ရန်ကုန်မြို့နှင့် တရုတ်နိုင်ငံ၊ ရှန်ဟိုင်းမြို့တို့အကြား တိုက်ရိုက်လေကြောင်းခရီးစဉ်ကို ဇွန် ၁၉ ရက်နေ့က စတင်ပြီး China Eastern Airlines က စတင်ပြေးဆွဲနေပြီဖြစ်သည်။
တရုတ်နိုင်ငံ၏ အကြီးဆုံးမြို့ဖြစ်သည့် ရှန်ဟိုင်းနှင့် ရန်ကုန်မြို့အကြား ပျံသန်းပြေးဆွဲချိန် လေးနာရီ မိနစ် ၅၀ ခန့်ကြာမြင့်မည်ဖြစ်ကာ တစ်ပတ်လျှင် သုံးကြိမ်ပြေးဆွဲသွားမည်ဟု ရန်ကုန်အပြည်ပြည်ဆိုင်ရာလေဆိပ်အား စီမံခန့်ခွဲနေသည့် Yangon Aerodrome Co., Ltd. က ကြေညာသည်။ ခရီးစဉ်အတွက် Airbus A320 လေယာဉ်အမျိုးအစားကို အသုံးပြုမည်ဟုလည်း ကြေညာချက်တွင် ဖော်ပြထားသည်။
တရုတ်နိုင်ငံမှ လေကြောင်းလိုင်းတစ်ခုဖြစ်သည့် China Eastern Airlines အတွက် ရန်ကုန်-ရှန်ဟိုင်းခရီးစဉ်သည် ရန်ကုန်နှင့် တရုတ်မြို့ကြီးများအကြား တိုက်ရိုက်ချိတ်ဆက်ပြေးဆွဲသည့် ကိုးခုမြောက် ခရီးစဉ်လည်းဖြစ်သည်။ ထို့ကြောင့် ရန်ကုန်နှင့် တရုတ်မြို့ကြီးများအား တိုက်ရိုက်ပြေးဆွဲပေးနေသည့် တရုတ်လေကြောင်းလိုင်းများတွင် ခရီးစဉ်အများဆုံးပြေးဆွဲသည့် လေကြောင်းလိုင်းလည်းဖြစ်လာသည်။
China Eastern Airlines အနေဖြင့် ၂၀၁၉ ခုနှစ်တွင် မြန်မာနှင့် တရုတ်နိုင်ငံအကြား ခရီးသည် ၃၆၀,၀၀၀ ခန့်အထိ သယ်ယူပို့ဆောင်ပေးသွားရန် ရည်ရွယ်ထားကြောင်း လေကြောင်းလိုင်းက ပြောကြားသည်။
