စင်ကာပူနိုင်ငံက Chao Chu Kang သုသာန်ထဲမှာ နေထိုင်နေတဲ့ မြန်မာနိုင်ငံသား ၆ ဦးကို အာဏာပိုင်တွေက ဖေဖော်ဝါရီ ၂၁ ရက်နေ့မှာ ဖမ်းဆီးခံခဲ့တယ်လို့ စင်ကာပူ CNA သတင်းဌာနက ပြောပါတယ်။
အသက် ၂၂ နှစ်ကနေ ၄၂ နှစ်အတွင်းရှိကြတဲ့ အမျိုးသား ၆ ဦးကို စင်ကာပူ လူဝင်မှုကြီးကြပ်ရေးနဲ့ စစ်ဆေးရေးဂိတ် အာဏာပိုင်အဖွဲ့ (ICA) က စစ်ဆင်ရေးပြုလုပ်စဉ် ဖမ်းဆီးခဲ့တာဖြစ်ပါတယ်။ သူတို့ဟာ စင်ကာပူမှာ ရက်ကျော်နေထိုင်မှုအပါအဝင် လူဝင်မှုကြီးကြပ်ရေးပြစ်မှုတွေနဲ့ ဖမ်းဆီးခံခဲ့ရတာလည်း ဖြစ်ပါတယ်။
အရာရှိတွေကို တွေ့ချိန်မှာ တစ်ယောက်က ထွက်ပြေးဖို့ ကြိုးစားခဲ့သေးပေမယ့် သူ့ကို ဖမ်းဆီးနိုင်ခဲ့ပါတယ်။ အဲဒီနောက် အရာရှိတွေကို သုသာန်ထဲက သူနေထိုင်တဲ့ ယာယီနေရာကို ခေါ်သွားခဲ့ပြီး အဲဒီနေရာမှာ နောက်ထပ်ငါးဦးကို ထပ်မံတွေ့ရှိတာဖြစ်ပါတယ်။
သူတို့ဟာ သုသာန်မှာ မြေကျင်းတူးသူတွေအဖြစ် လုပ်ကိုင်နေကြတာဖြစ်တယ်လို့ ပြောကြားကြောင်း ICA ရဲ့ သတင်းထုတ်ပြန်ချက်မှာ ဖော်ပြထားပါတယ်။
စင်ကာပူမှာ ရက်ကျော်နေထိုင်တာ၊ ဒါမှမဟုတ် တရားမဝင် ဝင်ရောက်သူတွေကို ထောင်ဒဏ် ၆ လအထိနဲ့ အနည်းဆုံးကြိမ်ဒဏ် ၃ ချက် ချမှတ်နိုင်ပါတယ်။ တရားမဝင်ထွက်ခွာမှုတွေအတွက်ကိုတော့ စင်ကာပူဒေါ်လာ ၂,၀၀၀ အထိဒဏ်ငွေ၊ ထောင်ဒဏ် ၆ လ၊ ဒါမှမဟုတ် နှစ်မျိုးလုံးချမှတ်နိုင်တယ်လို့ ICA က ပြောပါတယ်။
ဖမ်းဆီးထားသူတွေကို စစ်ဆေးမှုတွေ ဆက်လက်ဆောင်ရွက်နေတယ်လု့ိလည်း ICA က ပြောပါတယ်။