ရန်ကုန်-စစ်တွေလမ်းမကြီးပေါ်တွင် မောင်းနှင်လာသည့် ရဲကားများ ဖေဖော်ဝါရီ ၂၇ ရက်နေ့ညပိုင်းက တိုက်ခိုက်ခံရသဖြင့် ရဲ ၂ ဦးသေဆုံးခဲ့သည်ဟု မြန်မာနိုင်ငံရဲတပ်ဖွဲ့က ပြောကြားသည်။
ရခိုင်ပြည်နယ်၊ သံတွဲမြို့နယ်မှ ပြည်နယ်ရဲတပ်ဖွဲ့ရုံးသို့ ပြန်လည်အပ်နှံလွှဲပြောင်းရန် သွားရောက်သည့် ရဲတပ်ဖွဲ့ပိုင် Double Cab မော်တော်ယာဉ် ၃ စီးနှင့် သံတွဲမြို့တွင် ပိုင်ရှင်မဲ့ သိမ်းဆည်းရမိခဲ့ပြီး တရားမဝင် တင်သွင်းလာသော အထောက်အထားမဲ့ယာဉ်ဟု ယူဆရသဖြင့် စစ်တွေမြို့၊ ကုန်းလမ်းပို့ဆောင်ရေး ညွှန်ကြားမှုဦးစီးဌာနတွင် ယာဉ်လိုင်စင်စစ်ဆေးနိုင်ရန် ပို့ဆောင်သည့် Mark II အဖြူရောင်ယာဉ် ၁ စီးတို့ ည ၇ နာရီ ၄၅ မိနစ်ခန့်တွင် တိုက်ခိုက်ခံခဲ့ရခြင်းဖြစ်သည်ဟု ထုတ်ပြန်ချက်တွင် ဖော်ပြထားသည်။
ပုဏ္ဏားကျွန်းမြို့နယ်၊ ကြံခင်းကျေးရွာနှင့် ပန်းနီလာကျေးရွာကြား ရန်ကုန် စစ်တွေကားလမ်း မိုင်တိုင်အမှတ်(၁၆၅)အနီးအရောက်တွင် မိုင်းခွဲရသဖြင့် ယာဉ်များ ရပ်တန့်သွားစဉ် လက်နက်ငယ်များဖြင့် ဝိုင်းဝန်းပတ်ခတ်ခံခဲ့ရခြင်းဖြစ်သည်ဟု ဖော်ပြထားသည်။ ထိုသို့ တိုက်ခိုက်မှုကြောင့် ယာဉ်များအား မောင်းနှင်လာသည့် ရဲတပ်ဖွဲ့ဝင် ၂ ဦးမှာ ထိုနေရာ၌သေဆုံးခဲ့ပြီး ကျန်နှစ်ဦးမှာ အသက်ရှင်လွတ်မြောက်ခဲ့သည်ဟု ဖော်ပြထားသည်။
ထိုတိုက်ခိုက်မှုကို အေအေအဖွဲ့က ပြုလုပ်ခဲ့ခြင်းဖြစ်သည်ဟုလည်း ရဲတပ်ဖွဲ့၏ ထုတ်ပြန်ချက်တွင် ဖော်ပြထားသည်။
ရခိုင်ပြည်နယ်မြောက်ပိုင်းတွင် တပ်မတော်နှင့် ရခိုင်လက်နက်ကိုင်အဖွဲ့ဖြစ်သည့် အေအေတို့အကြား တိုက်ပွဲများ ဖြစ်ပွားနေသည်မှာ လနှင့်ချီကြာမြင့်နေပြီဖြစ်ပြီး နှစ်ဖက်တပ်ဖွဲ့ဝင်များနှင့် အရပ်သားများ သေဆုံးမှုများလည်း ရှိနေကာ ဒေသခံထောင်နှင့်ချီပြီး အိုးအိမ်များစွန့်ခွာထွက်ပြေးနေကြရသည်။
