ရုရှားထံမှ YAK-130 တိုက်လေယာဉ်ခြောက်စီးကို မြန်မာက ထပ်မံရရှိမည်

ရုရှားထုတ် YAK-130 အမျိုးအစား တိုက်ခိုက်ရေးနှင့် လေ့ကျင့်ရေး လေယာဉ် နောက်ထပ် ခြောက်စီးကို မြန်မာနိုင်ငံသို့ ပေးပို့မည်ဟု ရုရှားတာဝန်ရှိသူတစ်ဦးကို ကိုးကားပြီး ရုရှားသတင်းဌာနတစ်ခုက ရေးသားထားသည်။

“YAK-130 တိုက်ခိုက်ရေးနဲ့ လေ့ကျင့်ရေး ခြောက်စီးကို ထပ်မံပေးပို့ဖို့အတွက် မြန်မာနိုင်ငံနဲ့ သဘောတူညီချက်ကို ၂၀၁၆ ခုနှစ်၊ ဒီဇင်ဘာလမှာ လက်မှတ်ရေးထိုးခဲ့ပါတယ်” ဟု ရုရှားနိုင်ငံ Federal Service for Military-Technical Cooperation (FSMTC) ၏ ဒုတိယညွှန်ကြားရေးမှူး Mikhail Petukhov က စင်ကာပူတွင် ကျင်းပနေသည့် စင်ကာပူလေကြောင်းပြပွဲ-၂၀၁၈ ၌ ပြောကြားကြောင်း Sputnik သတင်းဌာနက ယမန်နေ့တွင် ရေးသားထားသည်။

ကာကွယ်ရေးကဏ္ဍ ပူးပေါင်းဆောင်ရွက်ရေးဆိုင်ရာ ရုရှားသမ္မတ၏ လက်ထောက်ဖြစ်သူ Vladimir Kozhin ကလည်း မြန်မာနိုင်ငံအနေဖြင့် ထိုလေယာဉ်များကို ၂၀၁၈ ခုနှစ်အတွင်း လက်ခံရရှိလိမ့်မည်ဟု အဆိုပါနေ့ အစောပိုင်းက ပြောကြားခဲ့သေးသည်။

အဆိုပါ YAK-130 လေယာဉ်များ ဝယ်ယူရေးအတွက် ပထမဆုံး သဘောတူညီချက်ကို မြန်မာနိုင်ငံ ကာကွယ်ရေး ဝန်ကြီးဌာနနှင့် ရုရှားတို့အကြား ၂၀၁၅ ခုနှစ်၊ ဇွန်လက လက်မှတ်ရေးထိုးခဲ့သည်ဟု သတင်းတွင် ဆက်လက် ရေးသားထားသည်။

ပထမအသုတ် လေယာဉ်များအား ပေးပို့လိုက်ပြီးဖြစ်သည်ဟု Petukhov က ၂၀၁၇ ခုနှစ်၊ မတ်လအတွင်းက လန်ကာဝီအပြည်ပြည်ဆိုင်ရာ လေကြောင်းနှင့် အာကာသနည်းပညာပြပွဲ (LIMA-2017) တွင် ပြောကြားခဲ့သည်။

ပြီးခဲ့သည့် ဒီဇင်ဘာ ၁၅ ရက်နေ့က ပြုလုပ်ခဲ့သည့် တပ်မတော်(လေ) သို့ လေယာဉ်များ တပ်တော်ဝင်ပွဲတွင် YAK-130 လေယာဉ်ခြောက်စင်းပါဝင်ခဲ့သည်ကို တပ်မတော်၏ သတင်းထုတ်ပြန်ချက်အရ သိရသည်။

တစ်စင်းလျှင် အမေရိကန်ဒေါ်လာ ၁၅ သန်းခန့် တန်ကြေးရှိသည့် Yak-130 များသည် ခေတ်မီ ဂျက်တိုက်လေယာဉ်များ၏ စွမ်းဆောင်ရည်မျိုးရှိသည့် ကမ္ဘာ့တစ်ခုတည်းသော လေ့ကျင့်ရေး တိုက်လေယာဉ် ဖြစ်သည်။ ထိုင်ခုံနှစ်ခုပါပြီး ထောက်လှမ်းရေးနှင့် အသေးစား ဂျက်တိုက်လေယာဉ်လည်းဖြစ်သော Yak-130 တွင် လက်နက်အလေးချိန် ကီလိုဂရမ် ၃,၀၀၀ အထိ သယ်ဆောင်နိုင်သည်။

မြန်မာနိုင်ငံတွင် ၂၀၁၇ ခုနှစ်မကုန်မီ အထူးတိုက်လေယာဉ် ပျံသန်းမှု လေ့ကျင့်ရေးစက်တစ်ခု တပ်ဆင်ရန် ရုရှားကျွမ်းကျင်သူများက စီစဉ်နေသည်ဟုလည်း သတင်းအချို့တွင် ရေးသားထားသည်။

ရုရှားက မြန်မာနိုင်ငံသို့ Su-30 တိုက်လေယာဉ်ခြောက်စီး ရောင်းချပေးရန်လည်း ယခုနှစ်အစောပိုင်းက သဘောတူညီထားပြီး မြန်မာနိုင်ငံ၏ တိုင်းပြည် ကာကွယ်ရေးစွမ်းရည်ကို ပိုမိုကောင်းမွန်လာစေရန် စစ်လက်နက်နည်းပညာကဏ္ဍတွင် ပူးပေါင်းဆောင်ရွက်နေသည်ဟုလည်း ပြောကြားထားသည်။

Share on facebook
Share on twitter
Share on email

More stories

Latest Issue

Support our independent journalism and get exclusive behind-the-scenes content and analysis

Stay on top of Myanmar current affairs with our Daily Briefing and Media Monitor newsletters.

Sign up for our Frontier Fridays newsletter. It’s a free weekly round-up featuring the most important events shaping Myanmar