ရန်ကုန်၊ မတ် ၁
ရန်ကုန်မြို့တွင်း အများပြည်သူ သယ်ယူပို့ဆောင်ရေး စနစ်သစ်ဖြစ်သည့် YBS (Yangon Bus Service) ကို သုံးရက်အတွင်း အောင်မြင်စွာ ပြုပြင်ပြောင်းလဲနိုင်ခဲ့တယ်လို့ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းက ယနေ့ ပြောကြားလိုက်ပါတယ်။
အစိုးရအဖွဲ့ကို တာဝန်ယူမှု တစ်နှစ်ပြည့်မြောက်မှုအတွက် သူရဲ့ Facebook စာမျက်နှာကနေ ပြောကြားခဲ့တဲ့ ဗီဒီယိုသတင်းစကားမှာ ဦးဖြိုးမင်းသိန်းက ထည့်သွင်းပြောကြားခဲ့တာ ဖြစ်ပါတယ်။
“မထသအဖြစ် ပြေးစွဲလာခဲ့တဲ့ အနှစ် ၅၀ ကျော် ဆောင်ရွက်ခဲ့မှုတစ်ရပ်ကို ရပ်ဆိုင်းခဲ့ပါတယ်။ အပြောင်းအလဲက စနစ်အပြောင်းအလဲ ဖြစ်ပါတယ်။ YBS စနစ်ကို စတင်ခဲ့ပါတယ်။ ပြည်သူ ပူးပေါင်းပါဝင်မှုကြောင့် စနစ်တရပ်လုံးဟာ သုံးရက်တာကာလအတွင်း စနစ်တကျ ပြောင်းလဲနိုင်ခဲ့တယ်” လို့ သူ့ရဲ့ ငါးမိနစ်ကြာ သတင်းစကားမှာ ထည့်သွင်းပြောကြားသွားပါတယ်။
အဆိုပါ စနစ်ကို ဇန်နဝါရီ ၁၆ ရက်နေ့က စတင် ပြောင်းလဲခဲ့တာ ဖြစ်ပါတယ်။ စနစ်တကျ ပြောင်းလဲနိုင်ခဲ့တယ်လို့ ဝန်ကြီးချုပ်က ပြောကြားပေးမယ့် လက်တွေ့မှာတော့ စနစ်သစ်မှာ ပါဝင်ဆောင်ရွက်နေတဲ့ ယာဉ်ပိုင်ရှင်၊ ယာဉ်မောင်း၊ ယာဉ်နောက်လိုက်တွေအပြင် ဘတ်စ်ကား စီးနင်းသည့် အများပြည်သူများမှာ ကားအရေအတွက် နည်းပါးနေခြင်းနဲ့ စည်းကမ်းချိုးဖောက်မှုတွေကို နိုင်နိုင်နင်းနင်း မထိန်းချုပ်နိုင်သေးတာတွေစတဲ့ စနစ်ရဲ့ အခက်အခဲတွေကို ရင်ဆိုင်နေကြရဆဲ ဖြစ်ပါတယ်။
ဒါကြောင့် အများပြည်သူတွေအပါအဝင် တက်ကြွလှုပ်ရှားသူအချို့က စနစ်သစ်တစ်ခုကို ပြောင်းလဲသော်လည်း လက်တွေ့ကျကျ စနစ်တကျ ပြောင်းလဲခဲ့ခြင်းမရှိဘူးလို့ ဝေဖန်မှုတွေ ရှိနေပါတယ်။
ဦးဖြိုးမင်းသိန်းကတော့ သုံးရက်အတွင်း YBS ကို စနစ်တကျ ပြောင်းလဲနိုင်ခဲ့ပြီးနောက် အသားကျနိုင်အောင် ဆက်လက်လုပ်ဆောင်နေပြီး နောက်ပိုင်းမှာ စမက်ကတ်ဖြင့် ပိုက်ဆံသိမ်းဆည်းခြင်း၊ ကားအစီးရေ ထပ်မံဖြည့်တင်းခြင်းတွေကို ပြုလုပ်ဖို့ ပြင်ဆင်ထားတယ်လို့ ဆိုပါတယ်။
YBS စနစ်အတွက် ကားသစ် ၃,၀၀၀ ကို နိုင်ငံတော်ဘတ်ဂျတ် ကျပ်ဘီလျံ ၇၀ အသုံးပြုကာ ဝယ်ယူဖြည့်တင်း မယ်လို့လည်း သူကပြောကြားဖူးပါတယ်။
လက်ရှိအချိန်မှာတော့ YBS စနစ်ပြောင်းလဲမှုဟာ တစ်လကျော် ကြာမြင့်လာပြီဖြစ်ပြီး ခရီးသွားပြည်သူ အများစုမှာလည်း အသုံးပြုမှု အများဆုံးဖြစ်သည့် ရုံးဆင်းရုံးတက်ချိန်များမှာ မှတ်တိုင်များ၌ ဘတ်စ်ကားတွေကို အချိန်ကြာမြင့်စွာ စောင့်ဆိုင်းနေကြရဆဲ ဖြစ်ပါတယ်။။
ဦးဖြိုးမင်းသိန်းက YBS စနစ်ပြောင်းလဲမှုအပါအဝင် ရန်ကုန်မြို့အတွင်း ယာဉ်ကြောကျပ်တည်းမှုကို ဖြေရှင်းရာမှာလည်း အောင်မြင်မှုတွေ ရရှိလာပြီလို့ ထည့်သွင်းပြောဆိုထားပါသေးတယ်။
သတင်း-ဟိန်းကိုစိုး