သီလဝါအထူးစီးပွားရေးဇုန်တွင် JFE Meranti Myanmar Company Limited (JMM)က တည်ဆောက်နေသည့် အမေရိကန်ဒေါ်လာ ၈၅ သန်းတန် သတ္တုအလွှာအုပ်စတီး စက်ရုံအတွက် ထုတ်လုပ်ရေးလိုင်းများ စတင်တပ်ဆင်ရန် ဆောင်ရွက်နေပြီဖြစ်သည်။
၂၀၁၇ ခုနှစ်တွင် JFE Steel၊ Meranti Steel၊ JFE Shoji၊ Marubeni-Itochu နှင့် HANWA တို့ ပူးပေါင်းကာ ထူထောင်ခဲ့သည့်JMM ၏ စက်ရုံတွင် စက်ပစ္စည်းများ တပ်ဆင်ရန်အတွက် Myanmar Antaco Company Limited နှင့် သဘောတူညီခဲ့သည်ဟု JMM က သတင်းထုတ်ပြန်သည်။
သဘောတူစာချုပ်လက်မှတ်ရေးထိုးပွဲတွင် JMM ၏ အမှုဆောင်အရာရှိချုပ်နှင့် မန်နေဂျင်းဒါရိုက်တာဖြစ်သူ Dr. Sebastian Langendorf က “JMM ရဲ့ စီမံကိန်းအား သတ်မှတ်အချိန်ဇယားအတိုင်း ပြီးစီးရေးအတွက် Antaco က စက်ကိရိယာတပ်ဆင်ရေး မိတ်ဖက်အဖြစ် ကျွန်တော်တို့နှင့်အတူ ရှေ့ဆက်သွားနိုင်ဖို့ စိတ်လှုပ်ရှားနေမိပါတယ်” ဟု ပြောကြားသည်။
JMM ၏ ထုတ်လုပ်ရေးလိုင်းတွင် ခန့်မှန်း ခြေ ၁၈၀,၀၀၀ tpa စွမ်းဆောင်ရည်ရှိ သတ္ထုအလွှာအုပ်စတီးများ ထုတ်လုပ်ရေးနှင့် ခန့်မှန်းခြေ ၉၀,၀၀၀ tpa စွမ်းဆောင်ရည်ရှိ အရောင်တင်လိုင်းတို့ ပါဝင်မည်ဟု သိရသည်။
အဆိုပါစက်ရုံကို ၂၀၁၈ ခုနှစ်၊ မတ်လတွင် စတင်တည်ဆောက်ခဲ့ခြင်းဖြစ်ကာ မြန်မာနိုင်ငံ ဆောက်လုပ်ရေးကဏ္ဍအတွက် လိုအပ်မည့် သတ္တုအလွှာအုပ်စတီးပစ္စည်းများ ပံ့ပိုးပေးနိုင်ရန် ရည်ရွယ်ထားသည်။