တီးမှုသုံးသပ်ချက်များကို ဆင်ဆာအဖွဲ့ထံ ရှင်းပြရာတွင် ပိုမိုအားထုတ်ပါက သူတို့၏ရုပ်ရှင်များ အတည်ပြုချက်ရရန် များစွာဖြစ်နိုင်သည်ဟု သူကဆိုသည်။
“တချို့ကိစ္စတွေမှာ သူတို့ရဲ့သုံးသပ်ချက်တွေက မျှတတယ်ဆိုတာ အချက်အလက်အားကောင်းကောင်းနဲ့ ထောက်ပြနိုင်တယ်ဆိုရင် ကျွန်တော်တို့က ခွင့်ပြုလိုက်တာပါပဲ။ ဒီခေတ်မှာ ဆင်ဆာအဖွဲ့က ပိုပြီးလွတ်လပ်ခွင့်ပေးပါတယ်။ ဒါကို သူတို့အသုံးမချတတ်ရင်တော့ မတတ်နိုင်ဘူးပေါ့။ ဆင်ဆာလုပ်ငန်းစဉ်ကို စိန်ခေါ်စရာမလိုတဲ့ ဇာတ်လမ်းတွေအများကြီးရှိပါတယ်။ ဒါတွေကို သူတို့ မဖန်တီးနိုင်ဘူး” ဟုလည်း သူကပြောသည်။
ဒါရိုက်တာ စတီးလ်၏နိုင်ငံကြီးသားရုပ်ရှင်မှ ဇာတ်ဝင်ခန်း တစ်ခန်း။ ဓာတ်ပုံ – ပံ့ပိုး
နိုင်ငံကြီးသားဇာတ်ကားက အနည်းဆုံး အကယ်ဒမီဆုအချို့ ရရှိနိုင်ဖွယ်ရှိသည်။ ဇာတ်ကား၏ အောင်မြင်မှုအလားအလာများနှင့်ပတ်သက်၍မူ စတီးလ်ထံတွင် ရောထွေးသည့်ခံစားချက်များရှိသည်။ “ကျွန်တော့်လက်ရာကို အသိအမှတ်ပြုခံရလိမ့်မယ်လို့ တခါတရံမျှော်လင့်မိတယ်။ ဒါပေမဲ့ ဒီအကယ်ဒမီဆုက ကျွန်တော်မျှော်လင့်ထားသင့်တဲ့အရာ မဟုတ်ဘူးလို့သိပါတယ်” ဟု စတီးလ်ကဆိုသည်။
တောင်အာရှနွယ်ဖွား ရုပ်ရှင်ထုတ်လုပ်သူတစ်ဦးမှာ အသိအမှတ်ပြုခံရရန် မဖြစ်နိုင်ဟု အတိတ်က အတွေ့အကြုံက ထင်ဟပ်နေသည်။ အကယ်ဒမီဆုကိုပိုက်ပြီး စင်ပေါ်ရပ်ရန်မှာ သူ့အသားအရေ မည်းလွန်းလှသဖြင့် မည်သည့်အခါမျှ အကယ်ဒမီမရနိုင်ဟု မိတ်ဆွေများက မကြာခဏပြောကြားဖူးကြောင်း စတီးလ်ကဆိုသည်။
“ဆုရွေးချယ်ရေးလုပ်ငန်းစဉ်က ဘယ်လိုဆောင်ရွက်တယ်၊ ဒါမှမဟုတ် ဒါက ပရိသတ်နှင့်အတူ ချိန်ကိုက်လှုပ်ရှားမှုလား ကျနော်မသိဘူး” ဟု ကိုဆာမိဟုလည်းခေါ်သည့် စတီးလ်ကပြောသည်။
“ကျွန်တော် အသားမည်းတဲ့လူမျိုးဖြစ်နေတာက စကားအများကြီးပြောပါတယ်။ မြန်မာနို်င်ငံမှာ အိန္ဒိယနွယ်ဖွား ဒါရိုက်တာတစ်ယောက် အကယ်ဒမီဆုရတာ မမြင်ဖူးသေးဘူး” ဟု စတီးလ်ကပြောသည်။
အကယ်ဒမီပေးသည့်ညကို တက်ရောက်ခြင်းက စိန်ခေါ်မှုတစ်ခုဖြစ်နိုင်သည်။ ၂၀၀၀ ပြည့်နှစ်က နှစ်ယောက်တစ်အိပ်မက် ရုပ်ရှင်ဇာတ်ကားအတွက် ပထမဆုံးဇာတ်ညွှန်းရေးဆရာအဖြစ် ချီးကျူးမှုရရှိစဉ်က အကယ်ဒမီအခမ်းအနားအတွက် ဧည့်သည်စာရင်းမှ သူ့အမည်မှာ ထူးထူးဆန်းဆန်းကျန်ရစ်ခဲ့ဖူးသည်။
မြန်မာနိုင်ငံ ရုပ်ရှင်အစည်းအရုံးက ထုတ်လုပ်သည့်ကုမ္ပဏီကိုသာ အပြစ်ဖို့ခဲ့ပြီး ကျေနပ်လောက်သည့် ရှင်းလင်းမှုအတွက် ကြိုးပမ်းခဲ့သော်လည်း လျစ်လျူရှုခံရကြောင်း စတီးလ်ကပြောသည်။
အချို့က မြန်မာ-အိန္ဒိယ ဒါရိုက်တာတစ်ယောက်ကို နိုင်ငံရေးရုပ်ရှင်ကား တစ်ကားရိုက်ကူးရန် ခွင့်ပြုသင့်သလားဟု မေးခွန်းထုတ်ကြပြန်သည်။
“ကုလားတစ်ယောက်က (မြန်မာ့) နိုင်ငံရေးနဲ့သက်ဆိုင်သလားဆိုပြီး လူတချို့က ကျွန်တော့်ကို မေးကြတယ်။ ကျွန်တော်လုပ်နေတာက နိုင်ငံရေးမဟုတ်ပါဘူး။ လက်ရှိမြန်မာ့နိုင်ငံရေးကိုလည်း အပြည့်အဝနားမလည်ပါဘူး။ ဒါပေမဲ့ ကျွန်တော်က နိုင်ငံရေးအသိတရားရှိတဲ့ တက်ကြွတဲ့လူတစ်ယောက်ပါလို့တော့ ပြန်ပြောခဲ့တယ်” ဟု သူကပြောသည်။
ယင်းဝေဖန်မှုကို စိုးရိမ်စိတ်မထားသည့် စတီးလ်က နောက်ရိုက်မည့်နိုင်ငံရေးရုပ်ရှင်ကား My Country အတွက် ဇာတ်ညွှန်းရေးနေပြီဖြစ်သည်။ နိုင်ငံကြီးသားဇာတ်ကားတွင် သူက မြန်မာပရိသတ်များ ကာလကြာရှည်စွာ စောင့်စားနေခဲ့ရသည့် ဇာတ်လိုက်တစ်ဦးကို ပုံဖော်ပေးအပ်ခဲ့သလို တခါတရံ နိုင်ငံရေးခေါင်းဆောင်များနှင့် ရာဇဝတ်သားများကြား များစွာခြားနားမှုမရှိသည်ကိုလည်း သတိပေးခဲ့သည်။ လာမည့် My Country ဇာတ်ကားတွင် မြန်မာနိုင်ငံ၌ မည်သူတွေက ဇာတ်လိုက်များဖြစ်ပြီး မည်သူတွေက ဗီလိန်များဖြစ်မည်ကို ကျွန်တော်တို့ စောင့်မျှော်ကြည့်ရှုရဦးမည်ဖြစ်သည်။
ဦးကိုကိုနှင့် အောင်ကျော်ဦး ဘာသာပြန်သည်။
