အကျပ်အတည်းတွေကြားက အဖျော်ယမကာဘားတွေ

ရန်ကုန်မြို့ရှိ အဖျော်ယမကာဆိုင်လုပ်ငန်းများ အရောင်းအဝယ်ကောင်းမွန်သည့်ကာလ ကျော်လွန်သွားပြီးနောက် ဘားဆိုင်လုပ်ငန်းများမှာ ဥပဒေဟောင်းများအပြင် ပြည့်ကြပ်နေသည့် ဈေးကွက်ထဲတွင် ဆုတ်ယုတ်လာနေသည်။

ဂျာရတ်ဒေါင်းနင်း ရေးသားသည်။

မိုဂျိုစားသောက်ဆိုင်၏ နောက်ဆုံးညဖြစ်သည်။ ထပ်၍ သိမ်းဆည်းထားသည့် ပရိဘောဂများနှင့် တိပ်ပတ်ထားသော ပုံးများအကြားတွင် စားပွဲတစ်လုံးတည်းသာ ကျန်ရှိနေပြီး ဝန်ထမ်းများက ၎င်းတို့အတွက် အဆိုပါဆိုင်၏ နောက်ဆုံးညစာကို စားသုံးနေကြသည်။

စားသောက်ဖွယ်ရာများ စားသောက်ခြင်း၊ အမှတ်တရစကားများကို အင်္ဂလိပ်နှင့် မြန်မာဘာသာများဖြင့် ပြောဆိုခြင်းများအပြင် မျက်ရည်စများကိုလည်း တွေ့မြင်နေရသည်။ ပိုင်ရှင် မစ္စတာ ဂျင်းကာစီ၏ မျက်လုံးများမှာ ရီဝေဆို့နစ်နေသော်လည်း မကြာမီတွင် အလုပ်သမားဟောင်းများ ဖြစ်ကြတော့မည့် ၎င်း၏ဝန်ထမ်းများအား ငိုကြွေးခြင်းမပြုကြရန် ညွှန်ကြားနေသည်။ ဗုဒ္ဓဘာသာဓလေ့ထုံးတမ်းအရ ဝန်ထမ်းများက ဒူးများကိုထောက်ကာ ကာစီကို ကန်တော့လိုက်ကြသည်။ ထို့နောက် မန်နေဂျာများကို အရိုအသေပေးလိုက်ကြပြီး ၎င်းတို့၏ သင်ကြားပြသပေးမှုများအတွက် ကျေးဇူးတင်ကြောင်းနှင့် ၎င်းတို့၏ အပြစ်များရှိပါက ခွင့်လွှတ်ပေးရန် ဝန်ချတောင်းပန်ကြလေသည်။

“မင်းတို့ ဟင်းပွဲ မှားယူတာ၊ ဒါမှမဟုတ် ကော်ဖီခွက်မှာ ဇွန်းတပ်မလာတာတွေကို လုပ်မိတဲ့ အချိန်တိုင်း ငါ မင်းတို့ကို ခွင့်လွှတ်ခဲ့ပါတယ်” ဟု ၎င်းတို့အား မစ္စတာကာစီက ပြောကြားသည်။ “မင်းတို့တွေ အလုပ်ကို ကောင်းကောင်း လုပ်ခဲ့ကြတယ်။ မင်းတို့က ငယ်ငယ်ရွယ်ရွယ်ပဲ ရှိကြသေးတယ်။ မင်းတို့က စိတ်ထားလည်း ကောင်းကြတယ်။ မင်းတို့ အောင်မြင်လာလိမ့်မယ်။ ဒီအတိုင်း ဆက်လုပ်ကြပါ” ဟုလည်း ၎င်းကဆိုသည်။

Yangoods ၏ အကျိုးတူစီးပွားဖက်လည်းဖြစ်သည့် ပြင်သစ်လူမျိုး၊ စွန့်ဦးတီထွင်စီးပွားရေးလုပ်ငန်းရှင်ဖြစ်သူ ကာစီက မိုဂျို (Mojo) မှာ စားသောက်ဆိုင်ကောင်းတစ်ခု မဟုတ်ခြင်း၊ သို့မဟုတ် အလားအလာ မရှိခြင်းတို့ကြောင့် ပိတ်လိုက်ရခြင်းမဟုတ်ဟု ပြောကြားသည်။

ပြီးခဲ့သည့် နှစ်နှစ်အတွင်း ရရှိခဲ့သည့် ဝင်ငွေမှာ မိုဂျို၏အစောပိုင်း နေ့ရက်များက ဝင်ငွေအား လိုက်မမှီတော့သဖြင့်သာ ယခုကဲ့သို့ ပိတ်လိုက်ရခြင်း ဖြစ်သည်။ ထိုအချိန်ကာလက အနောက်တိုင်းပုံစံဘား အနည်းငယ်ကိုသာ TripAdvisor က ဖော်ပြပေးခဲ့သလို ဘားများ ညဘက်ဖွင့်ခွင့်ကိုလည်း အစိုးရက များစွာတင်းကြပ်ခြင်းမရှိသေးသည့် အချိန်ကာလဖြစ်သည်။

တစ်ချိန်က သွက်လက်လှုပ်ရှားနေသော ညမြင်ကွင်းများသည် ယခုအခါတွင် တိတ်ဆိတ် ငြိမ်သက်သွားမည့်ဟန် ပေါ်နေသည်။ ဤနှစ်မှာ ကမ္ဘာလှည့်ခရီးသွားလုပ်ငန်းများနှင့် နိုင်ငံခြား ရင်းနှီးမြုပ်နှံမှုများအတွက် စိတ်ပျက်ဖွယ်ရာ နှစ်တစ်နှစ် ဖြစ်နေသည်။ တစ်ချိန်တည်းတွင် အဖော်ယမကာဆိုင်နှင့် စားသောက်ဆိုင် လုပ်ငန်းများတွင် အသစ်ဝင်ရောက်လာသူများ များပြားလာလျက် ရှိသကဲ့သို့ တင်းကြပ်သော နေဝင်မီးငြိမ်းအမိန့်နှင့် လိုင်စင်ချပေးသော ဥပဒေများအောက်တွင် တစ်ဖြည်းဖြည်း ခက်ခဲလာခဲ့သည်။ လူသစ်များက ဆက်လက်ကြိုးစားနေကြသော်လည်း ဆိုင်ဟောင်းများကမူ ရောင်းချရန်၊ သို့မဟုတ် အပြီးတိုင် ပိတ်ပစ်ရန် အဆင်သင့်ဖြစ်နေကြသည်။

အဖျော်ယမကာဆိုင်များ စည်ကားခဲ့ခြင်း၏ အဆုံးသတ်နိဂုံး

Pun + Projects ၏ အစားအသောက်နှင့် အဖျော်ယမကာ စီမံခန့်ခွဲရေး ဒါရိုက်တာ မစ္စတာ အန်ဒရီ လန့်စ်သည် လတ်တလော နှစ်များအတွင်း ရန်ကုန်ရှိ Port Autonomy နှင့် Asian bistro Rau Ram အပြင် မကြာသေးမီက ဖွင့်လှစ်ခဲ့သည့် Rice & Ice တို့ကဲ့သို့သော အဖျော်ယမကာဆိုင်များနှင့် စားသောက်ဆိုင်များကို ဖွင့်လှစ်ခဲ့သူဖြစ်သည်။

ရန်ကုန်မြို့၏ သက်တမ်းအကြာဆုံးနှင့် နိုင်ငံခြားသားများအကြား နာမည်အကြီးဆုံး အဖျော်ယာမကာ ဆိုင်များထဲမှ တစ်ဆိုင်ဖြစ်သော  50th Street Bar တွင် ၎င်းက Frontier နှင့် တွေ့ဆုံခဲ့သည်။ သံတိုင် ထုတ်တန်းများနှင့် ကိုလိုနီခေတ် အုတ်တိုက် တည်ဆောက်ပုံများကို နှစ်သက်သော လန့်စ်က ထိုအဆောက်အဦး၏ သမိုင်းကြောင်းအား ဗြိတိသျှရတနာအိမ်အဖြစ် ပြောဆိုခဲ့သကဲ့သို့ တစ်သွေးတစ်သံတစ်မိန့်ဖြင့် ဗိုလ်ချုပ်မှူးကြီးသန်းရွှေ အုပ်ချုပ်ခဲ့သော အာဏာရှင်ခေတ်ကတည်းက ဘီယာသောက်ကာ ဘိလိယက်ထိုးရန် ပုံမှန်လာခဲ့ကြသည့် သစ္စာရှိ ဧည့်သည်များအကြောင်းတို့ကိုလည်း ပြောပြခဲ့သည်။

“ဒါက အဖွဲ့အစည်းတစ်ခု ဟုတ်သလို ပြယုဂ်လို့လည်း ဆိုနိုင်ပါတယ်” ဟု ၎င်းက ဆိုသည်။ သူတို့က “ပြယုဂ်တစ်ခုကို ပိတ်ပစ်မှာ မဟုတ်ပါဘူး” ဟုလည်း ၎င်းက ဆက်လက်ပြောကြားသည်။ ( Pun + Projects က 50th Street အား ဝယ်ယူရန် ညှှိနှိုင်းဆွေးနွေးနေသည်ဆိုသည့် သတင်းများအပေါ် မှတ်ချက်ပေးရန်ကိုမူ လန့်စ်က ငြင်းဆိုခဲ့သည်။)

jtms-beer-09.jpg

ဓာတ်ပုံ-သိမ့်မွန်စိုး (J)

ထိုဆိုင်က အကျိုးအမြတ် ဆက်လက်ရရှိနေသေးပုံပေါ်ပြီး ထိုအချက်မှာလည်း ရန်ကုန်မြို့တွင် ချွင်းချက်တစ်ခု ဖြစ်သည်။ ဤဆောင်းပါးအတွက် သုတေသနပြုလုပ်နေစဉ်အတွင်း ဆိုင်ကြီးအချို့က ရောင်းရန် ဆိုင်းဘုတ်တင်ထားပြီး ဖြစ်သော်လည်း ဝယ်သူကို ရှာမတွေ့ကြသေးကြောင်း Frontier က ကြားသိခဲ့ရသည်။

မြေနီကုန်းရှိ Penthouse ကဲ့သို့သော ဆိုင်သစ်အချို့က စီးပွားဖြစ်နေသော်လည်း ဆိုင်အများစုမှာမူ ဆိုးရွားသည့် အခြေအနေများနှင့် တွေ့ကြုံနေရပြီးဖြစ်သည်။ Hummingbird ဘားအား စတင်ဖွင့်လှစ်ခဲ့သည့် ၂၀၁၅ ခုနှစ်၊ မတ်လအတွင်းတွင် အွန်လိုင်းသတင်းနှင့် လူမှုဘဝပုံစံ ဝက်ဘ်ဆိုဒ်ဖြစ်သည့် Coconuts Yangon က အဆိုပါဘားမှာ “ယုံနိုင်ဖွယ်ရာပင် မရှိ” ဟု မှတ်ချက်ပြုခဲ့သည်။ တစ်နှစ်အကြာတွင်မူ ဤဆိုင်၏ ဖေ့စ်ဘုတ်စာမျက်နှာပေါ်၌ “ပြန်လည်ပြုပြင်မွမ်းမံရေးအတွက် ရက်အကန့်အသတ်မရှိ ပိတ်လိုက်ကြောင်း” ကြေညာခဲ့သည်။ ဤသည်မှာ လွန်ခဲ့သော ခြောက်လခန့်က ဖြစ်သည်။ (“ရန်ကုန်မြို့ရှိ အဖျော်ယာမကာဆိုင်တစ်ဆိုင်မှာ ကောင်းမွန်လွန်းသည်ဆိုလျှင် ဤသည်မှာ ပုံမှန်သာဖြစ်သည်” ဟု မှတ်ချက်ပြုခဲ့သည့် The Coconuts ဆောင်းပါးသည် နိမိတ်ဖတ်သလို ဖြစ်ခဲ့သည်။)

ဤသို့ဆိုပါက မရေတွက်နိုင်သည့် အဖျော်ယာမကာဆိုင်ကောင်းများ မည်သည့်အတွက်ကြောင့် တုန်လှုပ်ဖွယ်ကောင်းအောင် ပျောက်ကွယ်သွားခဲ့ရပါသလဲ။ ဆိုင်တော်တော်များများတွင် နေရာအနေအထားနှင့် ဈေးကွက်ပြသနာများရှိကြသည်ဟု လန့်စ်ကဆိုသည်။

တစ်ဖက်တွင် အဖျော်ယာမကာဆိုင်များ၏ အရည်အသွေးနှင့် အဆင့်အတန်းမှာ တိုးတက်နေသည်ဟုလည်း ၎င်းက ရှင်းပြသည်။ မလေးရှားနှင့် စင်ကာပူနိုင်ငံများရှိ စားသောက်ဆိုင်များနှင့် ဟိုတယ်များတွင် အလုပ်လုပ်နေသော လူငယ်များက မြန်မာနိုင်ငံ၌ အလုပ်အကိုင်များ ပြန်လည် ရှာဖွေနေကြသလို ၎င်းတို့၏ ကျွမ်းကျင်အရည်အသွေးများနှင့် အတွေ့အကြုံများအား ၎င်းတို့နှင့်အတူ ဆောင်ကျဉ်းလာခဲ့ကြသည်။

အခြားတစ်ဖက်တွင်လည်း အနောက်တိုင်းစတိုင် အဖျော်ယာမကာဆိုင်တစ်ဆိုင်တွင် ကျွမ်းကျွမ်းကျင်ကျင် အလုပ်လုပ်ရန် အတွေ့အကြုံရှိရုံမျှဖြင့် အလုပ်ပြီးသည့်အချိန်တွင် ထိုနေရာ၌ ကော့တေးသောက်ရန် တတ်နိုင်သည့် အခြေအနေရှိသည်ဟု ဆိုလိုခြင်း မဟုတ်ပေ။ The Lab သို့မဟုတ် Vista Bar ကဲ့သို့သော ဆိုင်များသို့ လာထိုင်ကြသည့် လူလတ်တန်းစား လူငယ်အရေအတွက်မှာ တိုးလာနေပြီဖြစ်သော်လည်း  မျှော်လင့်ထားသည်ထက် ပိုမိုနှေးကွေးနေသေးသည်။

တစ်ချိန်တည်းတွင် မြန်မာနိုင်ငံ၏ အထက်တန်းလွှာ လူတန်းစားများက အဆင့်မြင့်ဟိုတယ်များ၌ ကျင်လည် ပျော်မွေ့လိုဟန်ရှိပြီး လူများစုဖြစ်သည့် အလုပ်သမား လူတန်းစားတို့ကမူ ၎င်းတို့ ပတ်ဝန်းကျင်ရှိ ဘီယာဆိုင်များကိုသာ နှစ်သက်သဘောကျကြသည်။ ဈေးကွက်က နိုင်ငံခြားသား အသိုင်းအဝန်းတွင်သာ မူတည်နေသေးပြီး နိုင်ငံခြားသား အရေအတွက်ကလည်း အများကြီးရှိနေသည် မဟုတ်ပေ။

“လူတိုင်းက တစ်လှေတည်းစီး၊ တစ်ခရီးထဲ သွားနေကြတာပါ” ဟု လန့်စ်က ပြောသည်။ “ကျွန်တော်တို့က ဒီလိုဆိုင်မျိုးတွေမှာ အမှန်တကယ် ပိုက်ဆံသုံးမယ့် လူ ၅၀၀ အတွက်ပဲ ယှဉ်ပြိုင်နေကြရတာပါ” ဟုလည်း ၎င်းကဆက်လက်ပြောကြားသည်။

စည်းမျဉ်းဥပဒေများနဲ့ ဘီယာ

ဧည့်သည်နည်းပါးခြင်းက တစ်ခုတည်းသော ခေါင်းခဲစရာ ကိစ္စရပ်တော့ မဟုတ်ပေ။ အစိုးရကလည်း အရက်နှင့် ဘီယာလိုင်စင် အသစ်များ ခွင့်ပြုပေးခြင်းများကို ပြုလုပ်ခဲလှသည်။ ၂၀၁၁-၁၂ ခုနှစ်က စတင်ကာ လည်ပတ်နေသော လိုင်စင်အရေအတွက်မှာလည်း အနည်းငယ် လျော့နည်းသွားသည်။ အရက်သေစာ အလွန်အကျွံ သုံးစွဲမှုအပေါ် စိုးရိမ်ပူပန်နေမှုများကို တုန့်ပြန်ဖြေရှင်းသည့် လုပ်ရပ်အဖြစ် အစိုးရက ပြသလိုဟန် ရှိခြင်းကြောင့် ဖြစ်သည်။ တရားဝင် ကိန်းဂဏန်းများအရ ၂၀၁၅-၂၀၁၆ ဘဏ္ဍာနှစ်၌ အဖျော်ယမကာ လိုင်စင်အမျိုးအစား ၃၀ အတွက် လည်ပတ်နေသော လိုင်စင်ပေါင်း ၄၁,၀၄၀ ရှိသည်ဟု ဖော်ပြထားသည်။

ဆိုလိုသည်မှာ အဖျော်ယာမကာဆိုင်သစ်များအနေဖြင့် ၎င်းတို့ လုပ်ငန်းလုပ်ကိုင်မည့် မြို့နယ်အတွင်းရှိ လိုင်စင်ရှိထားသူတစ်ဦးထံမှ လိုင်စင်ကို မဖြစ်မနေ ပြန်လည် ဝယ်ယူရမည်ဟု ဆိုလိုခြင်းပင်ဖြစ်သည်။ စီးပွားရေးအချက်အချာကျသော မြို့နယ်များရှိ လိုင်စင်ပေါက်ဈေးသည် တစ်ခုလျှင် ကျပ်သိန်း ၁၅၀ (အမေရိကန် ဒေါ်လာ ၁၁,၃၀၀) အထိ တန်ကြေးရှိနေပြီး မှောင်ခိုဈေးကွက်တွင် ယခုထက်ပင် ဈေးပိုများနိုင်ပေသည်။ ပုလင်းဘီယာ၊ စည်ဘီယာ၊ ဒေသထွက်အရက်နှင့် ပြည်ပအရက်များဟူ၍ သတ်မှတ်ထားသည့် အရက်အမျိုးအစား တစ်ခုချင်းစီအတွက်လည်း လိုင်စင်တစ်မျိုးစီ လိုအပ်နေသေးသည်။

ရန်ကုန်မြို့၊ တရုတ်တန်း ၁၉ လမ်းပေါ်ရှိ ဆိုင်ပိုင်ရှင်တစ်ဦးကမူ လက်ရှိလိုင်စင်ပေါက်ဈေးကို မသိသကဲ့သို့ စိတ်ဝင်စားခြင်းလည်း မရှိဟု Frontier ကို ပြောကြားသည်။ လက်ရှိလိုင်စင်အား သူမ၏ ဖခင်က လွန်ခဲ့သော ၁၅ နှစ်ကျော်ခန့်ကတည်းက ရယူထားခဲ့ခြင်းဖြစ်ပြီး ဆိုင်ကောင်တာ၏ နောက်ဘက်တွင် ၎င်း၏ ဖခင်ပုံပါသော လိုင်စင်ကို ချိတ်ဆွဲထားသည်။

သူမထံတွင် ဘီယာပုလင်းနှင့် စည်ဘီယာရောင်းချရန် လိုင်စင်နှစ်ခုရှိသော်လည်း အရက်ပြင်းရောင်းချရန်အတွက်မူ လိုင်စင်မရှိပေ။ သို့သော် ယခုကဲ့သို့ လိုင်စင်မရှိသော်လည်း နိုင်ငံခြားသားများအား ကော့တေးတစ်ခွက်လျှင် ၈၀၀ ကျပ်ဖြင့် ၎င်းက ရောင်းချနေခြင်းကို မတားဆီးနိုင်ပေ။

“ရဲတွေက ကျွန်မတို့အကြောင်းကို သိရှိပေမယ့် သူတို့က အဲဒီကိစ္စနဲ့ ပတ်သက်ပြီး တစ်စုံတစ်ရာ ပြောဆိုတာမျိုး မလုပ်ကြပါဘူး” ဟု သူမက ပြောကြားသည်။ “လမ်းထဲက အခြားဆိုင်တွေမှာ လိုင်စင် ရှိ၊ မရှိ ကျွန်မ မသိပေမယ့် သူတို့မှာလည်း သူတို့ အစီအမံနဲ့သူတို့ ရှိလိမ့်မယ်လို့ ကျွန်မထင်ပါတယ်” ဟုလည်း သူမက ထပ်မံ ပြောကြားခဲ့သည်။

jtms-beer-06.jpg

ဓာတ်ပုံ-သိမ့်မွန်စိုး (J)

ဤသည်ကို အကျင့်ပျက်ချစားသည့် စနစ်တစ်ရပ်အဖြစ် သူမက ရှုမြင်ထားခြင်း မရှိပေ။ လာဘ်တစ်စုံတစ်ရာပေးခြင်း မရှိဟု သူမက ပြောကြားသည်။ အာဏာပိုင်များအနေဖြင့် သင်မည်သူ မည်ဝါဆိုသည်ကိုသာ သိရှိလိုကြကြောင်းနှင့် ပြဿနာ မဖြစ်စေသောသူအဖြစ် ယုံကြည်ထားလိုကြသည်။ ၎င်းတို့သည် အမိန့်ညွှန်ကြားစာများအတိုင်း တသွေမတိမ်း ဆောင်ရွက်ခြင်းမပြုကြမည်ကတော့ အသေအချာပင် ဖြစ်သည်။

အဆိုပါစနစ်ကို စမ်းသပ်သည့်အနေဖြင့် အထွေထွေအုပ်ချုပ်ရေးဌာနက လိုင်စင်မရှိဘဲ စည်ဘီယာ ရောင်းချသည့်ဆိုင်များကို နှိမ်နင်းရန် ပြီးခဲ့သည့်နှစ် ဇူလိုင်လတွင် ကြိုးစားခဲ့ဖူးသည်။ ဆိုင်ရှင် ၄,၅၀၀ ခန့်က စည်ဘီယာများ တရားမဝင် ရောင်းချလျက်ရှိသည်ဟု မြန်မာတိုင်း(မ်) သတင်းတစ်ပုဒ်တွင် ဖော်ပြခဲ့သည်။ အများပြည်သူများ၏ ဝေဖန်ပြောဆိုမှုများ ထွက်ပေါ်လာခဲ့ပြီးနောက်တွင် အာဏာပိုင်များက ၎င်းတို့၏ ကြိုးပမ်းမှုများကို လျော့ချပစ်ခဲ့သည်။

သို့သော် ဤတရားမဝင် တဝင်စနစ်သည် ၁၉ လမ်းထဲရှိ ဒေသခံများ ပိုင်ဆိုင်သည့် အဖျော်ယာမကာဆိုင်များအတွက် အဆင်ပြေသော်လည်း နိုင်ငံခြားသား ပိုင်ဆိုင်များအတွက်မူ ကွဲပြားခြားနားမှုရှိသည်။

များသောအားဖြင့် ထိုဆိုင်များမှာ ဒေသန္တရ တာဝန်ရှိသူများနှင့် အနည်းငယ်သာ ပြေလည်သည့် ဆက်ဆံရေးမျိုးရှိပြီး ရန်ကုန်ရှိ နိုင်ငံခြားသားများ၏ လုံခြုံရေးအတွက်ဟု အမည်ခံကာ ရဲများက အနီးကပ် စောင့်ကြည့်ခြင်းကို ခံရဖွယ်ရှိသည်။ (ဘားတစ်ခုမှ ပြန်လာသည့် နိုင်ငံခြားသူ အမျိုးသမီးတစ်ယောက်က တက္ကဆီယာဉ်မောင်းတစ်ဦး၏ ကိုယ်ထိလက်ရောက် ကျူးလွန်းခြင်းအား ခံခဲ့ရသည်ဟူသော စွပ်စွဲချက်များ ပေါ်ပေါက်လာပြီးနောက် ၂၀၁၅ ခုနှစ်တွင် ယခင်က လျစ်လျူရှုထားခဲ့သည့် ည ၁၁ နာရီ ဆိုင်များပိတ်ရန်အမိန့်ကို ရဲတပ်ဖွဲ့က ပြန်လည်တင်းကြပ်ခဲ့သည်။)

လာဘ်ထိုးမည်မဟုတ်သည့် (လာဘ်ပေးမှုများ ကျိန်းသေပေါက် ရှိနိုင်သော်ငြားလည်း ဤလုပ်ရပ်တွင် ကလည်း ပြဿနာရပ်များ ရှိနေသေးသည်) နိုင်ငံခြားသားပိုင် အဖျော်ယာမကာဆိုင်များအနေဖြင့် သတ်မှတ်ထားသော စည်းမျဉ်းစည်းကမ်းများအတိုင်း မဖြစ်မနေ လုပ်ဆောင်ရပြီး စည်းမျဉ်းစည်းကမ်းများမှာလည်း ရှည်လျား များပြားလှပေသည်။

“စားသောက်ဆိုင်တစ်ဆိုင်ဖွင့်ဖို့အတွက် လိုအပ်တဲ့ လက်ရှိစည်းမျဉ်းစည်းကမ်းတွေမှာ အနီးဆုံး အိမ်နီးနားချင်းတွေနဲ့ ကိုက် ၁၀၀ အတွင်းက စီးပွားရေးလုပ်ငန်းရှင်တွေထံက သဘောတူလက်မှတ် ၁၀ ခု လိုအပ်တာလည်း ပါဝင်ပါတယ်။ အကျိုးအမြတ်တူ ပဋိပက္ခတွေ ပေါ်ပေါက်လာမယ်ဆိုတာ သိသာ ထင်ရှားပေမယ့် ကျွန်တော်တို့အားလုံး ကျော်လွှားရမယ့် စိန်ခေါ်မှုတစ်ခုဖြစ်ပါတယ်” ဟု လန့်စ်က ရှင်းပြသည်။ “လူသွားလူလာ များလာနိုင်တဲ့ အခြေအနေကို မြင်သာအောင်  အခြားလုပ်ငန်းရှင်တွေကို ကျွန်တော်တို့က ပြသပြီး စည်းရုံးဖို့ ကြိုးစားရပါတယ်” ဟုလည်း ၎င်းက ဖြည့်စွက်ပြောကြားသည်။

“ဒီလုပ်ငန်းတစ်ခုလုံးအတွက် ရယ်စရာကောင်းတဲ့ အကြောင်းတစ်ခုကတော့ ခင်ဗျားရဲ့လိုင်စင်ကို နှစ်တိုင်း သက်တမ်းတိုးရတာပါ” ဟု ၎င်းဆိုသည်။

ကာဆီ၏ အဆိုအရ ဤလုပ်ငန်းတွင် သေးငယ်သည့် အစိတ်အပိုင်းအဖြစ် ပါဝင်နေသည့် အိမ်ခြံမြေ ငှားရမ်းသူများ၏ သဘောသဘာဝအရ မငှားရမ်းမီ ငှားရမ်းခ အပြည့်အဝ ပေးချေရခြင်းကလည်း စားသောက်ဆိုင်များနှင့် အဖျော်ယမကာဆိုင်များအတွက် ပိုမိုစွန့်စားရသည့် ခက်ခဲသော အခြေအနေတွင် ရှိနေစေသည်။ ပုံမှန်အားဖြင့် ဆိုင်ခန်းငှားရမ်းရန်အတွက် ၁၂ လစာ ငွေကြေး ကြိုတင်ပေးချေရသည့်အပြင် တစ်လစာ ငှားရမ်းခနှင့် ညီမျှသော ပွဲစားခကိုလည်း ပေးချေရသည်။ လိုင်စင်ပြဿနာများ၊ သို့မဟုတ် အိမ်နီးချင်းများနှင့် အငြင်းပွားမှုများကြောင့် လုပ်ငန်းပိတ်သွားခြင်း၊ သို့မဟုတ် ဖွင့်လှစ်နိုင်ခြင်း မရှိခဲ့ပါက ငှားရမ်းခများ ဆုံးရှုံးသွားမည်ဖြစ်သည်။

“အဓိက ပြဿနာက ငွေကြေးစီးဆင်းမှုပါ။ ခင်ဗျားထံမှာ လုပ်ငန်းစလုပ်ဖို့အတွက် အရင်းအနှီး များများရှိဖို့ လိုအပ်ပါတယ်” ဟု ကာစီက ဆိုသည်။ “မီးဖိုချောင်သုံ ပစ္စည်းတွေနဲ့ ကနဦး ရင်းနှီးမြုပ်နှံမှု ကုန်ကျစရိတ် အပိုင်းမှာလည်း ရွေးချယ်စရာ များများစားစားမရှိလို့ ကုန်ကျမှု ပိုများပါတယ်” ဟု ၎င်းကပြောသည်။

သင့်ဘားအကြောင်း သိရှိနားလည်ပါစေ

အဖျော်ယာမကာဘားများ၏ အခြေအနေမှာ တစ်ဖြည်းဖြည်းခြင်း ပြန်လည်ကောင်းမွန်လာလိမ့်မည်ဟု လန့်စ်က ယုံကြည်ထားသည်။ အလယ်အလတ်တန်းစား လူတန်းစားအသိုင်းအဝိုင်းမှာ မျှော်မှန်းသည်ထက် နှေးကွေးစွာ တိုးပွားလာနေသော်လည်း ဆက်လက်ပြီး ကြီးထွားနေဆဲ ဖြစ်သည်။

တစ်ချိန်တည်းတွင် “လုပ်ငန်းရှင်တိုင်းက သူတို့ပစ်မှတ်ထားတဲ့ ဖောက်သည်ကို ရှာဖွေဖို့ လိုအပ်ပါတယ်။ ကျောပိုးအိတ်လွယ် ခရီးသွားတွေက Penthouse ကို မသွားကြပါဘူး။ ဒါက သူတို့ လာကြည့်မယ့် ရှုခင်းနေရာမျိုး မဟုတ်သလို သူတို့သုံးစွဲမယ့် ငွေကြေးလျာထားမှု စာရင်းမှာလည်း ပါဝင်ဖွယ် မရှိပါဘူး။  ခင်ဗျားအနေနဲ့ လိုက်လျာညီထွေ ပြောင်းလဲဖို့ လိုအပ်ပါတယ်။ ဒီမှာရှိတဲ့ လူတော်တော်များများကို ဒါကို သဘောမပေါက်ကြပါဘူး” ဟုလည်း ၎င်းကဆိုသည်။

အနောက်တိုင်းပုံစံ အဖျော်ယမကာဆိုင်များအတွက် 50th Street က အစဉ်သဖြင့်ဆိုသလို စံနမူနာကောင်း တစ်ခုဖြစ်နေသော်လည်း ၎င်း၏ ပုံမှန်ဖောက်သည်မှာ အိန္ဒိယလူမျိုးများဆိုသည်ကို သတိပြုမိကြောင်း လန့်စ်က ဆိုခဲ့သည်။ “ကျွန်တော့်ကို တစ်ယောက်ပြီးတစ်ယောက် ပြောလာကြတဲ့အချက်က ကျွန်တော့ရဲ့ မီနျူးးမှာ အိန္ဒိယဟင်းပွဲအနည်းငယ်ပါမယ်ဆိုရင် သူတို့တကယ်ကို ပျော်မယ်ဆိုတဲ့အကြောင်းပါ။ ဒီလူတွေက တစ်ပတ်မှာ ငါးရက်လောက် ဘိလိယက် လာထိုးကြတဲ့အတွက် ခင်ဗျားအနေနဲ့ ဒီလူတွေရဲ့ စကားကို နားထောင်သင့်တယ် ဆိုတာပါဘဲ။ ခင်ဗျားအနေနဲ့ ကိုယ့်အခြေအနေကို ပြန်ကြည့်သင့်တယ်လေ။ ဘာလို့လည်းဆိုတော့ သူတို့က ခင်ဗျားကို လစာပေးနေလို့လေ” ဟု ၎င်းကပြောသည်။

“လိုက်လျောညီထွေ ပြောင်းလဲမှု” ဆိုသည်မှာ သင့်စိတ်ကူးနှင့် တစ်ထပ်တည်းမကျသော်လည်း အလုပ်ဖြစ်မည့် အစီအစဉ်အတိုင်း ဆောင်ရွက်လိုစိတ်ရှိခြင်းကို ဆိုလိုခြင်းဖြစ်သည်။ ဥပမာ သင်က စားသောက်ဆိုင် ဖွင့်ထားပြီး လူအများစုက ညမိုးချုပ်သည့် အချိန်များတွင် လာရောက်စားသောက်ကြခြင်း ဖြစ်ပါက ဤအခြေအနေနှင့်အညီ လိုက်လံဆောင်ရွက်ပြီး သင်၏ စားသောက်ဖွယ်စာရင်းကို လျော့ချကာ စိတ်ဝင်စားဖွယ် ကော့တေးလ်အချို့ကို ဖြည့်စွက်ခြင်းနှင့် ညနက်ပိုင်းအချိန် ပွဲများကို ကျင်းပပေးခြင်း ဖြစ်သည်။

“ခင်ဗျားက ဒီလုပ်ငန်းကနေ ကြွယ်ဝချမ်းသာလာမှာ မဟုတ်ပါဘူး” ဟု လန့်စ်က ဆက်လက် ပြောကြားသည်။ “ခင်ဗျားအနေနဲ့ ခိုင်မာတဲ့ အခြေအနေတစ်ခုကို ဖန်တီးပြီး အရောင်းအဝယ်ကောင်းတဲ့ အချိန်အထိ စောင့်နေရပါမယ်” ဟုလည်း ၎င်းကဆိုသည်။

ကာစီကမူအရောင်းအဝယ်ပြန်ကောင်းမည့် အချိန်အထိ စောင့်ဆိုင်းနေခြင်း မရှိပေ။ မိုဂျို၏ တံခါးများကို ပိတ်ပစ်ရန် ခက်ခဲသော်လည်း ရန်ကုန်ရှိ အခြားအခွင့်အရေးများကို လုပ်ကိုင်ရန် စိတ်လှုပ်ရှားမိသည်ဟု ၎င်းကဆိုသည်။ “ကျွန်တော့်ရဲ့ အသည်းအတွက်လည်း တော်တော်လေး ပျော်ရွှင်မိပါတယ်” ဟုလည်း ၎င်းက ဆိုလိုက်သေးသည်။

ခေါင်းစီးဓာတ်ပုံ-သိမ့်မွန်စိုး (J)

အောင်မင်း ဘာသာပြန်သည်။

ဂျာရတ်ဒေါင်းနင်း

ဂျာရတ်ဒေါင်းနင်း

ဂျာရတ်ဒေါင်းနင်းသည် ကိုလိုရာဒိုနှင့် အလာဘားမားပြည်နယ်မှ အမေရိကန် သတင်း သမားတစ်ဦး ဖြစ်သည်။ အင်တာနက်အသံဖိုင် လွှင့်တင်ခြင်း၊ အသံလွှင့်ခြင်းနှင့် ကားကြုံလိုက်စီးရခြင်းတို့ကို ဝါသနာပါသည်။ နောက် သူ့ဝါသနာတစ်ခုမှာ ကမ္ဘာတစ်လွှားက ဆာဒင်းငါး သေတ္တာဘူးခွံများ စုဆောင်းခြင်း ဖြစ်သည်။

Share on facebook
Share on twitter
Share on email

More stories

ရန်ကုန်ရှိ လူနေထူထပ်သော ရပ်ကွက်များတွင် COVID-19 ကူးစက်နိုင်ခြေများနေခြင်းက ရန်ကုန်မြို့အုပ်ချုပ်ရေးအဖွဲ့ရှိ ကာလရှည်ကြာပြီဖြစ်သော ပြဿနာများကို အရေးတကြီးပြင်ဆင်တည့်မတ်ရန် လိုအပ်နေကြောင်း မီးမောင်းထိုးပြနေသည်။

Latest Issue

Stay on top of Myanmar current affairs with our Daily Briefing and Media Monitor newsletters

Our fortnightly magazine is available in print, digital, or a combination beginning at $80 a year

Sign up for our Frontier Fridays newsletter. It’s a free weekly round-up featuring the most important events shaping Myanmar