ရန်ကုန်၊ ဖေဖော်ဝါရီ ၂၁
အပြည်ပြည်ဆိုင်ရာ လေကြောင်းလိုင်းကြီးဖြစ်သည့် Emirates က ရန်ကုန်နှင့် ဖနွမ်ပင်ကြား တိုက်ရိုက်လေကြောင်းခရီးစဉ် ပြေးဆွဲမှုများ စတင်တော့မည်ဟု ကြေညာလိုက်သည်။ ၎င်းတို့၏ ဒူဘိုင်းမှ ပြေးဆွဲနေသည့် လမ်းကြောင်းတွင် အပြောင်းအလဲ ပြုလုပ်လိုက်ခြင်းလည်း ဖြစ်သည်။
လေကြောင်းလိုင်း၏ သတင်းထုတ်ပြန်ချက်အရ ဇူလိုင် ၁ ရက်နေ့မှ စတင်ကာ ဒူဘိုင်းမှ ရန်ကုန်သို့ ပျံသန်းလာသည့် လေယာဉ်သည် ရန်ကုန်မြို့မှ ကမ္ဘောဒီးယားနိုင်ငံ၏မြို့တော်သို့ ဆက်လက်ပျံသန်းမည်ဖြစ်သည်။ အဆိုပါ ခရီးစဉ်လမ်းကြောင်းတွင် မူလက ဟနွိုင်းမြို့ ပါဝင်သည်။ သို့သော် ယခုအခါ ဗီယက်နမ်နိုင်ငံ မြို့တော်မှ ဒူဘိုင်းသို့ သီးခြားခရီးစဉ်တစ်ခုအဖြစ် ပြေးဆွဲတော့မည်ဟု လေကြောင်းလိုင်းက ထုတ်ပြန်ထားသည်။
လေယာဉ်သည် ဒူဘိုင်းမှ နံနက် ၉ နာရီ ၁၅ မိနစ်တွင် ထွက်ခွာမည်ဖြစ်ကာ ရန်ကုန်မြို့သို့ ညနေ ၅ နာရီ ၂၅ မိနစ်တွင် ရောက်ရှိမည်ဖြစ်သည်။ ထို့နောက် ရန်ကုန်မြို့မှ ညနေ ၆ နာရီ ၅၅ မိနစ်တွင် ထွက်ခွာပြီး ဖနွမ်ပင်မြို့သို့ ည ၉ နာရီ ၂၅ မိနစ်တွင် ရောက်ရှိမည်ဖြစ်သည်။ အပြန်ခရီးတွင် ဖနွမ်ပင်မှ ည ၁၁ နာရီ ၁၀ မိနစ်တွင် ထွက်ခွာလာကာ ရန်ကုန်သို့ နံနက် ၁၂ နာရီ ၄၀ မိနစ်တွင် ရောက်ရှိမည်ဖြစ်သည်။ ထို့နောက် နံနက် ၂ နာရီ ၁၀ မိနစ်တွင် ထွက်ခွာကာ ဒူဘိုင်းသို့ နံနက် ၅ နာရီ မိနစ် ၄၀ တွင် ဆိုက်ရောက်မည်ဖြစ်သည်။
ပြီးခဲ့သည့်နှစ် သြဂုတ်လက စတင်ကာ ဒူဘိုင်းနှင့် ရန်ကုန်ကြား ခရီးစဉ်ကို Emirates က ပြေးဆွဲခဲ့သည်။ “မြန်မာနိုင်ငံက ပွင့်လန်းလာပါပြီ။ စီးပွားရေးက တိုးတက်လာသလို ၂၀၂၀ မှာ ကမ္ဘာလှည့်ခရီးသည် ၇ ဒသမ ၅ သန်း လာရောက်မယ်လို့ အစိုးရက ခန့်မှန်းထားပါတယ်” ဟု Emirates ၏ ထိုင်း၊ မြန်မာနှင့် အင်ဒိုချိုင်းနားဒေသဆိုင်ရာ မန်နေဂျာဖြစ်သူ Mr Mohammad Sarhan က ထိုအချိန်က ပြောကြားခဲ့သည်။ “ဒီသတင်းကြားတာနဲ့ ကျွန်တော်တို့ ဒီမှာစီးပွားရေးလုပ်ရမယ်ဆိုတာ သိလိုက်တယ်” ဟု ၎င်းကပြောသည်။
ရန်ကုန်မှ ဖနွမ်ပင်နှင့် ကမ္ဘောဒီးယား၏ ခရီးသွားအချက်အချာဒေသဖြစ်သည့် ဆီရမ်ရိပ်တို့သို့ အပြည်ပြည်ဆိုင်ရာ မြန်မာ့လေကြောင်းက ပြေးဆွဲခဲ့သော်လည်း စီးနင်းသူ နည်းပါးသည့်အတွက် ပြေးဆွဲမှုကို ၂၀၁၂ ခုနှစ်တွင် ရပ်ဆိုင်းခဲ့သည်။