ဥရောပရုပ်ရှင်ပွဲတော်မှ သြစတြီးယား ရုပ်ရှင်ကားတစ်ကားကို ဆင်ဆာဘုတ်အဖွဲ့ ပိတ်ပင်

Eva Hirschi

အဝတ်အစားမပါ ကိုယ်လုံးတီးနှင့် မြင်ကွင်းများကို မြန်မာအစိုးရ ဆင်ဆာဘုတ်အဖွဲ့က ပိတ်ပင်လိုက်ပြီးနောက် ရန်ကုန်မြို့ရှိ Goethe-Institut ၌ ကျင်းပမည့် ရုပ်ရှင်ပွဲတော်တွင် ပန်းချီဆရာ Egon Schiele ၏ ဘဝဇာတ်ကြောင်းအား ရိုက်ကူးထားသည့် သြစတြီးယားရုပ်ရှင်ကားတစ်ကားကို ပြသခြင်းမပြုရန် ဆုံးဖြတ်ခဲ့ကြသည်။

၁၈၉၀ ပြည့်နှစ်တွင် မွေးဖွားပြီး ၁၉၁၈ ခုနှစ်၌ ကွယ်လွန်ခဲ့သော သြစတြီးယား ပန်းချီဆရာတစ်ဦး၏ ဘဝဇာတ်ကြောင်းကို ရိုက်ကူးထားသည့် “Egon Schiele: Death and the Maiden” အမည်ရှိ ရုပ်ရှင်ကားကို နှစ်စဉ် ပြုလုပ်သည့် ‘ဥရောပရုပ်ရှင်ပွဲတော်’တွင် စက်တင်ဘာ ၂၂ ရက်နေ့ည၌ ပြသရန် စီစဉ်ထားခဲ့သည်။ ဥရောပရုပ်ရှင်ပွဲတော်ကို စက်တင်ဘာ ၃ဝ ရက်အထိ ရန်ကုန်မြို့၊ နေပြည်တော်ရုပ်ရှင်ရုံနှင့် Goethe-Instutut တို့၌ ကျင်းပနေသည်။

မြန်မာနိုင်ငံရှိ ဥရောပသမဂ္ဂ ကိုယ်စားလှယ်ရုံးနှင့် Goethe-Institut Myanmar တို့ ပူးပေါင်းစီစဉ်သည့် ‘ဥရောပရုပ်ရှင်ပွဲတော်’ သည် ကာလအရှည်ကြာဆုံး နိုင်ငံခြား အနုပညာပွဲတော်ဖြစ်ပြီး ဥရောပနှင့် မြန်မာနိုင်ငံအကြား ယဉ်ကျေးမှုဖလှယ်ရေး တိုးမြှင့်ရန်နှင့် ဥရောပရုပ်ရှင်အမျိုးမျိုးကို ပြသရန်လည်းကောင်း ရည်ရွယ် ပြုလုပ်ခြင်းဖြစ်သည်။ မြန်မာနိုင်ငံရှိ အများပြည်သူ ကြည့်ရှုနေသော ရုပ်ရှင်ရုံများတွင် ရုံတင်ပြသမည့် ရုပ်ရှင်အားလုံး ဆင်ဆာဘုတ်အဖွဲ့၏ သဘောတူခွင့်ပြုချက် လိုအပ်သည်။ ဆင်ဆာဘုတ်အဖွဲ့ကို ဝန်ကြီးဌာန အရာရှိများနှင့် မြန်မာနိုင်ငံ ရုပ်ရှင်အစည်းအရုံးဝင် ပုဂ္ဂိုလ်များဖြင့် ဖွဲ့စည်းထားသည်။

ဥရောပရုပ်ရှင်ပွဲတော်ဝင် ရုပ်ရှင်ကားများကို ဆူးလေဘုရားလမ်းပေါ်ရှိ ‘နေပြည်တော် ရုပ်ရှင်ရုံ’ တွင်လည်း ဒုတိယအကြိမ် ပြသမည်ဖြစ်ရာ ယခုဆင်ဆာကိစ္စ ပေါ်ပေါက်လာခဲ့ခြင်းဖြစ်သည်။ သို့သော် သာမန်အားဖြင့် ထို ဥပဒေမှာ Geothe-Institut နှင့် သက်ဆိုင်ခြင်း မရှိချေ။ အကြောင်းမှာ Geothe-Institut သည် စေတနာဝန်ထမ်း ဂျာမန်ယဉ်ကျေးမှု အဖွဲ့အစည်းတစ်ခုဖြစ်သောကြောင့် ဖြစ်သည်။

“ကျွန်တော် ဒီသတင်းကို စက်တင်ဘာ ၂၁ ရက်နေ့ မနက်က ရပါတယ်။ ဒီဆုံးဖြတ်ချက်ကြောင့် အတော် စိတ်ပျက်သွားရပါတယ်”ဟု Goethe-Institut Myanmar ၏ ညွှန်ကြားရေးမှူး Mr. Franz-Xaver Augstin က ပြောသည်။

ပန်းချီဆရာ Schiele သည် လိင်စိတ်နှိုးဆွသော အမျိုးသမီး ကိုယ်လုံးတီးပုံများ ရေးဆွဲမှုတွင် နာမည်ကြီးသည်။ ယခုရုပ်ရှင်ထဲတွင်လည်း ဤသို့သော ပန်းချီကားပါ မြင်ကွင်းများပါသည်။ သို့သော် လိင်အပြုအမူ ပြကွက်များ ပါရှိခြင်း မရှိပေ။

typeof=

“အံ့သြဖို့ ကောင်းတယ်ဗျာ၊ ကိုယ်လုံးတီးပုံတွေက ရက်ရက်စက်စက် သတ်ဖြတ်ခန်းတွေပါတဲ့ အမေရိကန် ရုပ်ရှင်တွေထက်တောင် ဆင်ဆာအဖွဲ့ဝင် လူကြီးတွေကို စိတ်အနှောင့်အယှက် ပေးနေသလား မပြောတတ်ဘူး”ဟု Augustin က ပြောသည်။

အစပိုင်းတွင် ဆင်ဆာဘုတ်က ကိုယ်လုံးတီးပုံများပါသော ပြကွက်များကိုသာ ဖြတ်တောက်ရန် ပြောကြားခြင်းဖြစ်သည်။

“ဒါပေမယ့် ကျွန်တော်တို့က လွတ်လပ်မှုကို ထိမ်းသိမ်းချင်တယ်။ ကျွန်တော်တို့ အဖွဲ့အစည်းမှာ ဆင်ဆာဖြတ်တာမျိုး လက်မခံနိုင်ဘူး။ ဒါကြောင့် ဒီရုပ်ရှင်ကို လုံးလုံးမပြတော့ဖို့ ဆုံးဖြတ်လိုက်တယ်” ဟု Augustin က ပြောသည်။

“တိုက်တိုက်ဆိုင်ဆိုင် ဒီရုပ်ရှင်ကလည်း ဆင်ဆာအကြောင်း ဖြစ်နေတယ်။ Schiele ရဲ့ အနုပညာနဲ့ ဘဝနေထိုင်မှုပုံစံက ၂ဝ ရာစု အစဦးပိုင်း လူမှုရေးဓလေ့ ထုံးတမ်းတွေကို စိန်ခေါ်သလိုဖြစ်နေတယ်” ဟု မြန်မာနိုင်ငံတွင် သီးခြားသံရုံး ဖွင့်လှစ်မထားသဖြင့် မြန်မာနိုင်ငံအတွက်ပါ ပူးတွဲတာဝန်ယူထားသော ဘန်ကောက်မြို့ သြစတြီးယားသံရုံးမှ ဒုတိယသံရုံးတာဝန်ခံ Ms. Judith Schildberger က ပြောသည်။ ထို့ပြင်  “အလွန်စိတ်ပျက်မိပါသည်” ဟုလည်း ဆိုသည်။

“ဆင်ဆာဘုတ်အဖွဲ့ရဲ့ ဆုံးဖြတ်ချက်ကြောင့် ကျွန်မ ဝမ်းနည်းမိပါတယ်။ အထူးသဖြင့် ဒီကားက လွန်ခဲ့တဲ့ နှစ် ၁ဝဝ လောက်က ဆင်ဆာတွေကို ဆန့်ကျင်တိုက်ခိုက်ခဲ့တဲ့ ပန်းချီဆရာတစ်ယောက်အကြောင်း ဖြစ်နေလို့ပါပဲ” ဟု ၎င်းက Frontier ကို ပြောသည်။ ယနေ့အချိန်တွင်မူ Egon Schiele ၏ ပန်းချီကားများကို ကမ္ဘာအနှံ့ရှိ ပြတိုက်များတွင်  တွေ့မြင်နိုင်ကြပြီဖြစ်သည်။

“လွတ်လပ်စွာ ထုတ်ဖော်ခွင့်အပေါ် ကန့်သတ်လိုက်တာကို ကျွန်မတို့ သိပ်စိုးရိမ်မိပါတယ်။ ဒါက လက်ရှိ ဒီနိုင်ငံ သွားနေတဲ့ လမ်းကြောင်းရဲ့ အသွင်လက္ခဏာတွေပါပဲ”ဟု စက်တင်ဘာ ၃ ရက်နေ့က ထောင် ၇ နှစ်စီ ချခံလိုက်ရသော ရိုက်တာသတင်းထောက် ကိုဝလုံးနှင့် ကိုကျော်စိုးဦးတို့၏ စီရင်ချက်ကို ညွှန်ဆိုရင်း ၎င်းက ပြောသည်။

“မြန်မာပြည်မှာလုပ်တဲ့ ဥရောပရုပ်ရှင်ပွဲတော်မှာ သြစတြီးယားက ရုပ်ရှင်ကားတစ်ကား တင်တာ ဒါပထမဆုံးပါ။ ဆင်ဆာဘုတ်အဖွဲ့ကလည်း Goethe-Institut မှာ ပြသမယ့်အတိုင်း ဆင်ဆာမဖြတ်ပါဘူးလို့ ကျွန်မတို့ကို ပြောထားခဲ့ပါတယ်”ဟု Schildberger က ပြောသည်။

မည်သို့ပင်ဖြစ်စေ ယခုလို ပိတ်ပင်လိုက်ခြင်းကို Augustin က များစွာ မအံ့သြလှပေ။

“ဒီကားကို နေပြည်တော်ရုံမှာ ပြသလို့ ရမှာမဟုတ်ဘူးဆိုတာ ကျွန်တော်တို့ သိထားပါတယ်။ ဒါကြောင့်လည်း ဒီကားကို Goethe-Institut မှာပဲ ပြဖို့ စီစဉ်ခဲ့တာပါ”ဟု ၎င်းက ပြောသည်။

Share on facebook
Share on twitter
Share on email

More stories

Latest Issue

Stay on top of Myanmar current affairs with our Daily Briefing and Media Monitor newsletters

Our fortnightly magazine is available in print, digital, or a combination beginning at $80 a year

Sign up for our Frontier Fridays newsletter. It’s a free weekly round-up featuring the most important events shaping Myanmar