အောင်လအန်ဆိုင်းအား ရန်ကုန်မြို့တွင် တွေ့ရစဉ်။ ဓာတ်ပုံ- အေအက်ဖ်ပီ/ရဲအောင်သူ
မြန်မာစပါးအုံးမြွေ “Burmese Python” လို့ Mixed Martial Art-MMA ပြိုင်ပွဲတွေမှာ အမည်ရထားသူဟာ အမေရိကန်နိုင်ငံမှာ ဆယ်စုနှစ်ကျော်ကြာနေထိုင်ခဲ့ပြီးနောက် မြန်မာနိုင်ငံကို ဇန်နဝါရီ ၇ ရက်က ပြန်လည်ရောက်ရှိလာခဲ့ပါတယ်။ မြန်မာလက်ဝှေ့ပရိသတ်တွေက သူ့ကို ရန်ကုန်မှာ တခဲနက် ကြိုဆိုခဲ့ကြပါတယ်။
ကိုယ်ခံပညာပေါင်းစုံအသုံးပြုကာ ထိုးသတ်ယှဉ်ပြိုင်ရတဲ့ အဆိုပါအားကစားကို ကြိုက်နှစ်သက်ကြတဲ့ အရှေ့တောင်အာရှနိုင်ငံတွေမှာ လှုပ်လှုပ်ရှားရှားဖြစ်အောင် ကျော်ကြားလှတဲ့ အောင်လအန်ဆိုင်းတစ်ယောက် မတ်လအတွင်း ရန်ကုန်မှာ ကျင်းပမည့် ပြိုင်ပွဲအတွက် သတင်းစာရှင်းလင်းပွဲ ပြုလုပ်ဖို့ မြန်မာနိုင်ငံကို ပြန်လည် လာရောက်ခဲ့တာဖြစ်ပါတယ်။
“အိပ်မက်တစ်ခုလိုပါပဲ။ တစ်ချိန်တည်းမှာပဲ အိမ်ပြန်ရောက်နေသလိုပဲ ခံစားရတယ်”လို့ အသက် ၃၀ အရွယ်ရှိ အောင်လအန်ဆိုင်းက AFP သတင်းဌာနကို ဇန်နဝါရီ ၆ ရက်က ပြောကြားခဲ့ပါတယ်။
မြန်မာလက်ဝှေ့သမားတွေကို နိုင်ငံတကာ MMA ပြိုင်ပွဲတွေမှာ ပါဝင်ယှဉ်ပြိုင်နိုင်ဖို့ နည်းစနစ်ပိုင်းဆိုင်ရာတွေကို ကူညီပေးလိုတယ်လို့လည်း သူက ပြောကြားခဲ့ပါသေးတယ်။
အောင်လအန်ဆိုင်းကို မြန်မာနိုင်ငံမှာ မွေးဖွားခဲ့ပါတယ်။ သူဟာ အသက် ၁၈ နှစ်အရွယ်မှာ စိုက်ပျိုးရေးပညာ သင်ယူဖို့ အမေရိကန်နိုင်ငံ၊ အင်ဒီယားနားပြည်နယ်ကို ရောက်ရှိ အခြေချခဲ့သူဖြစ်ပါတယ်။
လက်ရှိအချိန်မှာ တိုက်ပွဲတွေ ဖြစ်ပွားနေတဲ့ ကချင်ပြည်နယ်ဟာ သူ့ရဲ့မွေးရပ်ဖြေဖြစ်ပြီး အဲဒီမှာ သူက စိုက်ပျိုးရေးလုပ်ငန်း ပြန်လည်လုပ်ကိုင်ဖို့ စီစဉ်ခဲ့တယ်လို့ ဆိုပါတယ်။
ဒါပေမယ့် ဂျူဂျစ်စု ကိုယ်ခံပညာကို စိတ်ဝင်စားခဲ့ပြီးနောက် သူ့အိပ်မက်တွေ ပြောင်းလဲသွားခဲ့ပြီး အမေရိကန်နိုင်ငံမှာ ကိုယ်ခံပညာပေါင်းစုံ တိုက်ခိုက်မှု (MMA) အတွက် လေ့ကျင့်မှုတွေ ပြုလုပ်ခဲ့တယ်လို့ သူက ဆိုပါတယ်။ အမေရိကန်မှာ သူက ကိုယ်ကာယလေ့ကျင့်ရေး သင်တန်းကျောင်း တစ်ခုကိုလည်း ဖွင့်လှစ်ထားပါတယ်။
အရပ် ၆ ပေ ၁ လက်မရှိသူ သူဟာ ပြိုင်ပွဲတွေမှာ ၁၆ ပွဲနိုင်၊ ကိုးပွဲရှုံး ရလဒ်ကို ရရှိထားပါတယ်။
သူ့ကို မြန်မာနိုင်ငံက လက်ဝှေ့ပရိသတ်များက အထူးကြိုက်နှစ်သက်ကြပါတယ်။ အင်တာနက်မြန်နှုန်းတွေ နှေးကွေးနေတဲ့ကြားထဲက ပရိသတ်တွေဟာ သူ့အကြောင်း နောက်ဆုံးသတင်းတွေကို အင်တာနက်နဲ့ လူမှုကွန်ယက်တွေကတစ်ဆင့် အမြဲနားစွင့်နေခဲ့ကြတာ ဖြစ်ပါတယ်။
ရန်ကုန်မြို့တွင် လေ့ကျင့်နေသည့် အောင်လအန်ဆိုင်း။ ဓာတ်ပုံ- အေအက်ဖ်ပီ/ရဲအောင်သူ
“သူ့အတွက် ကျွန်တော်တို့ အရမ်း ဂုဏ်ယူမိပါတယ်”လို့ ဇန်နဝါရီ ၇ ရက်က ပြုလုပ်ခဲ့တဲ့ သတင်းစာရှင်းလင်းပွဲကို တက်ရောက်လာသူ လက်ဝှေ့ ပရိသတ်တစ်ဦးက ဆိုပါတယ်။
“သူကြောင့် မြန်မာနိုင်ငံကို ကမ္ဘာက သိခဲ့ရပြီး ကျွန်တော်တို့ဆီက လက်ဝှေ့သမားတစ်ယောက်က အမေရိကန်မှာ နာမည်ကျော်နိုင်ပြီဆိုတာကိုလည်း ကျွန်တော်တို့ ယုံကြည်နိုင်ခဲ့ပါပြီ”လို့ သူက ပြောကြားခဲ့ပါတယ်။
မြန်မာ့လက်ဝှေ့ဟာ နိုင်ငံအတွင်းမှာ လူကြိုက်များတဲ့ အားကစားတစ်ခုဖြစ်ပြီး အရှေ့တောင်အာရှ လက်ဝှေ့လောကမှာ အကြမ်းတမ်းဆုံး လက်ဝှေ့အားကစားဖြစ်သလို ထိုင်းနိုင်ငံက မွေ့ထိုင်း လက်ဝှေ့ထက် ခက်ထန်ကြမ်းတမ်းတယ်လို့လည်း ဆိုကြပါတယ်။
မြန်မာ့လက်ဝှေ့မှာ ခေါင်းနဲ့ တိုက်ခွင့်ရှိသလို ထိုးသတ်သူများအနေနဲ့လည်း လက်မှာ လက်အိတ်ဝတ်ဆင်ဖို့မလိုပဲ ပတ်တီးစည်းပြီး ပြိုင်ဘက်ကို အနိုင်ယူထိုးသတ်ရတာ ဖြစ်ပါတယ်။
လက်ဝှေ့ပွဲမှာ ထိပ်ဆုံးတန်းက ကြည်ရှုသူများဟာ ထိုးချက်ထိတဲ့အသံနဲ့ သွေးထွက်သံယို ဖြစ်မှုတွေကို အနီးကပ်တွေ့မြင်ရပါတယ်။
မြန်မာ့လက်ဝှေ့မှာ အနိုင်ရရှိဖို့အတွက် အလဲထိုးရမှာဖြစ်ပြီး သုံးမိနစ်စီကြာတဲ့ ငါးချီမြောက်မှာ ဘယ်သူမှ အလဲထိုးနိုင်ခြင်း မရှိဘူးဆိုရင်တော့ သရေရလဒ်နဲ့သာ အဆုံးသတ်ကြပါတယ်။
မြန်မာလက်ဝှေ့ရဲ့ စည်းကမ်းအချို့ကို ခေတ်နဲ့အညီ ပြန်လည် ပြင်ဆင်လိုက်မယ်ဆိုရင် ပြိုင်ဘက် မွေထိုင်းလက်ဝှေ့ထက် အနာဂတ်မှာ အလားအလာအများကြီး ရှိနေတယ်လို့ အောင်လအန်ဆိုင်းက ဆိုပါတယ်။
သူဟာ လက်ဝှေ့ကို လေ့ကျင့်ခဲ့ဖူးခြင်း မရှိခဲ့ပေမယ့်လည်း “ဒီမှာတော့ အိပ်နေ၊ စားနေသလောက်ပဲ ရှိတယ်”လို့ ဆိုခဲ့ပါတယ်။
“ဒီမှာဆို အကုန်လုံးက ထိုးသတ်ချင်နေကြတာပါပဲ”လို့လည်း သူက ဆိုပါတယ်။
မြန်မာနိုင်ငံမှာ ဒေါ်အောင်ဆန်းစုကြည်ရဲ့ ပါတီ ရွေးကောက်ပွဲမှာ အနိုင်ရရှိခဲ့တဲ့အတွက် သူ့အနေနဲ့ မြန်မာနိုင်ငံကို ခဏခဏ ပြန်လာဖွယ်ရှိတယ်လို့ သူကဆိုပါတယ်။
ယခုတစ်ခေါက် လာရောက်လည်ပတ်မှု နောက်ပိုင်းမှာလည်း မတ်လလယ်မှာ ကျင်းပမယ့် ONE Championship ပြိုင်ပွဲအတွက် မြန်မာနိုင်ငံကို ပြန်လည်လာရောက်ဦးမှာ ဖြစ်ပါတယ်။ ပြိုင်ပွဲကို ရန်ကုန်မြို့မှာ ကျင်းပမှာဖြစ်ပြီး အာရှနိုင်ငံများမှာ တိုက်ရိုက် ပြသသွားမှာဖြစ်ပါတယ်။
(အေအက်ဖ်ပီ)
ရဲထွဋ္ဋ်သိန်း ဘာသာပြန်သည်။
