နေပြည်တော်တွင် ရှစ်ရက်ကြာ ကျင်းပခဲ့သည့် ၂၀၁၈ အာရှကလပ် အမျိုးသားဘောလီဘောပြိုင်ပွဲ၌ အီရန်ကလပ်အသင်းက အဆင့်(၁) ရရှိခဲ့ပြီး ၂၀၁၉ ခုနှစ်၊ ကမ္ဘာ့ကလပ် အမျိုးသားဘောလီဘောပြိုင်ပွဲသို့ တက်ရောက်ယှဉ်ပြိုင်ခွင့် ရရှိသွားသည်။
အာရှနိုင်ငံ ၁၃ ခုမှ ကလပ်အသင်း ၁၃ သင်းပါဝင်ယှဉ်ပြိုင်ကြသည့် အဆိုပါပြိုင်ပွဲ၌ မြန်မာအသင်းက အဆင့် ၁၁ သာရရှိခဲ့သည်။
ပြိုင်ပွဲသို့ မြန်မာ၊ သြစတြေးလျ၊ တရုတ်၊ တရုတ် (တိုင်ပေ)၊ ဟောင်ကောင်၊ အီရန်၊ ဂျပန်၊ ကာဇတ်စတန်၊ ပါကစ္စတန်၊ သီရိလင်္ကာ၊ ထိုင်း၊ တာမင်နစ္စတန်နှင့် ဗီယက်နမ်နိုင်ငံတို့ ပါဝင်ယှဉ်ပြိုင်ခဲ့ကြသည်။
ဇူလိုင် ၃၀ ရက်နေ့က စတင်ကာ သြဂုတ် ၆ ရက်နေ့အထိ ကျင်းပသည့် ပြိုင်ပွဲ၌ အီရန်ကလပ် ကာတန် အာဒကန်အသင်းက ပွဲစဉ်သုံးခု ဆက်တိုက်အနိုင်ရရှိပြီး ပြိုင်ပွဲ၌ အဆင့် (၁) ရရှိခဲ့ခြင်းဖြစ်သည်။ ကာဇက်စတန်က အဆင့် (၂) ရရှိခဲ့ပြီး ပါကစ္စတန်က အဆင့် ၉ ၃)၊ ဗီယက်နမ်က အဆင့် (၄) နှင့် ဂျပန်က အဆင့် (၅) တို့ အသီးသီး ရရှိခဲ့ကြသည်။ မြန်မာ၏အောက်တွင် တရုတ်က အဆင့် (၁၂) နှင့် တာမင်နစ္စတန်က အဆင့် (၁၃) ရရှိခဲ့သည်။
“အာရှကလပ် အမျိုးသားဘောလီဘောပြိုင်ပွဲမှာ ပြိုင်ပွဲဝင်အသင်းတွေ အကောင်းဆုံး ကြိုးစား ယှဉ်ပြိုင်ကြတာကို မြင်တွေ့ခဲ့ရပြီး စိတ်လှုပ်ရှားစရာ ပြိုင်ပွဲတစ်ပွဲ ဖြစ်ပါတယ်” ဟု မြန်မာနိုင်ငံမှ အေးရှားဝေါလ်အသင်း၏ နည်းပြချုပ် ဦးကျော်စွာဝင်းက ပြောသည်။
“ကျွန်တော်တို့အသင်းအနေနဲ့ ထိပ်ဆုံး ရှစ်သင်းအဆင့်အထိ မရောက်ရှိခဲ့ပေမယ့်လည်း ဒီလိုဒေသတွင်းအဆင့် ပြိုင်ပွဲတွေကနေ အတွေ့အကြုံတွေ အများကြီး ရရှိခဲ့ပါတယ်။ ဒီအတွေ့အကြုံတွေကနေ သင်ယူပြီး နောက်ထပ်ပြိုင်ပွဲတွေမှာ ပိုမိုကောင်းမွန်အောင် စွမ်းဆောင်နိုင်မယ်လို့ ကျွန်တော် မျှော်လင့်ပါတယ်” ဟု ၎င်းက ဆက်လက်ပြောကြားသည်။
