This post is also available in: English Myanmar

မဲဆန္ဒနယ်ငါးခုက ရွေးကောက်ပွဲအခြေအနေ

မရမ်းကုန်း

ကိုဗစ်-၁၉ကာကွယ်ရေးအတွက် မာ့စ်ခ်များတပ်ဆင်၍ မဲပေးရန် တန်းစီစောင့်ဆိုင်းနေသော မရမ်းကုန်းမြို့နယ်က မဲဆန္ဒရှင်များကို ရွေးကောက်ပွဲနေ့ နိုဝင်ဘာ၈ရက်တွင် မြင်တွေ့ခဲ့ရစဉ်။ (သူရဇော် | ဖရွန်းတီးယားမြန်မာ)

အင်န်အယ်လ်ဒီရဲ့ အမာခံနယ်မြေဖြစ်နေဆဲ မရမ်းကုန်း

နိုဝင်ဘာ၈ရက် ရွေးကောက်ပွဲတွင် အင်န်အယ်လ်ဒီပါတီသည် မရမ်းကုန်းမြို့နယ်တွင် အလွယ်တကူအနိုင်ရရှိခဲ့ပြီး ယင်းမဲဆန္ဒနယ်သည် အာဏာရပါတီ၏ အမာခံနယ်မြေအဖြစ် ဆက်လက်တည်ရှိနေသည်။

ဖရွန်းတီးယားမြန်မာက ၂၀၂၀ရွေးကောက်ပွဲအတွက် မြို့နယ်ငါးခုကိုရွေးချယ်ထားပြီး အဲဒီမဲဆန္ဒနယ်တွေမှာ ဖြစ်ပေါ်နေတဲ့ ရွေးကောက်ပွဲအကြိုကာလ အခြေအနေတွေ၊ ဒေသခံတွေရဲ့ မျှော်လင့်ချက်တွေ၊ နိုင်ငံရေးပါတီတွေရဲ့ မဲဆွယ်မှု၊ မဲပေးမှုနဲ့ ရွေးကောက်ပွဲအနိုင်အရှုံးကြေညာမှု စတဲ့အကြောင်းအရာတွေကို တင်ဆက်ပေးသွားမှာဖြစ်ပါတယ်။ အဲဒီမြို့နယ်ငါးခုကတော့ ဘောလခဲ၊ မြစ်ကြီးနား၊ ပျော်ဘွယ်၊​ မြောက်ဦးနဲ့ မရမ်းကုန်းမြို့နယ်တွေဖြစ်ပါတယ်။
ရဲမွန် ရေးသားသည်။

နိုဝင်ဘာ၈ရက် အထွေထွေရွေးကောက်ပွဲမှာ အမျိုးသားဒီမိုကရေစီအဖွဲ့ချုပ် (အင်န်အယ်လ်ဒီပါတီ)က မရမ်းကုန်းမြို့နယ်အပါအဝင် တစ်နိုင်ငံလုံးမှာ တောင်ပြိုကမ်းပြိုအနိုင်ရခဲ့တဲ့အပေါ် မနွယ်နွယ်ဝင်းတစ်ယောက် ကျေနပ်အားရနေပါတယ်။

“ရွေးကောက်ပွဲမတိုင်ခင်ကတည်းက မရမ်းကုန်းမှာ အန်အယ်လ်ဒီပဲနိုင်မယ်ဆိုတာ ယုံကြည်ခဲ့ပြီးသားပါ”လို့ သူကပြောပါတယ်။​ 

မရမ်းကုန်းမြို့နယ်၊ အမှတ်(၁)ရပ်ကွက်မှာနေထိုင်တဲ့ မနွယ်နွယ်ဟာ အသက်၂၂နှစ်ရှိပြီဖြစ်ပြီး နိုဝင်ဘာ၈ရက်က ကျင်းပခဲ့တဲ့ ၂၀၂၀အထွေထွေရွေးကောက်ပွဲမှာ ပထမဆုံးအကြိမ် မဲပေးခွင့်ရခဲ့သူဖြစ်ပါတယ်။

ရန်ကုန်တိုင်းဒေသကြီးရဲ့ အကြီးဆုံးမြို့နယ်တွေအနက် တစ်ခုဖြစ်ပြီး လူဦးရေ နှစ်သိန်းကျော်နေထိုင်တဲ့ မရမ်းကုန်းမြို့နယ်မှာ အင်န်အယ်လ်ဒီပါတီက ပြည်သူ့လွှတ်တော်၊ တိုင်းဒေသကြီး လွှတ်တော်နှစ်နေရာနဲ့ အမျိုးသားလွှတ်တော် မဲဆန္ဒနယ်(၁၁)တို့မှာပါ အနိုင်ရရှိခဲ့တာ ဖြစ်ပါတယ်။ တစ်နိုင်ငံလုံးအတိုင်းအတာနဲ့ဆိုရင် အင်န်အယ်လ်ဒီပါတီဟာ ပြည်ထောင်စုလွှတ်တော်မဲဆန္ဒနယ် စုစုပေါင်းရဲ့ ၈၀ရာခိုင်နှုန်းကျော်မှာ အနိုင်ရရှိခဲ့ပါတယ်။

မရမ်းကုန်းမြို့နယ်ပြမြေပုံကို Thibi အဖွဲ့က ရေးဆွဲသည်။

မရမ်းကုန်းပြည်သူ့လွှတ်တော်မဲဆန္ဒနယ်မှာ အနိုင်ရရှိခဲ့သူကတော့ အင်န်အယ်လ်ဒီပါတီရဲ့ ဝါရင့်အဖွဲ့ဝင်တစ်ဦးဖြစ်တဲ့ ဒေါက်တာမေဝင်းမြင့်ပဲဖြစ်ပါတယ်။ သူဟာ ပြည်သူ့လွှတ်တော်မဲဆန္ဒနယ်ကို ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီဝင် ဦးမင်းသိန်း၊ ပြည်သူ့ရှေ့ဆောင်ပါတီဥက္ကဋ္ဌဒေါက်တာသက်သက်ခိုင်တို့နဲ့ ယှဉ်ပြိုင်ခဲ့ရတာဖြစ်ပြီး ဆန္ဒမဲပေးခွင့်ရှိသူ ၁၁၀,၀၀၀ကျော်ရှိတဲ့အနက် ၈၀ရာခိုင်နှုန်းကျော်ရဲ့ ဆန္ဒမဲတွေကို ရရှိခဲ့တာဖြစ်ပါတယ်။ 

ဒါ့ပြင် အင်န်အယ်လ်ဒီပါတီဟာ တိုင်းဒေသကြီးလွှတ်တော်မဲဆန္ဒနယ်(၁)မှာ ဆန္ဒမဲ ၉၀ရာခိုင်နှုန်း၊ တိုင်းဒေသကြီးလွှတ်တော်မဲဆန္ဒနယ်(၂)မှာ ၇၆ရာခိုင်နှုန်း အသီးသီးနဲ့ ပြိုင်ဘက်ပါတီတွေကို အနိုင်ရရှိခဲ့တာဖြစ်ပါတယ်။

နိုင်ငံ့စီးပွားရေးအတွက် အဓိကမောင်းနှင်အားလို့ ပြောနိုင်တဲ့ ရန်ကုန်​၊ မရမ်းကုန်းမြို့နယ်မှာ နေထိုင်တဲ့ မနွယ်နွယ်ဝင်းကတော့ အင်န်အယ်လ်ဒီအစိုးရဟာ ဒုတိယသက်တမ်းမှာ လူငယ်တွေအတွက် အလုပ်အကိုင်၊ အခွင့်အလမ်းတွေ ပိုမိုဖန်တီးပေးသင့်တယ်လို့ ဆိုပါတယ်။ သူက အလုပ်အကိုင်ရှာဖွေရေးကုမ္ပဏီတစ်ခုမှာ အလုပ်လုပ်နေသူဖြစ်ပါတယ်။

“လူငယ်အများစုက အလုပ်ရဖို့ခက်ခဲနေကြတဲ့အတွက် အန်အယ်လ်ဒီအနေနဲ့ လာမဲ့ငါးနှစ်တာကာလမှာ ဒီအကြောင်းအရာကို ဖြေရှင်းဖို့လိုအပ်ပါတယ်။ လူငယ်တွေ ဘဝမှာဆက်လက် ရပ်တည်နိုင်ဖို့အတွက် အလုပ်တွေလိုအပ်ပါတယ်”လို့ သူက ပြောပါတယ်။

၂၀၂၀ရွေးကောက်ပွဲတွင် ပထမဆုံးအကြိမ်မဲပေးသူ မဲဆန္ဒရှင်တစ်ဦးဖြစ်သည့် မနွယ်နွယ်ဝင်းက ဖရွန်းတီးယားမြန်မာကို ဩဂုတ် ၂၃ရက်က လက်ခံတွေ့ဆုံ စကားပြောခဲ့သည်။ (သူရဇော် | ဖရွန်းတီးယားမြန်မာ)

မရမ်းကုန်းမြို့နယ်၊ အမှတ်(၃)ရပ်ကွက်က ကားအငှားဝန်ဆောင်မှုလုပ်ငန်းရှင် ကိုကြည်ဝေလင်းကလည်း အစိုးရအနေနဲ့ စီးပွားရေးတိုးတက်အောင် လုပ်သင့်ပြီး လူငယ်တွေအတွက် အလုပ်အကိုင်အခွင့်အလမ်းတွေ ပိုမိုဖန်တီးပေးဖို့လိုအပ်ကြောင်း ဆိုပါတယ်။ ဒီဆန္ဒတွေ အကောင်အထည်ဖော်ပေးမဲ့ အင်န်အယ်လ်ဒီပါတီကို မဲပေးဖို့ ရွေးကောက်ပွဲနေ့မှာ မဲရုံရှေ့ အချိန်နှစ်နာရီကြာအောင် ရပ်စောင့်ခဲ့ရတယ်လို့လည်း သူကဆိုပါတယ်။

“အလုပ်အကိုင်အခွင့်အလမ်းတွေများမယ်ဆိုရင် လူတွေရဲ့ဘဝတိုးတက်လာမှာ”လို့ သူက ဆိုပါတယ်။

ပထမသက်တမ်းငါးနှစ်အတွင်း အာဏာရပါတီရဲ့ စွမ်းဆောင်ရည်ကောင်းမွန်ခဲ့ပြီး မြို့ပြဖွံ့ဖြိုးတိုးတက်ရေးလုပ်ငန်းတွေဆောင်ရွက်ရာမှာ ယခင်ပြည်ခိုင်ဖြိုးအစိုးရထက် ပိုပြီးတိုးတက်လာတယ်လို့ ကိုကြည်ဝေလင်းက ဆိုပါတယ်။

မိုးရာသီမှာ မရမ်းကုန်းမြို့နယ်အတွင်း ရေကြီးတဲ့ပြဿနာက ဆက်ရှိနေပေမဲ့ အင်န်အယ်လ်ဒီအစိုးရက ဒီပြဿနာကို ဒုတိယသက်တမ်းအတွင်း ဖြေရှင်းပေးလိမ့်မယ်လို့ သူကယုံကြည်နေပါတယ်။​

“အခုလူတွေက အလုပ်လုပ်တဲ့အခါမှာ စေတနာပါကြတယ်။ တစ်ခုခုလုပ်တိုင်း စေတနာထည့်ပြီး လုပ်ကြတယ်”လို့ သူကဆက်ပြောပါတယ်။

မရမ်းကုန်းမြို့နယ်တွင် နေထိုင်သူ ကားအငှားဝန်ဆောင်မှုလုပ်ငန်းရှင် ဦးကြည်ဝေလင်းက ဖရွန်းတီးယားမြန်မာကို ဩဂုတ်၂၃ရက်က လက်ခံတွေ့ဆုံ၍ မေးမြန်းသည်များကို ဖြေကြားခဲ့သည်။ (သူရဇော် | ဖရွန်းတီးယားမြန်မာ)

မရမ်းကုန်းပြည်သူ့လွှတ်တော်ကိုယ်စားလှယ် ဒေါ်မေဝင်းမြင့်ဟာ အင်န်အယ်လ်ဒီပါတီရဲ့ ဗဟိုအလုပ်အမှုဆောင်အဖွဲ့ဝင်တစ်ဦးဖြစ်ပြီး စစ်အစိုးရက အသိအမှတ်မပြုတဲ့ ၁၉၉၀ရွေးကောက်ပွဲမှာ ဝင်ရောက်ယှဉ်ပြိုင်အနိုင်ရခဲ့သူလည်းဖြစ်ပါတယ်။ 

သူဟာ အင်န်အယ်လ်ဒီပါတီ ဝင်မပြိုင်ခဲ့တဲ့ ၂၀၁၀ရွေးကောက်ပွဲကလွဲပြီး ကျန်တဲ့ ၁၉၉၀၊ ၂၀၁၅နဲ့ ၂၀၂၀ရွေးကောက်ပွဲတွေနဲ့ ၂၀၁၂ကြားဖြတ်ရွေးကောက်ပွဲတွေ အားလုံးမှာ မရမ်းကုန်းမြို့နယ်ကပဲ​အနိုင်ရရှိခဲ့တာကြောင့် မရမ်းကုန်းရဲ့ သက်တမ်းအရှည်ဆုံး လွှတ်တော်ကိုယ်စားလှယ်လို့တောင် ပြောလို့ရပါတယ်။

ရွေးကောက်ပွဲလေးခုတိုင်တိုင် မရမ်းကုန်းရဲ့ ပြည်သူ့လွှတ်တော်မဲဆန္ဒနယ်ကို အနိုင်ယူထားတဲ့အပေါ် ဒေါ်မေဝင်းမြင့်ကို ဖရွန်းတီးယားမြန်မာက ဆက်သွယ်မေးမြန်းဖို့ကြိုးပမ်းခဲ့ပေမဲ့ သူကလက်ခံဖြေကြားဖို့ ငြင်းဆန်ခဲ့ပါတယ်။

ဒါပေမဲ့ မဲပေးခဲ့တဲ့ပြည်သူတွေကို ကျေးဇူးတင်ကြောင်းနဲ့ ပြည်သူတွေအတွက် တာဝန်ကျေပြွန် သွားမယ်လို့ ရွေးကောက်ပွဲအပြီး လူမှုကွန်ရက်စာမျက်နှာမှာ သူက ရေးသားခဲ့ပါတယ်။ 

ရွေးကောက်ပွဲမတိုင်ခင်ကာလမှာ မရမ်းကုန်းမြို့နယ်ဟာ လူအများစိတ်ဝင်စားမှုခံခဲ့ရတဲ့ မဲဆန္ဒနယ်တွေထဲက တစ်ခုဆိုရင် မမှားပါဘူး။ ဘာကြောင့်လဲဆိုတော့ အင်န်အယ်လ်ဒီပါတီဝင်ဟောင်းနဲ့ ပြည်သူ့ရှေ့ဆောင်ပါတီဥက္ကဋ္ဌဒေါ်သက်သက်ခိုင်ဟာ မရမ်းကုန်းပြည်သူ့လွှတ်တော် မဲဆန္ဒနယ်မှာ ဝင်ရောက်ယှဉ်ပြိုင်ခဲ့လို့ဖြစ်ပါတယ်။ ဒေါ်သက်သက်ခိုင်ဟာ ဒေါ်မေဝင်းမြင့်ကို ရှုံးနိမ့်ခဲ့ပြီး ပြည်ခိုင်ဖြိုးပါတီကိုယ်စားလှယ်လောင်းနောက် ဆန္ဒမဲစုစုပေါင်းရဲ့ ၇ရာခိုင်နှုန်းသာ ရရှိခဲ့တာဖြစ်ပါတယ်။

မရမ်းကုန်းမြို့နယ်တွင် ယှဉ်ပြိုင်ခဲ့သည့် နိုင်ငံရေးပါတီများ ရရှိခဲ့သော မဲရလဒ်များကို နှိုင်းယှဉ်ပြသထားသည့် ရုပ်ပုံကားချပ်။ (ပြည်ထောင်စုရွေးကောက်ပွဲကော်မရှင်၏ တရားဝင်ထုတ်ပြန်ချက်များကို အခြေခံ၍ Thibi အဖွဲ့က ဖန်တီးထားသည်။)

ရွေးကောက်ပွဲရှုံးနိမ့်ခဲ့တဲ့ ဒေါ်သက်သက်ခိုင်ကတော့ အင်န်အယ်လ်ဒီပါတီရဲ့ ရွေးကောက်ပွဲ အောင်နိုင်မှုအပေါ်ဂုဏ်ပြုကြောင်းနဲ့ ရွေးကောက်ပွဲရလဒ်ကိုလက်ခံကြောင်း ဖရွန်းတီးယားမြန်မာကို နိုဝင်ဘာ၁၁ရက်က ပြောပါတယ်။

ဒါပေမဲ့ ဒီနှစ်ရွေးကောက်ပွဲဟာ ယခင်ရွေးကောက်ပွဲတွေထက် လွတ်လပ်ပြီးတရားမျှတမှု ရှိ၊ မရှိအပေါ် စိတ်ပူကြောင်း ဆိုပါတယ်။

ပြည်တွင်းနဲ့ နိုင်ငံတကာရွေးကောက်ပွဲလေ့လာစောင့်ကြည့်ရေးအဖွဲ့တွေဟာ မဲလက်မှတ်ရိုက်နှိပ်တဲ့လုပ်ငန်းစဥ်ကို စောင့်ကြည့်လေ့လာခွင့်မရတဲ့အတွက် မဲလက်မှတ်အရေအတွက်ကိုတိတိကျကျမသိခဲ့ကြရဘူးလို့လည်း ဒေါ်သက်သက်ခိုင်က ပြောပါတယ်။ ဒါ့ပြင် နိုင်ငံရေးပါတီတွေအနေနဲ့ ကိုဗစ်-၁၉ကမ္ဘာ့ကပ်ရောဂါကြောင့် မဲဆန္ဒရှင်စာရင်းတွေကို အသေအချာစစ်ဆေးခွင့်မရခဲ့ကြဘူးလို့ သူကဆိုပါတယ်။

“အသက်၆၀နဲ့အထက် မဲပေးဖို့လုပ်တုန်းကလည်း တချို့နေရာတွေမှာ လျှို့ဝှက်စွာမဲမပေးနိုင်တာတွေကိုလည်း ကျွန်မတို့ကြားရပါတယ်”လို့ ဒေါ်သက်သက်ခိုင်က ပြောပါတယ်။

ဒီနှစ်ရွေးကောက်ပွဲမှာ ကိုဗစ်-၁၉ ကူးစက်မှုအန္တရာယ်ရှိတာကြောင့် အစိုးရနဲ့ ပြည်ထောင်စုရွေးကောက်ပွဲကော်မရှင်က အသက်၆၀နဲ့အထက် မဲဆန္ဒရှင်တွေကို နေအိမ်ကနေ ကြိုတင်မဲပေးခွင့်ပြုခဲ့တာဖြစ်ပါတယ်။ ဒီကြိုတင်မဲတွေကို ကော်မရှင်အဖွဲ့ခွဲနဲ့ မဲရုံတာဝန်ရှိသူတွေရဲ့ ကြီးကြပ်မှုအောက်မှာ မဲပေးခဲ့ရတာဖြစ်ပြီး တချို့ဒေသတွေမှာ လွတ်လွတ်လပ်လပ် မဲပေးခွင့်မရတာကို သူကဆိုလိုတာဖြစ်ပါတယ်။

နိုင်ငံတကာစောင့်ကြည့်လေ့လာသူအဖွဲ့တချို့က မြန်မာနိုင်ငံရဲ့ ရွေးကောက်ပွဲဥပဒေတွေရဲ့ အားနည်းချက်တွေနဲ့ လူမျိုးစုတချို့ကို မဲပေးခွင့်မရအောင် ခွဲခြားဆက်ဆံတဲ့ဖြစ်စဉ်တွေကို ထောက်ပြခဲ့တာမျိုးရှိပါတယ်။ ဒီလိုထောက်ပြတာကလွဲလို့ နိုဝင်ဘာ၈ရက်မှာ ကျင်းပခဲ့တဲ့ ရွေးကောက်ပွဲဟာ သန့်ရှင်းတဲ့ရွေးကောက်ပွဲတစ်ခုဖြစ်ကြောင်း စောင့်ကြည့်လေ့လာသူအများစုက အသိအမှတ်ပြုကြပါတယ်။

အင်န်အယ်လ်ဒီပါတီဟာ အများပြည်သူအကြားမှာ ရှိပြီးသားဖြစ်တဲ့ ပါတီပုံရိပ်ကြောင့် အနိုင်ရရှိခဲ့တာဖြစ်တယ်လို့ ယုံကြည်ကြောင်း ဒေါ်သက်သက်ခိုင်ကဆိုပါတယ်။ ဒါ့ပြင် နေအိမ်တွင်သာ နေထိုင်စေရေးအမိန့်မှာ အကျုံးဝင်တဲ့မြို့နယ်တွေမှာ သူတို့လို ပါတီငယ်တွေဟာ ပြည်သူတွေကို မဲဆွယ်စည်းရုံးဖို့ ရုန်းကန်ခဲ့ရကြောင်း သူကဆိုပါတယ်။ 

နိုဝင်ဘာ၈ရက်က မရမ်းကုန်းမြို့နယ်အတွင်းရှိ မဲရုံတစ်ခုတွင် မဲလာပေးသူများကို မဲရုံဝန်ထမ်းတစ်ဦးက ရေမလိုလက်သန့်ဆေးရည်များ ဝေငှေနေစဉ်။ (သူရဇော် | ဖရွန်းတီးယားမြန်မာ)

စက်တင်ဘာကတည်းက ကိုဗစ်-၁၉ပိုးတွေ့လူနာ အများအပြားတွေ့ရှိလာတာကြောင့် အစိုးရက ရန်ကုန်တိုင်းဒေသကြီးအတွင်း ကိုကိုးကျွန်းမြို့နယ်ကလွဲလို့ ကျန်တဲ့နေရာတွေအားလုံးမှာ နေအိမ်တွင်သာနေထိုင်စေရေး အမိန့်ကို ထုတ်ပြန်ခဲ့ပါတယ်။ အဲဒီအမိန့်သက်ရောက်တဲ့ မြို့နယ်တွေမှာ မဲဆွယ်စည်းရုံးခွင့်မရှိတဲ့အတွက် နိုင်ငံရေးပါတီတော်တော်များများ ရွေးကောက်ပွဲအကြိုကာလမှာ ရုန်းကန်ခဲ့ရပါတယ်။

ဒါ့ပြင် ရွေးကောက်ပွဲနေ့မှာ မရမ်းကုန်းမြို့နယ်အတွင်းက အင်းယားကိုဗစ်ကုသရေးစင်တာက လူနာ၂၈၀ကျော် မဲပေးခွင့်ဆုံးရှုံးခဲ့ရတဲ့ ဖြစ်စဉ်တစ်ခုလည်း ပေါ်ပေါက်ခဲ့ပါသေးတယ်။ အကြောင်းအရင်းကတော့ သူတို့ကြိုတင်မဲပေးဖို့အတွက် ဆန္ဒမဲလက်မှတ်တွေ အချိန်မီရောက်မလာတာကြောင့် ဖြစ်ပါတယ်။

အဲဒီလို ကိုဗစ်စင်တာနဲ့ ဆေးရုံဆေးခန်းတွေမှာ ရောက်နေတဲ့ပြည်သူအချို့ မဲပေးခွင့်မရခဲ့တဲ့အပေါ်တောင်းပန်ကြောင်း နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က မိန့်ခွန်းတစ်ခုမှာ ထည့်သွင်းပြောကြားခဲ့ပါတယ်။ ဆေးရုံနဲ့ ကွာရန်တင်းစင်တာတွေက ပြည်သူတွေ အချိန်မီမဲပေးနိုင်ဖို့ အစိုးရက မဆောင်ရွက်ပေးနိုင်ခဲ့ဘူးလို့လည်း သူက ဝန်ခံခဲ့ပါတယ်။

အင်းယားကိုဗစ်ကုသရေးစင်တာမှာ မြို့နယ်ပေါင်းစုံကလူနာတွေ ရောက်ရှိနေတာကြောင့် သူတို့ကြိုတင်မဲပေးနိုင်ဖို့ သူတို့ရဲ့မူလမဲဆန္ဒနယ်က မြို့နယ်ကော်မရှင်အဖွဲ့ခွဲတွေနဲ့ ဆက်သွယ်ခဲ့ပေမဲ့ ဆန္ဒမဲလက်မှတ်တွေ အချိန်မီမရောက်ရှိခဲ့ဘူးလို့ မရမ်းကုန်းမြို့နယ် ရွေးကောက်ပွဲကော်မရှင်အဖွဲ့ခွဲ ဥက္ကဋ္ဌဦးကျော်ကျော်ဝင်းက ဆိုပါတယ်။

“ကျွန်တော်ကိုယ်တိုင် တချို့ကော်မရှင်အဖွဲ့ခွဲတွေဆီမှာ မဲလက်မှတ်ကိုထိုင်စောင့်ပြီး သွားယူခဲ့ရတာတွေရှိတယ်”လို့ သူကပြောပါတယ်။

နိုဝင်ဘာ၈ရက်တွင် ကျင်းပခဲ့သည့် ရွေးကောက်ပွဲတွင် မရမ်းကုန်းမြို့နယ်ရှိ မဲဆန္ဒရှင်များ မဲပေးမှုရာခိုင်နှုန်း။ (ပြည်ထောင်စုရွေးကောက်ပွဲကော်မရှင်၏ တရားဝင်အချက်အလက်များကို ကိုးကား၍ Thibi အဖွဲ့ ရုပ်ပုံကားချပ် ရေးဆွဲသည်။)

ရွေးကောက်ပွဲနေ့မှာ ဘာပြဿနာမှ ကြီးကြီးကျယ်ကျယ်မရှိခဲ့ပေမဲ့ မဲရှုံးခဲ့တဲ့ ပြည်ခိုင်ဖြိုးလွှတ်တော်ကိုယ်စားလှယ်လောင်း ဦးကျော်ဝင်းထိုက်ကတော့ ရွေးကောက်ပွဲက တရားမျှတမှုမရှိဘူးလို့ဆိုပြီး မဲရလဒ်ကို လက်ခံဖို့ ငြင်းဆန်ခဲ့ပါတယ်။ မဲရလဒ်တွေကို အတည်ပြုတဲ့ ပုံစံ-၁၉မှာ လက်မှတ်ရေးထိုးဖို့ ငြင်းဆန်ခဲ့ပေမဲ့ မြို့နယ်ရွေးကောက်ပွဲကော်မရှင်အဖွဲ့ခွဲကတော့ လုပ်ငန်းစဉ်အတိုင်း အင်န်အယ်လ်ဒီကိုယ်စားလှယ်လောင်းတွေကို အနိုင်ရသူတွေအဖြစ် အသိအမှတ်ပြု ကြေညာခဲ့ပါတယ်။

ရွေးကောက်ပွဲအလွန်ကာလတွေမှာ အလားတူ အရှုံးရလဒ်ကို လက်မခံနိုင်တာကြောင့် ပြည်ခိုင်ဖြိုးကိုယ်စားလှယ်လောင်းတွေက ပုံစံ-၁၉လက်မှတ်မထိုးပေးတဲ့ ဖြစ်စဉ်အတော်များများ နိုင်ငံတစ်ဝန်းမှာ ဖြစ်ပွားခဲ့ပါတယ်။ ဒါ့ပြင် ပြည်ခိုင်ဖြိုးပါတီဝင်တွေက အင်န်အယ်လ်ဒီအစိုးရဟာ ရွေးကောက်ပွဲမှာသူအသာရအောင် စီမံခဲ့ကြောင်းစွပ်စွဲထားပြီး တပ်မတော်အကူအညီနဲ့ ရွေးကောက်ပွဲပြန်လည်ကျင်းပဖို့ တောင်းဆိုခဲ့ပါတယ်။ တပ်မတော်ဘက်ကတော့ ဒီတောင်းဆိုချက်ကို တုံ့ပြန်ခြင်းလည်း မပြုသလို၊ လိုက်လျောခြင်းလည်း မရှိခဲ့ပါဘူး။

ဦးကျော်ကျော်ဝင်းကတော့ ပြည်ခိုင်ဖြိုးပါတီဝင်တွေရဲ့ စွပ်စွဲချက်တွေနဲ့ပတ်သက်လို့ စိတ်မပူကြောင်းဆိုပါတယ်။ ဒါ့ပြင် ဒီလိုကိစ္စကို ပြည်ထောင်စုရွေးကောက်ပွဲကော်မရှင်ကို တိုက်ရိုက်တင်ပြသင့်ကြောင်းလည်း သူကပြောပါတယ်။ သူတို့လိုကော်မရှင်အဖွဲ့ခွဲတွေဟာ ဘယ်ပါတီကိုမှဘက်လိုက်မှုမရှိဘဲ ရွေးကောက်ပွဲကို စီမံခန့်ခွဲခဲ့တာဖြစ်တယ်လို့လည်း ဦးကျော်ကျော်ဝင်းက ကာကွယ်ပြောဆိုသွားပါတယ်။

ပြည်သူ့ရှေ့ဆောင်ပါတီက အောက်တိုဘာ၂၇ရက်တွင် ပြုလုပ်ခဲ့သည့် လှူဒါန်းမှုတစ်ခုတွင် လာရောက်စုဝေးနေသည့် မရမ်းကုန်းမြို့နယ်ရှိ ဒေသခံများကို မြင်တွေ့ရစဉ်။ (ခွန်လတ် | ဖရွန်းတီးယားမြန်မာ)

မရမ်းကုန်းတွင် ကိုဗစ်ကာလမဲဆွယ်ရေးအတွက် အလှူအတန်းကို ပါတီတွေအားပြုကြ

ကိုဗစ်ကာလအတွင်း မဲဆွယ်စည်းရုံးမှုများ ဆောင်ရွက်ရာတွင် နိုင်ငံရေးပါတီများသည် မရမ်းကုန်းမြို့နယ်အတွင်း ပရဟိတခေါင်းစဉ်အောက်က လှူဒါန်းမှုများဖြင့် မဲဆန္ဒရှင်များကို စည်းရုံးလျက်ရှိသည်။

ဖရွန်းတီးယားမြန်မာက လာမဲ့ရွေးကောက်ပွဲအတွက် မြို့နယ်ငါးခုကိုရွေးချယ်ထားပြီး အဲဒီမဲဆန္ဒနယ်တွေမှာ ဖြစ်ပေါ်နေတဲ့ ရွေးကောက်ပွဲအကြိုကာလ အခြေအနေတွေ၊ ဒေသခံတွေရဲ့ မျှော်လင့်ချက်တွေ၊ နိုင်ငံရေးပါတီတွေရဲ့ မဲဆွယ်မှု၊ မဲပေးမှုနဲ့ ရွေးကောက်ပွဲအနိုင်အရှုံးကြေညာမှု စတဲ့အကြောင်းအရာတွေကို တင်ဆက်ပေးသွားမှာဖြစ်ပါတယ်။ အဲဒီမြို့နယ်ငါးခုကတော့ ဘောလခဲ၊ မြစ်ကြီးနား၊ ပျော်ဘွယ်၊​ မြောက်ဦးနဲ့ မရမ်းကုန်းမြို့နယ်တွေဖြစ်ပါတယ်။
ကောင်းဆက်နိုင် ရေးသားသည်။

ကိုဗစ်-၁၉ ဒုတိယလှိုင်းသည်  ယခုနှစ်ရွေးကောက်ပွဲတွင် နိုင်ငံရေးပါတီများ၏ မဲဆွယ်စည်းရုံးမှုများအပေါ် အကန့်အသတ်ဖြစ်ခဲ့သည်။ နေအိမ်တွင်သာနေထိုင်စေရေး စည်းမျဉ်းများကြောင့် နိုင်ငံရေးပါတီများသည် လူစု၊ လူဝေးဖြင့် ဟောပြောခြင်းများ၊ အိ်မ်တိုက်ရာရောက် မဲဆွယ်မှုများ မပြုလုပ်နိုင်ပေ။ 

ကိုဗစ်ရောဂါပျံ့နှံ့လာချိန် စက်တင်ဘာ၂၁ရက်မှစ၍ ရန်ကုန်တိုင်းဒေသကြီးအတွင်း ကိုကိုးကျွန်းမြို့နယ်မှ အပ ကျန်မြို့နယ်များအားလုံးတွင် နေအိမ်တွင်သာနေထိုင်စေရေး အမိန့်များထုတ်ပြန်ခဲ့သည်။ ထိုသို့ ထုတ်ပြန်ထားသည့် မြို့နယ်များတွင် နိုင်ငံရေးပါတီများသည် လူစုလူဝေးဖြင့် စည်းရုံးဟောပြောခြင်းနှင့် အိမ်တိုက်ရာရောက်မဲ ဆွယ်ခြင်းများ ပြုလုပ်ခွင့်မရရာ ပါတီသစ်အများအပြား ရုန်းကန်ခဲ့ရသည်။ မရမ်းကုန်းမြို့နယ်မှာမူ ပိုးတွေ့လူနာများ များပြားခဲ့သော စက်တင်ဘာ၉ရက်မှပင် Stay At Home အမိန့်များအောက် ကျရောက်ခဲ့သည်။ 

လာမည့်ရွေးကောက်ပွဲတွင်  မရမ်းကုန်းမြို့နယ်၌ ပြည်သူ့လွှတ်တော်၊ တိုင်းဒေသကြီးလွှတ်တော် နှစ်နေရာနှင့် အမျိုးသားလွှတ်တော်မဲဆန္ဒနယ်(၁၁)တို့အတွက် အမျိုးသားဒီမိုကရေစီအဖွဲ့ချုပ်ပါတီ၊ ပြည်ထောင်စု ကြံ့ခိုင်ရေးနှင့် ဖွံဖြိုးရေးပါတီ၊ ပြည်သူ့ရှေ့ဆောင်ပါတီနှင့် ပြည်ထောင်စုကောင်းကျိုးဆောင်ပါတီတို့ အပါအဝင် ပါတီပေါင်း ခုနှစ်ခုမှ ကိုယ်စာလှယ်လောင်း ၂၃ ဦး ဝင်ရောက်ယှဉ်ပြိုင်မည်ဖြစ်သည်။ 

စည်းရုံးဟောပြောခွင့်မရသောအခါ မဲဆွယ်ကာလအတွင်း ပါတီများသည် ကိုဗစ်ကာကွယ်ရေးနှင့် အခြေခံလူတန်းစားများကို လှူဒါန်းထောက်ပံ့ခြင်းများကို ဆက်တိုက်ပြုလုပ်လာကြသည်။ 

ကျောက်မျက်ရတနာလုပ်ငန်းရှင် ဒေါက်တာသက်သက်ခိုင်၏  ပြည်သူ့ရှေ့ဆောင်ပါတီသည် ရွေးကောက်ပွဲ မဲဆွယ်ကာလ စက်တင်ဘာ၈ရက်မတိုင်ခင်ကပင် မရမ်းကုန်းမြို့နယ်အတွင်း ကိုဗစ်ကာလ ကျပ်တည်း နေသူများကို ဆန်၊ ဆီများ ထောက်ပံ့ခဲ့သည်။

လိုအပ်နေသူများကို ထောက်ပံ့ခြင်းဖြစ်ပြီး ရွေးကောက်ပွဲ ဥပဒေများနှင့် ငြိစွန်းခြင်းမရှိကြောင်း မရမ်းကုန်းပြည်သူ့လွှတ်တော်ကိုယ်စားလှယ်လောင်းအဖြစ်ဝင်ရောက်ယှဉ်ပြိုင်မည့် ဒေါက်တာသက်သက်ခိုင်က ဖရွန်းတီးယားမြန်မာသို့ ပြောသည်။

မဲဆွယ်ကာလကြာရှည်လာသည်နှင့်အမျှ ပြည်သူ့ရှေ့ဆောင်ပါတီ (ပီသုံးလုံး)၏ လှူဒါန်းထောက်ပံ့မှုများက ခပ်စိတ်စိတ်ဖြစ်လာသည်။ ပီသုံးလုံးပါတီသည် ကိုဗစ်-၁၉ ကူးစက်မှုနှုန်းပိုမိုများပြားလာသည့်  စက်တင်ဘာလကုန်ပိုင်းမှစ၍ ရပ်ကွက်အများအပြားတွင် ပိုးသတ်ဆေးများ ဖြန်းခြင်း၊ ဆန်များ စျေးလျှော့ရောင်းခြင်း၊ အလှူရှင်များနှင့် ပူးပေါင်း၍ သက်ကြီးရွယ်အိုများနှင့် လက်လုပ်လက်စား မိသားစုများကို ဆန်၊ ဆီ စသဖြင့် စားသောက်ကုန်များ ထောက်ပံ့ခဲ့သည်။

“ဒါတွေက မဲဆွယ်တာမဟုတ်ပါဘူး။ လိုအပ်နေတဲ့လူတွေကို ကူညီတာပါ”ဟု ဒေါ်သက်သက်ခိုင်ကပြောသည်။

သို့သော်  ၎င်းနှင့် ပီသုံးလုံးပါတီဝင်များသည် အဆိုပါထောက်ပံ့ပေးအပ်ပွဲများတွင် ပါတီ ယူနီဖောင်းများကို ဝတ်ဆင်ထားကြသည်။

ပါတီဥက္ကဋ္ဌဒေါ်သက်သက်ခိုင်ကိုယ် ဦးဆောင်၍ ပြည်သူ့ရှေ့ဆောင်ပါတီက အောက်တိုဘာလ စတုတ္ထပတ်အတွင်း မရမ်းကုန်းမြို့နယ်အတွင်း သက်ကြီးရွယ်အိုများကို စားသောက်ဖွယ်များ လှူဒါန်းခဲ့သည်။၊ (ခွန်လတ် | ဖရွန်းတီးယားမြန်မာ)

ထောက်ပံ့မှုများကမူ အတိုင်းအတာတစ်ခုအထိ အရာထင်ခဲ့သည်ဟု ဆိုရမည်ဖြစ်သည်။ ပါတီသက်တမ်း တစ်နှစ်သာ ရှိသေးသော ပီသုံးလုံးပါတီသည် လက်ရှိအချိန်တွင် မရမ်းကုန်းမြို့နယ်၏ ရပ်ကွက်များတွင် လူသိများလာခဲ့သည်။ 

သို့သော်လည်း ယင်းအခြေအနေမှာ ဒေါ်အောင်ဆန်းစုကြည် ခေါင်းဆောင်သည့် အင်န်အယ်လ်ဒီပါတီ၏ ဩဇာလွှမ်းမိုးမှုကို ခြိမ်းခြောက်နိုင်ရန်မှာမူ အလှမ်းဝေးနေသေးကြောင်း ဒေသခံများက ဆိုသည်။

အင်န်အယ်လ်ဒီပါတီသည် ၂၀၁၅ ရွေးကောက်ပွဲတွင် လက်ရှိ မရမ်းကုန်းမြို့နယ်၏  ပြည်သူ့လွှတ်တော်၊ အမျိုးသားလွှတ်တော်နှင့် တိုင်းဒေသကြီးလွှတ်တော်နှစ်နေရာလုံးကို အနိုင်ရထားသည်။ ယခုနှစ်တွင်လည်း အနိုင်ရ ကိုယ်စားလှယ်လေးဦးဖြစ်သည့် ဒေါက်တာမေဝင်းမြင့်(ပြည်သူ့လွှတ်တော်)၊ ဦးဘမျိုးသိန်း(အမျိူးသား)၊ ဦးရန်ရှင်း(တိုင်းဒေသကြီး-၁)၊ ဒေါ်မိုးမိုးစုကြည်(တိုင်းဒေသကြီး-၂) တို့က အသီးသီးပြန်အရွေးခံမည်ဖြစ်သည်။ အထူးသဖြင့်  ဒေါက်တာမေဝင်းမြင့်သည် မရမ်းကုန်းမြို့နယ်၊ ပြည်သူ့လွှတ်တော်မဲဆန္ဒနယ်ကို ၂၀၁၂ ကြားဖြတ်ရွေးကောက်ပွဲမှစ၍ အနိုင်ရထားခဲ့သူဖြစ်သည်။

အာဏာရအင်န်အယ်လ်ဒီပါတီ၏ မရမ်းကုန်းကိုယ်စားလှယ်လောင်းများသည် လူစု၊ လူဝေးဟောပြောမှုများ၊ စီတန်းလှည့်လည်ခြင်းများ မလုပ်ကြပါ။  ယခုလဆန်းပိုင်းတွင် ပါတီ အမှတ်တံဆိပ်ပါထီးများကို ဆိုက်ကားသမားများကို လိုက်လံဝေငှခဲ့သည်။ 

လွှတ်တော်ကိုယ်စားလှယ်များသည် ကိုဗစ်ရောဂါ ဒုတိယလှိုင်းရန်ကုန်တွင် စတင်ပျံ့နှံ့ချိန်မှစ၍ မရမ်းကုန်းမြို့နယ်အတွင်း  ကိုဗစ်ကာကွယ်ရေးလုပ်ငန်းများနှင့် ထောက်ပံ့မှုများတွင် ဦးဆောင်ပါဝင်ခဲ့ကြသည်။ သို့သော် ရွေးကောက်ပွဲ နီးလာသည်နှင့်အမျှ ကိုဗစ်-၁၉ကာကွယ်ရေးနှင့် အခြေခံလူတန်းစားများကို ထောက်ပံ့လှူဒါန်းခြင်းများကို လုပ်ဆောင်ခဲ့ကြသည်။ 

လက်ရှိ ကိုယ်စားလှယ်တစ်ဦးအနေဖြင့် ကိုဗစ်ကာလ ထောက်ပံ့ကူညီမှုများဖြစ်သည့် အခြေခံလူတန်းစား များကို ဆန်နှင့် စားနပ်ရိက္ခာများ ဝေခြင်း၊ အသွားအလာလုံးဝကန့်သတ်ထားသည့် Lockdown ချထားသောနေအိမ်များနှင့် ကွာရန်တင်းစင်တာ များသို့ သွားရောက် ထောက်ပံ့မှုများ ပြုလုပ်လျက်ရှိကြောင်း ဦးရန်ရှင်းက ဖရွန်းတီးယားမြန်မာသို့ အောက်တိုဘာလအတွင်းက ပြောဆိုခဲ့သည်။

“နိုင်ငံတော်က ချမှတ်ထားတဲ့ ကိုဗစ် စည်းကမ်းတွေနဲ့ အညီပဲဆောင်ရွက်နေတယ်”ဟု မဲဆွယ်စည်းရုံးရေးနှင့်ပတ်သက်၍ ဦးရန်ရှင်းကပြောသည်။

အနိုင်ရခဲ့ပါက ဆောင်ရွက်ပေးမည့် ကတိကဝတ်များနှင့် ပတ်သက်၍ အင်န်အယ်လ်ဒီပါတီ ကိုယ်စားလှယ်လောင်းများကို မေးမြန်းရာတွင်  ပါတီကဖြေဆိုခွင့်မပြုထားသောကြောင့် နိုဝင်ဘာ၈ရက် နောက်ပိုင်းမှသာ ပြန်လည်ဆက်သွယ်ရန် ၎င်းတို့ကဆိုသည်။

ပြည်ခိုင်ဖြိုးပါတီကလည်း နှာခေါင်းစည်းနှင့် စည်းရုံးရေးလက်ကမ်းစာစောင်များ မရမ်းကုန်းမြို့နယ်အတွင်း လိုက်လံဝေငှခဲ့သည်။ 

“အောက်တိုဘာ ဒုတိယအပတ်တုန်းကတော့ ပြည်ခိုင်ဖြိုးကလည်း လာဝေသွားတယ်”ဟု အမှတ်(၄)ရပ်ကွက်နေ အသက်၅၀ရှိပြီဖြစ်သည့် ဒေါ်ခင်အေးက ပြောသည်။ 

သို့သော် ၎င်းတို့ရပ်ကွက်အတွင်း လာရောက်ထောက်ပံ့မှုအများဆုံးမှာမူ  ပီသုံးလုံးနှင့် အင်န်အယ်လ်ဒီစသည့် ပါတီနှစ်ခုသာ ဖြစ်ကြောင်း ၎င်းကဆိုသည်။

ပါတီများနှင့် ကိုယ်စားလှယ်လောင်းများက ထောက်ပံ့မှုများမှာ မဲဆွယ်စည်းရုံးဆင်းခြင်းနှင့် မသက်ဆိုင်ဟု ပြောဆိုသည့်တိုင် မရမ်းကုန်းမဲဆန္ဒရှင်မျာအများစုကမူ မဲဆွယ်သည့်သဘောဖြင့် ပေးကမ်းခြင်းဖြစ်သည်ဟု နားလည်ထားကြသည်။

ပြည်သူ့ရှေ့ဆောင်ပါတီက ထောက်ပံ့သည့် စားသောက်ကုန်ပစ္စည်းများကို လက်ခံယူနေသည့် မရမ်းကုန်းမြို့ခံ သက်ကြီးရွယ်အိုနှစ်ဦးကို အောက်တိုဘာ၂၇ရက်တွင် မြင်တွေ့ရစဉ်။ (ခွန်လတ် | ဖရွန်းတီးယားမြန်မာ)

မရမ်းကုန်းမြို့နယ်၊ အမှတ်(၃)ရပ်ကွက်တွင် နေထိုင်သည့် ကိုကံသာဟိန်းသည် ပါတီများက အခြေခံလူတန်းစားများအား ပစ္စည်းများထာက်ပံ့ပေးခြင်းမှာ  မဲဆွယ်ခြင်းမဟုတ်ဆိုသော  နိုင်ငံရေးပါတီများ၏ ပြောဆိုချက်ကိုမူ လက်ခံပေ။

“ကမ်ပိန်းမဟုတ်ဘဲ လှူတာဆိုရင် ပါတီအင်္ကျီ၊ အလံတွေမဝတ်ဘဲ ရိုရိုးတန်းတန်းလှူလေ။ ဘယ်ပါတီကတော့ဖြင့် ဆန်တွေဝေတယ်။ ဆီတွေဝေတယ်ဆိုတာ ပရဟိတနဲ့ရောပြီး နာမည်ယူတာ။ မဲဆွယ်တာပါ”ဟု ၎င်းကပြောသည်။ 

သို့တိုင် ပါတီများက မဲဆွယ်မှုကို အကြောင်းပြ၍ ယင်းသို့လှူဒါန်းသည့်အပေါ် ၎င်းကအကောင်းမြင်သည်။

“ဘာပဲပြောပြော ကိုဗစ်ကာလ ကျပ်တည်းတဲ့အချိန်မှာ အခုလိုမျိုးတွေဝေတာက လက်လုပ်လက်စားတွေ၊ အဆင်မပြေတဲ့သူတွေအတွက် ကောင်းပါတယ်”ဟု ၎င်းကပြောသည်။

မရမ်းကုန်းမြို့နယ်အတွက်  အွန်လိုင်းမှ မဲဆွယ်စည်းရုံးရာတွင်လည်း အင်န်အယ်လ်ဒီနှင့် ပီသုံးလုံး ပါတီတို့ကသာ  လူမှုကွန်ရက်စာမျက်နှာများတွင် လှုပ်ရှားမှုအများဆုံးဖြစ်သည်။

ဒေါ်သက်သက်ခိုင်သည် အောက်တိုဘာ၁၄ရက်တွင် အွန်လိုင်းရုပ်သံဆွေးနွေးပွဲတစ်ခုကတစ်ဆင့် မရမ်းကုန်းမြို့နေ လူထုနှင့် တွေ့ဆုံခဲ့သည်ကို ၎င်း၏ လူမှုကွန်ရက်စာမျက်နှာက ပြန်လည်ထုတ်လွှင့်ခဲ့သည်။ အဆိုပါတွေ့ဆုံမှုတွင်  ၎င်းက ပါတီ၏ ရွေးကောက်ပွဲကြေညာစာတမ်းကို ကိုးကား၍ ဒီမိုကရေစီ၊ ဖက်ဒရယ်ရေးရာနှင့် အလုပ်အကိုင်မူဝါဒများနှင့် ရွေးကောက်ပွဲကတိကဝတ်များအကြောင်း ဆွေးနွေးခဲ့သည်။

“ပါတီတွေအနေနဲ့ အလုပ်လုပ်ပိုင်ခွင့်ရရင် ပြောတဲ့အတိုင်းလုပ်လား စောင့်ကြည့်ရမယ်။ လုပ်တယ်ဆို မဲဆက်ပေးဖို့ လိုတယ်။ မလုပ်ရင်တော့ နောက်တစ်ခါပေးဖို့ စဉ်းစားရမယ်”ဟု ၎င်းက ပြောဆိုခဲ့သည်။ 

ရွေးကောက်ပွဲနေ့မတိုင်ခင်အထိ မဲဆွယ်ကာလအတွင်း မဲဆန္ဒရှင်များနှင့် အွန်လိုင်းမှတွေ့ဆုံမှုများကို ပုံမှန်ပြုလုပ်သွား မည်ဟုလည်း ၎င်းကဆိုသည်။

Daw Thet Thet Khine, Chairperson of People’s Pioneer Party talk to Frontier on 26 August 2020
ဒေါ်သက်သက်ခိုင်သည် ဩဂုတ်လအတွင်းက ဖရွန်းတီးယားမြန်မာကို တွေ့ဆုံ၍ ရွေးကောက်ပွဲနှင့်သက်ဆိုသည့် ကိစ္စရပ်များကို ပြောဆိုဆွေးနွေးခဲ့သည်။ (သူရဇော် | ဖရွန်းတီးယားမြန်မာ)

ယခုနှစ်ရွေးကောက်ပွဲတွင်လည်း ထပ်မံအနိုင်ရရန် ရေပန်းစားနေသည့်  အင်န်အယ်လ်ဒီပါတီ ကိုယ်စားလှယ်လောင်း ဒေါက်တာမေဝင်းမြင့်ကလည်း မဲဆန္ဒရှင်များအပေါ် ပေးသည့် ကတိစကားကို ၎င်း၏ လူမှုကွန်ရက်စာမျက်နှာကတစ်ဆင့် ထုတ်ပြန်ခဲ့သည်။

တိုင်းရင်းသားအရေး၊  ပြည်တွင်းငြိမ်းချမ်းရေး၊ စစ်မှန်သော ဒီမိုကရေစီဖက်ဒရယ် ပြည်ထောင်စု ဖြစ်ထွန်းစေ မည့် အခြေခံဥပဒေပေါ်ပေါက်ရေးစသည်တို့ကို လုပ်ဆောင်သွားမည်ဟု အင်န်အယ်လ်ဒီပါတီ၏ ၂၀၂၀ ရွေးကောက်ပွဲကြေညာစာတမ်းကို ကိုးကား၍ ၎င်းကဆိုသည်။

ပါတီနှစ်ခုစလုံးမှ ကိုယ်စားလှယ်လောင်းများ၏ ဖေ့စ်ဘွတ်ခ်စာမျက်နှာများတွင် ထီးနှင့် နှာခေါင်းစည်များ ဝေပေးခြင်း၊ စားနပ်ရိက္ခာများထောက်ပံ့ခြင်း၊ ကိုဗစ်ကာလတွင် Lockdown ပိတ်မိနေသည့် အိမ်များ၊ ကွာရန်တင်းစင်တာများသို့ သွားရောက်လှူဒါန်းသည့် ပုံရိပ်များကသာ အဓိကနေရာယူထားသည်။ 

မဲဆွယ်စည်းရုံးရေးလှုပ်ရှားမှုများ၏ အခြားတစ်ဘက်တွင်မူ မြို့နယ်ရွေးကောက်ပွဲကော်မရှင်အဖွဲ့ခွဲများသည်  ကိုဗစ်-၁၉ကာလအတွင်း ရွေးကောက်ပွဲကျင်းပနိုင်ရေးအတွက် လုံးပမ်းနေကြရသည်။ 

မရမ်းကုန်းမြို့နယ်ရွေးကောက်ပွဲကော်မရှင်အဖွဲ့ခွဲသည် မဲရုံများကို စာသင်ကျောင်းများတွင် ပြုလုပ်ရန် သတ်မှတ်ထား ခဲ့သည်။ ထိုသို့သတ်မှတ်ထားရာတွင် အမှတ်(၂)ရပ်ကွက်အတွက် မဲရုံခြောက်ရုံ ထားရှိမည့်  အ.ထ.က(၁)မရမ်းကုန်း (အထက်တန်းကျောင်း)မှာ ယခုအခါ ကွာရန်တင်းစင်တာဖြစ်နေသည်။ ထို့ကြောင့် ယင်းမဲရုံများကို မူလသတ်မှတ်ထားရာ နေရာနှင့်သိပ်မဝေးသည့်  ပေါ်တော်မူဘုရားဝင်းအတွင်းနှင့် အနီးနားသို့ပြောင်း ရွှေ့ခဲ့ရသည်။ 

အနောက်ပိုင်းခရိုင်ရွေးကောက်ပွဲကော်မရှင်၏ အဆိုအရ မရမ်းကုန်းတွင် မဲရုံ၁၂၁ခုရှိရာ ၁၈ခုကို နေရာပြောင်းရွှေ့ ဖွင့်လှစ်ခဲ့ရသည်။ ယင်းတို့အနက် ကိုးခုမှာ ကွာရန်တင်းစင်တာများအဖြစ် အသုံးပြုထားသော ကျောင်းဆောင်များဖြစ်သောကြောင့် ပြောင်းရွှေ့ရခြင်းဖြစ်သည်။

ထို့ပြင် ကော်မရှင်ဝန်ထမ်းများအဖို့ ရက်ပိုင်းအတွင်းရောက်လာတော့မည့် သက်ကြီးရွယ်အိုများနှင့် Lockdown မိနေသူများ ကြိုတင်မဲပေးနိုင်ရေးအတွက် စာရင်းများမှာလည်း အရေးပေါ်ဆောင်ရွက်နေရရာ လူအင်အားမလောက်ငှသည့် ပြဿနာများနှင့် ရင်ဆိုင်နေရသည်။ ပြည်ထောင်စုရွေးကောက်ပွဲကော်မရှင်၏ ကြေညာချက်အရ အသက်၆၀နှစ်နှင့်အထက် မဲဆန္ဒရှင်များသည် အောက်တိုဘာ၂၉ရက်မှ စတင်၍ ကြိုတင်မဲပေးနေကြပြီဖြစ်ပြီး နိုဝင်ဘာ၅ရက်တွင် အဆုံးသတ်မည်ဖြစ်သည်။

“အဲဒါတွေကို  ကွန်ပြူတာနဲ့ စာရင်းသွင်းဖို့ အပြင်ကနေ လူငှားထားရတယ်”ဟု မရမ်းကုန်းမြို့နယ် ကော်မရှင် ဥက္ကဋ္ဌ ဦးကျော်ကျော်ဝင်းကပြောသည်။

နိုင်ငံရေးပါတီများက ဆိုက်ထူထားသည့် မရမ်းကုန်းမြို့နယ်အတွင်းက ရွေးကောက်ပွဲကြော်ငြာဆိုင်းဘုတ်များကို မြင်တွေ့ရစဉ်။ (ခွန်လတ် | ဖရွန်းတီးယားမြန်မာ)

ကျန်းမာရေးနှင့် အားကစားဝန်ကြီးဌာနသည် ယခုနှစ် မဲသွားထည့်ရာတွင် ကိုဗစ်ရောဂါကူးစက်မှုကို ကာကွယ်နိုင်ရန် လူဦးရေများပြားသည့်မဲရုံများတွင် အုပ်စုနှစ်စုခွဲ၍ မဲပေးစေကာ၊ မဲရုံများတွင် ကိုယ်အပူချိန် တိုင်းတာခြင်း၊ လက်ဆေးခြင်းနှင့် နှာခေါင်းစည်းများကို ဖြန့်ဝေခြင်းစသည့် ကာကွယ်ရေးအစီအမံများ ဆောင်ရွက်မည်ဖြစ်သည်။

“ညွှန်ကြားချက်တွေအတိုင်းအားလုံးလုပ်ထားတယ်။ အားလုံးအဆင်ပြေပြေပြီးသွားမှာပါ”ဟု ဦးကျော်ကျော်ဝင်းက ပြောဆိုသည်။ 

ကျန်းမာရေးဝန်ကြီးဌာန၏ ထုတ်ပြန်ချက်အရ မရမ်းကုန်းမြို့နယ်တွင် ကိုဗစ်-၁၉ ရောဂါအတည်ပြုလူနာတွေ့ရှိခဲ့မှုမှာ အောက်တိုဘာ၂၅ရက်တွင် ၁,၄၆၀ဦးခန့်ရှိပြီး ရောဂါတွေ့ရှိသူဦးရေမှာ ဆက်လက်တိုးမြင့်နေသည်။

ဖရွန်းတီးယားမြန်မာက တွေ့ဆုံမေးမြန်းခဲ့သော မရမ်းကုန်းရှိ မဲဆန္ဒရှင်များသည် ကိုဗစ်-၁၉ရောဂါ ကူးစက်ခံရမည်ကို ကြောက်ရွံ့ကြသော်လည်း ရွေးကောက်ပွဲတွင် မပျက်မကွက် မဲထည့်လိုကြောင်း ဖွင့်ဟဖော်ထုတ်ကြသည်။

အမှတ်(၃)ရပ်ကွက်၊ ရွှေညောင်ပင်လမ်းတွင်နေထိုင်သည့် အသက်၄၀ရှိပြီဖြစ်သည့် မအေးအေးစန်းသည် ၎င်း၏နေအိမ်မှ မလှမ်းမကမ်းရှိ မိသားစုတစ်ခုတွင် တစ်အိမ်လုံး ကိုဗစ်-၁၉ကူးစက်ခံရပြီး သက်ကြီးရွယ်အိုတစ်ဦးနှင့် ကလေးငယ်တစ်ဦး သေဆုံးခဲ့သည်။ သို့တိုင် ရွေးကောက်ပွဲတွင် မဲပေးဖြစ်အောင် ပေးမည်ဟု ၎င်းကဆိုသည်။

“ကူးတာက မဲထည့်မှမဟုတ်ဘူး။ တခြားအကြောင်းကိစ္စတွေနဲ့လည်း ကူးနိုင်တာပဲ။ လမ်းညွှန်ချက်တွေအတိုင်း လုပ်ရင် ကူးစက်နိုင်မှုကိုလျှော့ချနိုင်တယ်”ဟု ၎င်းကပြောသည်။

ယခုနှစ်တွင်လည်း ၂၀၁၅တုန်းက ကဲ့သို့ပင် အင်န်အယ်လ်ဒီပါတီကိုသာ မဲထည့်မည်ဟု ၎င်းက ဝမ်းသာအားရပြောဆိုသည်။

“မဲသွားမထည့်လို့ အရင်လိုစနစ်ကြီးဖြစ်သွားရင် ဒုက္ခရောက်လိမ့်မယ်။  အဲဒါကို ပိုကြောက်တာ”ဟု မအေးအေးစန်းကပြောသည်။

ပြည်သူ့ရှေ့ဆောင်ပါတီတံဆိပ်ပါ တီရှပ်နှင့်ဦးထုပ်ကို ဝတ်ဆင်ထားသော မရမ်းကုန်းမြို့နယ်အတွင်းက အနှေးယာဉ်လုပ်သားတစ်ဦးကို ဩဂုတ်လအတွင်းက မြင်တွေ့ရစဉ်။ (သူရဇော် | ဖရွန်းတီးယားမြန်မာ)

မရမ်းကုန်းမှာ အင်န်အယ်လ်ဒီကို ကျန်ပါတီတွေ အနိုင်ယူနိုင်မလား

လာမည့်ရွေးကောက်ပွဲတွင် မရမ်းကုန်းမဲဆန္ဒနယ်တွင် အင်န်အယ်လ်ဒီပါတီကို အနိုင်ယူရေးမှာ ၎င်းကိုယှဉ်ပြိုင်မည့်ပါတီများအဖို့ ကြီးမားသောစိန်ခေါ်မှုဖြစ်သည်။

ဖရွန်းတီးယားမြန်မာက လာမဲ့ရွေးကောက်ပွဲအတွက် မြို့နယ်ငါးခုကိုရွေးချယ်ထားပြီး အဲဒီမဲဆန္ဒနယ်တွေမှာ ဖြစ်ပေါ်နေတဲ့ ရွေးကောက်ပွဲအကြိုကာလ အခြေအနေတွေ၊ ဒေသခံတွေရဲ့ မျှော်လင့်ချက်တွေ၊ နိုင်ငံရေးပါတီတွေရဲ့ မဲဆွယ်မှု၊ မဲပေးမှုနဲ့ ရွေးကောက်ပွဲအနိုင်အရှုံးကြေညာမှု စတဲ့အကြောင်းအရာတွေကို တင်ဆက်ပေးသွားမှာဖြစ်ပါတယ်။ အဲဒီမြို့နယ်ငါးခုကတော့ ဘောလခဲ၊ မြစ်ကြီးနား၊ ပျော်ဘွယ်၊​ မြောက်ဦးနဲ့ မရမ်းကုန်းမြို့နယ်တွေဖြစ်ပါတယ်။
ရဲမွန် ရေးသားသည်။

ကိုဗစ်-၁၉ဒုတိယလှိုင်း ပြင်းထန်စွာခံစားရသည့် ရန်ကုန်တိုင်းဒေသကြီးအတွင်း လူဦးရေ ၁၉၀,၀၀၀ခန့်ရှိသည့် မရမ်းကုန်းမြို့နယ်က မဲဆန္ဒရှင်များအဖို့ ရွေးကောက်ပွဲနီးကပ်လာပြီး ကိုဗစ်-၁၉ ပိုးတွေ့လူနာများ ဆက်လက်မြင့်တက်နေသည့် လက်ရှိအချိန်တွင် ဒွိဟဖြစ်ဖွယ်ခံစားချက်တစ်ခုရှိနေသည်။

အထူးသဖြင့် ကူးစက်မှုနှုန်းမြင့်မားပြီး ကိုဗစ်-၁၉ ဒုတိယလှိုင်းပုတ်သည့်ဒဏ်ကို အလူးအလဲခံစားနေရသည့် ရန်ကုန်အတွင်းက မဲဆန္ဒရှင်အများစုသည် ရွေးကောက်ပွဲနေ့တွင် မဲလည်းပေးချင်သည်။ သို့သော် ကိုဗစ်-၁၉ ကူးစက်ခံရမည်ကိုလည်း စိုးရိမ်လျက်ရှိကြသည်။ “ကိုဗစ်-၁၉ကပ်ရောဂါကြောင့် မဲပေးရာတွင် ဘေးကင်းပါ့မလား” ဟူသည်က ၎င်းတို့၏ အဓိက စိုးရိမ်စိတ်ဖြစ်သည်။

ငါးနှစ်တွင်သာ တစ်ကြိမ်ကျင်းပသည့် ရွေးကောက်ပွဲတွင် မိမိ၏မြို့နယ်ကို ပို၍တိုးတက်ကောင်းမွန်အောင် ဆောင်ရွက်ပေးမည့် လွှတ်တော်ကိုယ်စားလှယ်လောင်းကို လာမည့်နိုဝင်ဘာ၈ရက်တွင် မဲပေးရမည်ဖြစ်သည်။ သို့ဖြစ်ရာ မဲမပေးလို့ကလည်း မဖြစ်သည့် အခြေအနေဖြစ်သည်။

Thibi အဖွဲ့က ဖန်တီးရေးဆွဲထားခြင်းဖြစ်သည်။

အထွေထွေရွေးကောက်ပွဲပြုလုပ်ရန် ရက်ပေါင်း၃၀ကျော်သာ လိုတော့သည့်အချိန်တွင် မရမ်းကုန်းမြို့နယ်အတွင်း အောက်တိုဘာ၂ရက်အထိ ကိုဗစ်-၁၉အတည်ပြုလူနာဦးရေ ၃၄၂ဦးအထိ ရှိနေသည်။ နေ့စဉ်ကျန်းမာရေးဝန်ကြီးဌာန၏ ထုတ်ပြန်ချက်များအရ လူနာသစ်ဦးရေသည် လျော့နည်းသွားခြင်းမရှိဘဲ ဆက်လက်မြင့်တက်လျက်ရှိသည်။

ဖရွန်းတီးယားမြန်မာသည် မရမ်းကုန်းမြို့နယ်က မဲဆန္ဒရှင်အချို့ကို သြဂုတ်လအတွင်းက တစ်ကြိမ်နှင့် အောက်တိုဘာ၂ရက်တွင် တစ်ကြိမ်၊ စုစုပေါင်း နှစ်ကြိမ်တိုင်တိုင်ဆက်သွယ်၍ ကိုဗစ်-၁၉ကာလအတွင်း မဲပေးရမည့်အခြေအနေအပေါ် ၎င်းတို့၏ အမြင်များကို မေးမြန်းခဲ့သည်။ လူအနည်းငယ်ကလွဲ၍ လူများစုက လာမည့်နိုဝင်ဘာ၈ရက်တွင် မဲပေးမည်ဟု ဖြေဆိုကြသည်။

ရွေးကောက်ပွဲတွင် မဲပေးမည်ဟုဆုံးဖြတ်ထားသော ဒေသခံများအနက် မော်တော်ယာဥ်အငှားလုပ်ငန်းရှင် ကိုကြည်ဝေလင်းလည်း ပါဝင်သည်။ ကျန်းမာရေးဝန်ကြီးဌာန၏ လမ်းညွှန်ချက်နှင့်အညီ မဲသွားပေးမည်ဆိုပါက ရောဂါကူးစက်ခံရမည်ကို စိုးရိမ်စရာမရှိဟု ၎င်းကဆိုသည်။

“၂၀၁၅ရွေးကောက်ပွဲကတည်းက မဲပေးပြီဆိုရင် လူတွေအုံပြီး မဲပေးခဲ့ကြတာမှ မဟုတ်တာ။ အခုလည်း လူမအုံလာအောင် စနစ်တကျသတ်မှတ်လိုက်ရင် အဆင်ပြေမယ်ထင်ပါတယ်။ မဲပေးမဲ့ လူတစ်ဦးချင်းစီက ကျန်းမာရေးလမ်းညွှန်ချက်နဲ့အညီ လုပ်ဖို့ပဲလိုပါတယ်”ဟု မရမ်းကုန်းမြို့နယ်၊ အမှတ်(၃)ရပ်ကွက်တွင်နေထိုင်သူ ကိုကြည်ဝေလင်းက ပြောသည်။

အမှတ်(၁)ရပ်ကွက်တွင် နေထိုင်သော အသက်၂၂နှစ်အရွယ်ရှိ မနွယ်နွယ်သည် မဲသွားပေးသည့်အချိန်တွင် ရောဂါကူးစက်ခံရမည်ကို စိုးရိမ်သည်။ သို့သော် ၎င်း၏ ဘဝတွင် ပထမဦးဆုံးအကြိမ် ဆန္ဒမဲပေးရမည်ဖြစ်သဖြင့် မဖြစ်မနေသွားရောက်မဲပေးမည်ဟု ဆိုသည်။

“အရင်ရွေးကောက်ပွဲတွေတုန်းကလည်း အသက်မပြည့်သေးလို့ မဲမပေးခဲ့ရဘူး။ အခုပေးရတော့မယ်ဆိုတဲ့အချိန်ရောက်တော့ ကိုဗစ်က ထဖြစ်တယ်။ တာဝန်ရှိသူတွေကတော့ အန္တရာယ်မဖြစ်အောင် စီစဥ်ပေးမယ်လို့တော့ထင်ပါတယ်။ မဲသွားပေးဖို့တော့ ဆုံးဖြတ်ထားတယ်”ဟု ၎င်းကပြောသည်။

မရမ်းကုန်းမြို့နယ်တွင်နေထိုင်ပြီး ပရဟိတလှုပ်ရှားမှုများတွင်ပါဝင်သူ ကိုမိုးဇော်အောင်ကို မြင်တွေ့ရစဉ်။
(သူရဇော် | ဖရွန်းတီးယားမြန်မာ)

အမှတ်(၃)ရပ်ကွက်တွင်နေထိုင်ပြီး ပရဟိတလုပ်ငန်းများတွင် တက်တက်ကြွကြွပါဝင်လှုပ်ရှားသူ ကိုမိုးဇော်အောင်ကမူ ရွေးကောက်ပွဲတွင် မဲပေးရမည့်ပါတီကို ဆုံးဖြတ်ထားပြီးဖြစ်သော်လည်း ကျန်းမာရေးထက်မည်သည့်အရာမှ အရေးကြီးသည်ဟု မထင်သောကြောင့် မဲရုံသို့ သွားရောက်၍ မဲပေးရမည်ကို လက်တွန့်နေသည်။

ပထမအကြိမ်ဆက်သွယ်မေးမြန်းစဉ်က ဒေါ်အောင်ဆန်းစုကြည်အသက်ရှင်သမျှ ကာလပတ်လုံး အင်န်အယ်လ်ဒီပါတီကို မဲပေးမည်ဟု ဖြေကြားခဲ့သော်လည်း ကိုဗစ်-၁၉ရောဂါဒုတိယလှိုင်း ပြင်းထန်ချိန် လွန်ခဲ့သည့် ရက်သတ္တပတ်တွင်မူ ၎င်း၏အဖြေက တစ်မျိုးပြောင်းသွားသည်။

“အခုရောဂါက ကိုယ်ဖြစ်ကိုယ်ခံမဟုတ်ဘူး။ ကိုယ့်ကိုကူးစက်ရင် တစ်မိသားစုလုံး ကူးကုန်မှာ။  မဲသွားပေးဖို့ ရင်းရမယ့်အရာက တအားတန်ဖိုးကြီးပါတယ်”ဟု ၎င်းကပြောသည်။

ယင်းသို့ မတူညီသော အမြင်များရှိသည့် မရမ်းကုန်းမဲဆန္ဒရှင်များထံကက မဲရယူမည့် နိုင်ငံရေးပါတီများမှ ကိုယ်စားလှယ်လောင်းဦးရေသည် ပြည်သူ့လွှတ်တော်မဲဆန္ဒနယ်အတွက် ခုနှစ်ဦးရှိသည်။ မရမ်းကုန်းပါဝင်သည့် အမျိုးသားလွှတ်တော်မဲဆန္ဒနယ်(၁၁)တွင်မူ ကိုယ်စားလှယ်လောင်း ငါးဦးဝင်ရောက် ယှဉ်ပြိုင်မည်ဖြစ်သည်။ ထို့အတူ မရမ်းကုန်းတိုင်းဒေသကြီးလွှတ်တော်မဲဆန္ဒနယ် (၁)တွင် ခြောက်ဦးနှင့် မဲဆန္ဒနယ် (၂)တွင် ငါးဦး အသီးသီး ယှဉ်ပြိုင်ကြမည်ဖြစ်သည်။

၉ဒသမ၇စတုရန်းမိုင် ကျယ်ဝန်းသည့် မရမ်းကုန်းမြို့နယ်သည် လူဦးရေထူထပ်သော လှိုင်သာယာ၊ အင်းစိန်နှင့် မင်္ဂလာဒုံမြို့နယ်စသည်တို့နှင့် နယ်နိမိတ်ချင်းထိစပ်နေပြီး စီးပွားရေးအရ အချက်အချာကျသည့် မြို့နယ်လည်းဖြစ်သည်။ ထို့ပြင် မရမ်းကုန်းမြို့နယ်အတွင်း ဂေါက်ကွင်းနှစ်ခုရှိပြီး အငြိမ်းစားတပ်မတော်အကြီးတန်းအရာရှိများနေထိုင်ရာ ကမ္ဘာအေးဗီလာအိမ်ရာလည်း တည်ရှိသည်။

မရမ်းကုန်းမြို့နယ်တွင် လာမည့်ရွေးကောက်ပွဲ၌ အမျိုးသားဒီမိုကရေစီအဖွဲ့ချုပ်သည် ယခင် ရွေးကောက်ပွဲများကဲ့သို့ ပြည်ထောင်စုကြံ့ခိုင်ရေးနှင့်ဖွံ့ဖြိုးတိုးတက်ရေးပါတီ တစ်ခုတည်းကိုသာ အဓိကထားယှဥ်ပြိုင်ရမည့် အနေအထား မဟုတ်တော့ပေ။

ပြည်ထောင်စုရွေးကောက်ပွဲကော်မရှင်ကထုတ်ပြန်သည့် ၂၀၁၅ရွေးကောက်ပွဲရလဒ်များကိုအခြေခံ၍ Thibi အဖွဲ့က ရုပ်ပုံကားချပ် ဖန်တီးထားခြင်းဖြစ်သည်။

လက်ရှိမရမ်းကုန်းမြို့နယ် ပြည်သူ့လွှတ်တော်ကိုယ်စားလှယ်နှင့် အင်န်အယ်လ်ဒီပါတီ ဗဟိုအလုပ်အမှုဆောင်ကော်မတီဝင်ဒေါ်မေဝင်းမြင့်အဖို့ လာမည့်ရွေးကောက်ပွဲတွင် အဓိကထား ယှဉ်ပြိုင်ရဖွယ်ရှိသည့် ပြိုင်ဘက်မှာ ပြည်သူ့ရှေ့ဆောင်ပါတီဥက္ကဋ္ဌဒေါ်သက်သက်ခိုင်ဖြစ်သည်။ အင်န်အယ်လ်ဒီပါတီဝင်ဟောင်း ဒေါ်သက်သက်ခိုင်သည် လက်ရှိဒဂုံမြို့နယ်ပြည်သူ့လွှတ်တော် ကိုယ်စားလှယ်လည်း ဖြစ်သည်။

မရမ်းကုန်းမြို့နယ်ပါဝင်သည့် အမျိုးသားလွှတ်တော်မဲဆန္ဒနယ်(၁၁)တွင်လည်း အန်အယ်လ်ဒီ အမတ်ဟောင်းနှင့် ပြည်သူ့ရှေ့ဆောင်ပါတီ၏ ဒုတိယဥက္ကဋ္ဌဦးကျော်ဇေယျက ဝင်ရောက်ယှဉ်ပြိုင်မည်ဖြစ်ပြီး အဆိုပါမဲဆန္ဒနယ်၏ လက်ရှိလွှတ်တော်ကိုယ်စားလှယ် ဦးဘမျိုးသိန်းနှင့် ယှဉ်ပြိုင်ရမည်ဖြစ်သည်။

မရမ်းကုန်းမြို့နယ်သည် အမျိုးသားဒီမိုကရေစီအဖွဲ့ချုပ်က အခြားနိုင်ငံရေးပါတီများထက် အားကောင်းသော်လည်း ပြည်သူ့ရှေ့ဆောင်ပါတီသည် ကိုဗစ်-၁၉ဒုတိယလှိုင်းမဖြစ်ပေါ်မီကတည်းက အဆိုပါမြို့နယ်အတွင်း ပါတီစည်းရုံးရေးလုပ်ငန်းများ အင်တိုက်အားတိုက် ဆောင်ရွက်ခဲ့သည်ကို တွေ့ရသည်။

ယင်းစည်းရုံးရေးလုပ်ငန်းများတွင် ဒေသခံများကို မျက်စိအခမဲ့စမ်းသပ်ပေးခြင်းနှင့်လိုအပ်ပါက မျက်မှန်အခမဲ့ပြုလုပ်ပေးခြင်း၊ အနှေးယာဥ်ဆိုက်ကားသမားများကို ပါတီတံဆိပ်ပါသည့် ထီး၊ အလံ၊ ဦးထုပ်နှင့် တီရှပ်များဝေငှခြင်း၊ ဆင်းရဲနွမ်းပါးသည့် အိမ်ထောင်စုများကို ဆန်နှင့်ဆီများ လှူဒါန်းခြင်း စသည်တို့ပါဝင်သည်။

“ပါတီစည်းရုံးရေးအတွက် ကုန်ကျစရိတ်တွေအကုန်လုံးက ပါတီရန်ပုံငွေထဲကပဲ သွားတာပါ။ ရွေးကောက်ပွဲစည်းရုံးရေးကာလမဟုတ်တဲ့အတွက် ရွေးကောက်ပွဲကုန်ကျစရိတ်နဲ့တော့ မသက်ဆိုင်ပါဘူး”ဟုပါတီဥက္ကဋ္ဌ ဒေါ်သက်သက်ခိုင်က ပြောသည်။ ယင်းလှုပ်ရှားမှုများသည် ကိုဗစ်-၁၉ ဒုတိယလှိုင်းစတင်သည့် ဩဂုတ်၁၆ရက်မတိုင်မီက ဖြစ်သည်ကို ၎င်းက ရည်ညွှန်းခြင်းဖြစ်သည်။

Thet Thet Khine, chairperson for the People's Pioneer Party, speaks with F on 26 August 2020
ပြည်သူ့ရှေ့ဆောင်ပါတီဥက္ကဋ္ဌဒေါ်သက်သက်ခိုင်က ဖရွန်းတီးယားမြန်မာကို ဩဂုတ်လအတွင်းက လက်ခံတွေ့ဆုံစကားပြောခဲ့စဉ်။ (သူရဇော် | ဖရွန်းတီးယားမြန်မာ)

ပါတီစည်းရုံးရေးကာလတွင် နိုင်ငံရေးပါတီများက ပေးအပ်သည့် လက်ဆောင်ပစ္စည်းများကို လက်ခံရယူကြသော်လည်း ဒေသခံများသည် ယင်းပါတီများကို မဲပေးမည်ဟု မယူဆသင့်ကြောင်း ကိုမိုးဇော်အောင်က ဆိုသည်။

“လူတွေကတော့ပေးရင်ယူမှာပဲ။ ဒါပေမဲ့ အဲဒီပါတီကို မဲထည့်မယ်ဆိုတဲ့သဘောမျိုးတော့ မဟုတ်ဘူး”ဟု ၎င်းက ပြောသည်။

လက်ရှိလွှတ်တော်ကိုယ်စားလှယ်များ၏ စွမ်းဆောင်ရည်များကို အားရကျေနပ်မှုမရှိဟု ၎င်းကဆိုသည်။ “တိုင်းဒေသကြီးလွှတ်တော်ကိုယ်စားလှယ် ဦးရန်ရှင်းဆိုလည်း ဒေသခံတွေနဲ့ တွေ့တာမရှိဘူး။ သူ့ပါတီဝင်တွေရယ်၊ အုပ်ချုပ်ရေးမှူးတွေနဲ့ပဲတွေ့နေတာ”ဟု ကိုမိုးဇော်အောင်က ပြောသည်။

အင်န်အယ်လ်ဒီပါတီ မရမ်းကုန်းတိုင်းဒေသကြီးလွှတ်တော်ကိုယ်စားလှယ် ဦးရန်ရှင်းကမူ ယင်းစွပ်စွဲချက်ကို ငြင်းဆန်ထားပြီး ၎င်းသည် ဒေသခံများနှင့်ပုံမှန်တွေ့ဆုံခဲ့ကြောင်း ဆိုသည်။

အခြားမရမ်းကုန်းမြို့နယ်က မဲဆန္ဒရှင်တစ်ဦးဖြစ်သူ မနွယ်နွယ်ကလည်း အလားတူဆိုသည်။ ၎င်းအနေဖြင့် ဒေါ်အောင်ဆန်းစုကြည်ဦးဆောင်သည့်ပါတီကိုသာ မဲပေးရန်ဆုံးဖြတ်ထားသော်လည်း လက်ရှိလွှတ်တော်ကိုယ်စားလှယ်များကို တကြိမ်တခါမျှ ရပ်ကွက်အတွင်း မတွေ့ဆုံဖူးကြောင်းနှင့် ၎င်းတို့၏အမည်ကိုပင် မသိကြောင်းပြောသည်။

“ဘယ်သူပဲနိုင်နိုင် လူငယ်တွေအတွက်လည်း အခွင့်အလမ်းတွေများအောင် လုပ်ပေးစေချင်တယ်”ဟု ၎င်းက ဆိုသည်။

မရမ်းကုန်းမြို့နယ်တွင် နှစ်စဉ်မိုးရာသီ၌ ရေကြီးရေလျှံမှုဖြစ်ပေါ်နေ၍ ယင်းပြဿနာကို လာမည့်ရွေးကောက်ပွဲကတစ်ဆင့် တက်လာသည့် လွှတ်တော်ကိုယ်စားလှယ်က ဖြေရှင်းပေးနိုင်ရန် မြို့နယ်အတွင်း နေထိုင်သူအချို့က မျှော်လင့်နေကြသည်။

အခြားလွှတ်တော်ကိုယ်စားလှယ်များအပေါ် နယ်ခံမဲဆန္ဒရှင်များ၏ စိတ်ဝင်စားမှုလျော့နည်းသော်လည်း လူအများ၏ အာရုံစိုက်ခံရသည့်လွှတ်တော်ကိုယ်စားလှယ်မှာ ဒေါ်မိုးမိုးစုကြည်ဖြစ်သည်။ ၎င်းသည် ရန်ကုန်တိုင်းဒေသကြီးအစိုးရအဖွဲ့တွင် လူဝင်မှုကြီးကြပ်ရေးနှင့် လူ့စွမ်းအားအရင်းအမြစ်ဝန်ကြီးအဖြစ် တာဝန်မထမ်းဆောင်မီ လွှတ်တော်ကိုယ်စားလှယ်ဘဝတွင် မရမ်းကုန်းဗီလာအိမ်ရာစီမံကိန်းကို ဦးဆောင်၍ ကန့်ကွက်ခဲ့သူဖြစ်သည်။

၂၀၁၅ရွေးကောက်ပွဲတွင် မဲပေးသူဦးရေ ရာခိုင်နှုန်းဖော်ပြချက်။ ပြည်ထောင်စုရွေးကောက်ပွဲကော်မရှင်၏ ထုတ်ပြန်ချက်များကို ကိုးကား၍ Thibi အဖွဲ့က ရုပ်ပုံကားချပ်ဖန်တီးရေးဆွဲထားခြင်းဖြစ်သည်။

ရန်ကုန်တိုင်းဒေသကြီးအစိုးရအဖွဲ့သည် ရင်းနှီးမြှုပ်နှံမှုပမာဏ အမေရိကန်ဒေါ်လာ၉၃သန်း တန်ဖိုးရှိသည့် မရမ်းကုန်းဗီလာအိမ်ရာစီမံကိန်းကို ၂၀၁၈-၂၁ဘဏ္ဍာနှစ်အတွက် မြို့ပြဖွံ့ဖြိုးရေးစီမံကိန်း အစိတ်အပိုင်းတစ်ခုအဖြစ် အကောင်အထည်ဖော်ရန် ၂၀၁၈၊ မေလအတွင်းက တိုင်းဒေသကြီးလွှတ်တော်သို့ တင်ပြ၍လျာထားခဲ့သည်။

စီမံကိန်းအရ မရမ်းကုန်းမြို့နယ်အတွင်းတည်ရှိသည့် ရေစုကန်သုံးခုကို မြေဖို့ပြီး အိမ်ရာဖော်ဆောင်မည်ဖြစ်သည်။ ယင်းသည် မရမ်းကုန်းမြို့နယ်အတွင်း မိုးရာသီရေကြီးရေလျှံပြဿနာကို ပိုမိုဆိုးရွားစေနိုင်၍ ဒေသခံများအကြား စိုးရိမ်မှုများ မြင့်တက်ခဲ့သည်။​

တိုင်းဒေသကြီးလွှတ်တော်ကိုယ်စားလှယ် ဦးရန်ရှင်း၏ အဆိုအရ ယင်းစီမံကိန်းသည် မစတင်ရသေးသော်လည်း အပြီးတိုင်ပယ်ဖျက်ထားသည်လည်းမဟုတ်ပေ။

ယင်းစီမံကိန်းနှင့်ပတ်သက်၍ ဒေါ်သက်သက်ခိုင်ကို မေးမြန်းကြည့်ရာ ၎င်းအနေဖြင့် မရမ်းကုန်းမြို့နယ်အတွင်း မည်သည့်အရေးကိစ္စများဖြစ်ပေါ်နေပြီး မည်သို့ဖြေရှင်းရမည်ကို လေ့လာရဦးမည်ဟု ဆိုသည်။

“ရွေးကောက်ပွဲနိုင်ဖို့ကိုပဲ အဓိကထားလုပ်နေရတာပါ။ မရမ်းကုန်းမှာ ဘာကိစ္စဖြစ်နေသလဲဆိုတာ မလေ့လာထားရသေးပါဘူး။ ကျွန်မလေ့လာရဦးမှာပါ”ဟု ၎င်းက ပြောသည်။

အင်န်အယ်လ်ဒီပါတီအပေါ် ထောက်ခံသူအများအပြားရှိနေသည့် မရမ်းကုန်းမဲဆန္ဒနယ်တွင် ဝင်ရောက်ယှဉ်ပြိုင်ပြီး လက်ရှိအမတ်များကို အနိုင်ယူရေးမှာ ပြည်သူ့ရှေ့ဆောင်ပါတီအပါအဝင် အခြားနိုင်ငံရေးပါတီများအဖို့ စိန်ခေါ်မှုကြီးတစ်ခုဖြစ်တော့သည်။

Ye Mon

Ye Mon

ရဲမွန်သည် ၂၀၁၁ ခုနှစ်တွင် ပြည်သူ့ခေတ်သတင်းဂျာနယ်၌ သတင်းထောက်အဖြစ် စတင်လုပ်ကိုင်ခဲ့သည်။ Frontier သို့ မဝင်ရောက်မီက Myanmar Times နှင့် DVB English Team တို့တွင် သတင်းထောက်အဖြစ် လုပ်ကိုင်ခဲ့သည်။

Share on facebook
Share on twitter
Share on email

Stay on top of Myanmar current affairs with our Daily Briefing and Media Monitor newsletters

Our fortnightly magazine is available in print, digital, or a combination beginning at $80 a year

Sign up for our Frontier Fridays newsletter. It’s a free weekly round-up featuring the most important events shaping Myanmar