ရန်ကုန်တက္ကစီဈေးကွက် ယှဉ်ပြိုင်မှု အရှိန်မြင့်တက်

ကမ္ဘာတွင် ထင်ရှားသောလုပ်ငန်းတစ်ခုနှင့် လျင်မြန်စွာ ကြီးထွားလာလျက်ရှိသော ဒေသဆိုင်ရာ ကုမ္ပဏီတစ်ခုတို့ ရှိနေချိန်တွင် ပြည်တွင်းမှကုမ္ပဏီသစ်နှစ်ခု အပြိုင်ပေါ်ထွက်လာသဖြင့် အငှားတက္ကစီဈေးကွက်တွင် ကြောက်မက်ဖွယ် ယှဉ်ပြိုင်မှုကြီး ဖြစ်ပေါ်လာသည်။

ဆင်းလီ ရေးသားသည်။

ယခုနှစ် နှစ်ဦးပိုင်းက ဈေးကွက်အတွင်းသို့ ထင်ရှားသော နိုင်ငံခြားကုမ္ပဏီနှစ်ခု ဝင်ရောက်လာပြီးနောက်ပိုင်း ရန်ကုန်မြို့တွင် တက္ကစီဖောက်သည် ရရှိရေးအတွက် ယှဉ်ပြိုင်မှုက ပြင်းထန်လာသည်။

အရှေ့တောင်အာရှ တက္ကစီကုမ္ပဏီကြီး ဂရက်ဘ် Grab သည် အစမ်းလေးလ ပြေးဆွဲပြီးနောက် ဇူလိုင် ၂၆ ရက်တွင် ရန်ကုန်မြို့၌ တရားဝင် စတင်ပြေးဆွဲခဲ့သည်။ ကမ္ဘာ့ကုမ္ပဏီကြီး တစ်ခုဖြစ်သော အူဘာ Uber က ဧပြီ ၂၆ ရက်က စီးပွားရေးမြို့တော် ရန်ကုန်တွင် လုပ်ငန်းများ စတင်ဆောင်ရွက်ခဲ့သည်။

နိုင်ငံခြား စီးပွားရေးလုပ်ငန်းများသည် လွန်ခဲ့သော တစ်နှစ်ကျော်က ဝန်ဆောင်မှုလုပ်ငန်းများ စတင်ခဲ့သည့် ပြည်တွင်း ကုမ္ပဏီသစ်များဖြစ်သော ဟယ်လိုကက်ဘ်စ် HelloCabs နှင့် အိုးဝေရိုက်ဒ် Oway Ride တို့နှင့် ယှဉ်ပြိုင်လျက်ရှိကြသည်။ ဈေးကွက်ဝေစုအတွက် ဖြစ်လာသောတိုက်ပွဲက အနည်းဆုံးအားဖြင့် လောလောဆယ်တွင် လျှော့ဈေးနှင့် ဈေးကွက်မြှင့်တင်ရေးကို ခံစားခွင့်ရကြသော ယာဉ်မောင်းများနှင့် ဖောက်သည်များအတွက် အခွင့်အလမ်းကောင်း တစ်ရပ်ဖြစ်ခဲ့သည်။

အော်ဒါများကို ပိုမိုလက်ခံပြီး ဖောက်သည်ဝန်ဆောင်မှုကို ပိုမိုကောင်းမွန်အောင် ဆောင်ရွက်နိုင်စေရန် သူတို့၏ နည်းလမ်းစနစ်များကို အဆင်မြှင့်တင်လျက်ရှိကြောင်း မြန်မာကုမ္ပဏီ နှစ်ခုစလုံးက ပြောသည်။ ဂရက်ဘ်နှင့် အူဘာတိ့ုကပေးသော ဝန်ဆောင်မှုမျိုးကို တန်းတူပေးနိုင်ရေးအတွက် ယင်း၏တက္ကစီများကို ချက်ချင်းကြိုတင် မှာကြားနိုင်သော အက်ပလီကေးရှင်းသစ်တစ်ခုကို စတင်ဆောင်ရွက်ဖို့ ပြင်ဆင်နေကြောင်း အိုးဝေရိုက်ဒ်က သြဂုတ်လလယ်တွင် ပြောသည်။

ယှဉ်ပြိုင်မှု ပြင်းထန်လျက်ရှိသော်လည်း တက္ကစီ ဝန်ဆောင်မှုလုပ်ငန်းအားလုံးက မီတာဖြင့် ယာဉ်စီးခ တောင်းခံသောစနစ် ကျင့်သုံးရေးနှင့် ကောင်းစွာလေ့ကျင့်ထားသော ယာဉ်မောင်းများ မောင်းနှင်သည့် ယာဉ်များဖြင့် ဘေးအန္တရာယ်ကင်းရှင်းစွာ ခရီးသွားလာနိုင်ရေးဟူသော တူညီသည့် ရည်မှန်းချက်ကို ထားရှိကြသည်။ ယင်းယာဉ်မောင်းများသည် ပုံမှန်တက္ကစီများကို မောင်းနေကြသော ယာဉ်မောင်းများထက် ဝင်ငွေပိုမိုရနိုင်ကြောင်း ကုမ္ပဏီများက ပြောသည်။

လောလောဆယ်တွင် ဝန်ဆောင်မှုများကို ရန်ကုန်မြို့တွင်သာ ရနိုင်သေးသည်။ ယခုအစီအစဉ်မှာ လိုင်စင်ရ တက္ကစီယာဉ်မောင်းများနှင့် အစုစပ် ဆောင်ရွက်သောလုပ်ငန်းဖြစ်ပြီး ခရီးသည်များက ပုဂ္ဂလိကယာဉ်များကို ငှားနိုင်သော ပင်လယ်ရပ်ခြားမြို့တော်များရှိ အစီအစဉ်များနှင့် ကွဲပြားခြားနားသည်။

တီထွင်ဆန်းသစ်မှုကို အလေးပေးသော ဂရက်ဘ်

မစ္စ တန်ဟွီလင်းသည် ဇူလိုင်လတွင် တရားဝင် စတင်မပြေးဆွဲမီ ရန်ကုန်မြို့၌ မတ်လအတွင်းက စမ်းသပ်ပြေးဆွဲခဲ့သည့် စင်ကာပူအခြေစိုက် ဂရက်ဘ်တက္ကစီကုမ္ပဏီကို ပူးတွဲတည်ထောင်ခဲ့သူ တစ်ဦးဖြစ်သည်။ ဂရက်ဘ်သည် ဒေသတွင်း ခုနစ်နိုင်ငံရှိ မြို့ပေါင်း ၆၅ မြို့၌ လုပ်ငန်းများ ဆောင်ရွက်လျက်ရှိပြီး ယာဉ်မောင်း ၁ ဒသမ ၁ သန်းကို ခန့်ထားခဲ့သည်။

စမ်းသပ်ကာလ လေးလအတွင်း ဂရက်ဘ်တွင် မှတ်ပုံတင်ဆောင်ရွက်ခဲ့သော တက္ကစီယာဉ်မောင်း ၅,၀၀၀ ကျော်ရှိခဲ့ပြီး စစ်တမ်းများအရ ယာဉ်မောင်းများ၏ဝင်ငွေမှာ ရာခိုင်နှုန်း ၃၀ မြင့်တက်ခဲ့ကြောင်း မစ္စ တန်က ပြောသည်။ သို့သော် ဖောက်သည်အရေအတွက်ကို ထုတ်ဖော်ပြောကြားခဲ့ခြင်း မရှိပေ။

စမ်းသပ်ကာလအတွင်း တုံ့ပြန်ပြောကြားချက်များအရ အဓိကပြဿနာသုံးရပ်ကို တွေ့ရကြောင်း ၎င်းက ပြောသည်။ ယင်းတို့မှာ အသုံးပြုသူတို့က မိုဘိုင်းအက်ပလီကေးရှင်းကို မရင်းနှီးသေးခြင်း၊ ဘေးအန္တရာယ် လုံခြုံရေးပြဿနာများကြောင့် ည ရှစ်နာရီနောက်ပိုင်းတွင် အသုံးပြုမှု သိသိသာသာ လျော့ကျခြင်းနှင့် ခရီးသည်များကို သွားခေါ်ရမည့်နေရာ ရှာဖွေရာတွင် ယာဉ်မောင်းများ အခက်အခဲရှိခြင်းတို့ဖြစ်သည်။

ဒေါင်းလုတ် သန်း ၅၀ ကျော် ရထားသည့် ဂရက်ဘ်သည် တက္ကစီစီးခရီးသည်နှင့် ယာဉ်မောင်း နှစ်ဦးစလုံးအတွက် ပိုမိုကောင်းမွန်သော အတွေ့အကြုံများရရှိအောင် ဆောင်ရွက်လျက်ရှိရာ ပြန်လည်တုံ့ပြန်မှုကို အခြေခံသော “နည်းပညာဆိုင်ရာ ရင်းနှီးမြှုပ်နှံမှုများ” ကို အလေးပေး ဆောင်ရွက်နေကြောင်း မစ္စ တန်က ပြောသည်။ ဂရက်ဘ်သည် ခရီးသည်များကို သွားခေါ်ရာတွင် စောင့်နေရချိန်ကို လျှော့ချနိုင်ရန် ဂျာမန်မော်တော်ယာဉ် ကုမ္ပဏီများအဖွဲ့ပိုင် မြေပုံအက်ပလီကေးရှင်းဖြစ်သည့် ဟီးဝီဂိုး Here WeGo နှင့် ပူးပေါင်းဆောင်ရွက်လျက်ရှိသည်။

ဂရက်ဘ်က မြန်မာနိုင်ငံ၌ လာမည့် သုံးနှစ်အတွင်း ယင်း၏လုပ်ငန်းများ ချဲ့ထွင်ရန် အမေရိကန်ဒေါ်လာ သန်း ၁၀၀ သုံးစွဲရန်စီစဉ်ထားကြောင်း ကြေညာထားသည်။ ဓာတ်ပုံ - သိမ့်မွန်စိုး(ဂျေ)

ဂရက်ဘ်က မြန်မာနိုင်ငံ၌ လာမည့် သုံးနှစ်အတွင်း ယင်း၏လုပ်ငန်းများ ချဲ့ထွင်ရန် အမေရိကန်ဒေါ်လာ သန်း ၁၀၀ သုံးစွဲရန်စီစဉ်ထားကြောင်း ကြေညာထားသည်။ ဓာတ်ပုံ – သိမ့်မွန်စိုး(ဂျေ)

ဂရက်ဘ်၏ ဘာသာပြန်စနစ် တစ်ခုဖြစ်သည့် ဂရက်ဘ်ချတ် GrabChat သည် အင်္ဂလိပ်စကားပြော ခရီးသည်များနှင့် မြန်မာယာဉ်မောင်းများ ဆက်သွယ်ပြောကြားနိုင်အောင် အထောက်အကူပေးသည်။ ဘေးအန္တရာယ်အတွက် စိုးရိမ်မှုများကို ထိန်းချုပ်နိုင်ရန်ရည်ရွယ်၍ ဆောင်ရွက်ပေးသော အခြားတီထွင်ဖန်တီးမှု တစ်ခုမှာ လက်ရှိသွားနေသော ခရီးစဉ်အတွင်း ခရီးသည်များအား သူတို့မိတ်ဆွေများနှင့်ပူးတွဲ၍ ခရီးစဉ် မျှဝေသွားလာနိုင်အောင် ဆောင်ရွက်ပေးခြင်းဖြစ်သည်။

ဈေးနှုန်းသတ်မှတ်ချက်နှင့်ပတ်သက်၍ မေးမြန်းရာတွင် ခရီးသည်နှင့် ယာဉ်မောင်းတို့၏ ရောင်းသူဝယ်သူ အခြေအနေပေါ်မူတည်၍ ဆောင်ရွက်ကြောင်း မစ္စ တန်က ပြောသည်။

“ဈေးနှုန်းသတ်မှတ်တာက လုပ်ငန်းတစ်ခုလုံးရဲ့ အစိတ်အပိုင်းတစ်ခုလောက်ပဲ ဖြစ်ပါတယ်။ ဂရက်ဘ်က ဆောင်ရွက်ပေးတဲ့ ဝန်ဆောင်မှုက တိုက်ရိုက်ဝန်ဆောင်မှု ဖြစ်ပါတယ်။ အဆုံးစွန်ပြောရရင် ကျွန်မတို့ အဓိကထားတာက ဖောက်သည်တွေရဲ့တုံ့ပြန်မှုပါ။ သူတို့ နောက်တစ်ကြိမ် ပြန်လာဦးမလား၊ ကျွန်မတို့ အက်ပလီကေးရှင်းကို အကြိမ်ကြိမ် သုံးရဲ့လားဆိုတဲ့အပေါ် တုံ့ပြန်မှုတွေ ဖြစ်ပါတယ်။ မှန်ကန်တဲ့ လုပ်ငန်းဆောင်ရွက်မှု ဖွဲ့စည်းတည်ဆောက်ပုံကို ကျွန်မတို့ ရထားပြီလို့ ယူူဆပါတယ်” ဟု ၎င်းက Frontier ကို ပြောသည်။

အရှေ့တောင်အာရှတွင် ဂရက်ဘ် ဖွံ့ဖြိုးတိုးတက်ရသည့် အဓိကအချက်များမှာ သက်ဆိုင်ရာ ပြည်တွင်းကျွမ်းကျင်သူများနှင့် သက်ဆိုင်ရာနိုင်ငံအလိုက် ဖြေရှင်းမှုများကို ဆောင်ရွက်ရန် ရင်းနှီးမြှုပ်နှံခြင်း၊ ပြဿနာများကို ဖြေရှင်းရန် အမြဲတန်း အပတ်တကုပ် ကြိုးပမ်းဆောင်ရွက်ခြင်းနှင့် လုပ်ငန်းဆောင်ရွက်မှုနှင့် နည်းပညာဗဟုသုတ နှစ်မျိုးစလုံးရှိသူများကို ရွေးချယ်ပြီး ပူးတွဲဆောင်ရွက်ခြင်းတို့ကြောင့် ဖြစ်ကြောင်း မစ္စ တန်က ပြောသည်။

နောက်ထပ်မြို့နယ်များတွင် တက္ကစီဝန်ဆောင်မှု တိုးချဲ့ဆောင်ရွက်ရေး၊ ဂရက်ဘ်ပေး GrabPay ဟုခေါ်သော ဒစ်ဂျစ်တယ် ငွေပေးချေမှုစနစ် စတင်ဆောင်ရွက်ရေးနှင့် ဝန်ထမ်းဦးရေ ၂၀၀ အထိ ပါဝင်သော ရုံးအဖွဲ့ ဖွဲ့စည်းရေးတို့ အပါအဝင် မြန်မာနိုင်ငံတွင် လုပ်ငန်းများ တိုးချဲ့နိုင်ရေးအတွက် လာမည့်သုံးနှစ်ကျော်အတွင်း အမေရိကန်ဒေါ်လာ သန်း ၁၀၀ ရင်းနှီးမြှုပ်နှံသွားမည်ဖြစ်ကြောင်း ဂရက်ဘ်က သြဂုတ်လနှောင်းပိုင်းတွင် ကြေညာခဲ့သည်။

ထူးခြားသော တစ်ရက်ကို ဘွတ်ကင် ကျပ် ၂၅,၀၀၀ နှင့် ယာဉ်မောင်း ၆,၀၀၀ ကို မှတ်ပုံတင်ရကြောင်း ဂရက်ဘ်၏ သတင်းထုတ်ပြန်ချက်တွင် ဖော်ပြသည်။

လုပ်ငန်းရှေ့ဆောင် အူဘာ

ကမ္ဘာ့တက္ကစီလုပ်ငန်း ရှေ့ဆောင်ကြီး အူဘာကို ၂၀၁၀ ပြည့်နှစ်က ဆန်ဖရန်စစ္စကို၌ စတင်ဆောင်ရွက်ခဲ့ခြင်းဖြစ်ပြီး၊ ယခုအခါ ကမ္ဘာတစ်ဝန်းရှိ မြို့ကြီးပေါင်း ၄၅၀ ကျော်တွင် လုပ်ငန်းများ ဆောင်ရွက်လျက်ရှိသည်။ ယင်း၏ဝန်ဆောင်မှုကို ဆောင်ရွက်ပေးသောနိုင်ငံနှင့် ပိုင်နက်နယ်မြေများအနက် မြန်မာနိုင်ငံသည် ၇၆ ခုမြောက်နိုင်ငံဖြစ်သည်။

ရန်ကုန်မြို့တွင် “ယုံကြည်အားထားရသော သယ်ယူပို့ဆောင်ရေးအတွက် စစ်မှန်သော ဝယ်လိုအား”ကို တွေ့ရကြောင်း လစဉ် ခရီးသည် သန်း ၄၀ ကျော်နှင့် ယာဉ်မောင်း ၁ ဒသမ ၅ သန်း ရရှိထားသည်ဟုဆိုသော အူဘာက Frontier  သို့ ပေးပို့သောအီးမေးလ်တွင် ဖော်ပြထားသည်။

အသုံးပြုသူ အရေအတွက်ကို ပြောပြရန် ကုမ္ပဏီက ငြင်းဆိုသော်လည်း ခရီးသည်များနှင့် ယာဉ်မောင်းများ၏ တုံ့ပြန်မှုမှာ “စိတ်လှုပ်ရှားဖွယ်ကောင်း”ကြောင်း ပြောသည်။

မေ ၁၁ ရက်က ရန်ကုန်မြို့၌ ပြုလုပ်ခဲ့သည့် ကုမ္ပဏီဖွင့်ပွဲအခမ်းအနားတွင် ကုမ္ပဏီ၏ဝန်ဆောင်မှုကို ဝန်ထမ်းများက ရှင်းပြစဉ်။ ဓာတ်ပုံ - တေဇလှိုင်

မေ ၁၁ ရက်က ရန်ကုန်မြို့၌ ပြုလုပ်ခဲ့သည့် ကုမ္ပဏီဖွင့်ပွဲအခမ်းအနားတွင် ကုမ္ပဏီ၏ဝန်ဆောင်မှုကို ဝန်ထမ်းများက ရှင်းပြစဉ်။ ဓာတ်ပုံ – တေဇလှိုင်

“ကျွန်မတို့က တက္ကစီတွေနဲ့ ပေါင်းစပ်ဆောင်ရွက်တဲ့အတွက် ရန်ကုန်မှာတော့ နည်းပေါင်းစုံနဲ့ ထူးခြားမှုရှိပါတယ်” ဟု အူဘာမြန်မာ၏ အထွေထွေမန်နေဂျာ ဒေါ်အိဖြူလွင်က ပြောသည်။ အခြားမြို့များ၌မူ ပုဂ္ဂလိကယာဉ်များနှင့် ပေါင်းစပ်၍ဆောင်ရွက်သည်။                         

“ရန်ကုန်မှာက တက္ကစီတွေ အများကြီးပါ။ လုပ်ငန်းစတဲ့နေ့ကတည်းက ခရီးသည်တွေနဲ့ ရန်ကုန်မြို့တော်ကို ဝန်ဆောင်မှုပေးရာမှာ ဒီနည်းက ကျွန်မတို့ကို အထောက်အကူ ဖြစ်စေခဲ့ပါတယ်” ဟု ၎င်းက အီးမေးလ်ဖြင့် ပြောသည်။

အူဘာသည် စဉ်ဆက်မပြတ် ဆောင်ရွက်ပေးနိုင်သော အက်ပလီကေးရှင်း၊ လာရောက်ခေါ်ယူချိန် လျင်မြန်မှု၊ ခန့်မှန်းရောက်ရှိချိန် တိကျမှုနှင့် အကောင်းဆုံး ဝန်ဆောင်မှုတို့ကို အလေးထားဆောင်ရွက်သည်။ ပုဂ္ဂလိကယာဉ်များကို ပြိုင်ဖက်အဖြစ် သဘောထားကြောင်း ၎င်းကပြောသည်။

ပုဂ္ဂလိကကားများနေရာတွင် အူဘာဝန်ဆောင်မှုက အစားထိုး ဝင်ရောက်လိမ့်မည်ဟု ယုံကြည်ကြောင်း ဒေါ်အိဖြူလွင်က ပြောသည်။

“ခလုတ်ကလေး တစ်ချက်နှိပ်လိုက်ရုံနဲ့ ကားစီးလို့ရနိုင်တဲ့ အခြေအနေမျိုးနဲ့ အသားကျသွားတဲ့အချိန်ကျရင်၊ လူတွေက ကိုယ်ပိုင်ကားတွေကို အလွယ်တကူ စွန့်ကြမှာပါ” ဟု ၎င်းက Frontier ကို ပြောသည်။

မိမိတို့၏ ယာဉ်မောင်းများကို ဂရုတစိုက် စိစစ်ရွေးချယ်ကြောင်းနှင့် မိမိတို့လုပ်ငန်းစြင်္ကံပေါ်ရှိ ယာဉ်တိုင်းကို စစ်ဆေးရန် ပြင်ပစက်ပြင်များကို အသုံးပြုကြောင်း ကုမ္ပဏီက ပြောသည်။

ရန်ကုန်မြို့တွင်ပထမဆုံး ဟယ်လိုကက်ဘ်စ်

ဟယ်လိုကက်ဘ်စ်သည် ၂၀၁၅ ခုနှစ်တွင် တရားဝင် စီးပွားရေးလုပ်ငန်းအဖြစ် စတင်မဆောင်ရွက်မီ စီးပွားရေးမြို့တော်၌ ၂၀၁၄ ခုနှစ်၌ လုပ်ငန်းများ ဆောင်ရွက်ခဲ့သဖြင့် ရန်ကုန်တွင် ပထမဆုံး တက္ကစီဝန်ဆောင်မှုလုပ်ငန်း ဖြစ်ခဲ့သည်။

ဆော့ဖ်ဝဲအက်ပလီကေးရှင်းများ ခေတ်မီတိုးတက်မှုက တက္ကစီဝန်ဆောင်မှုလုပ်ငန်းများကို အစပြုဆောင်ရွက်ရေးအတွက် လမ်းခင်းပေးခဲ့ကြောင်း ဟဲလိုကက်ဘ်စ်၏ အုပ်ချုပ်မှုဒါရိုက်တာ ဦးအောင်ဝင်းက ပြောသည်။

မြေပုံအက်ပလီကေးရှင်းများ မရနိုင်ခင် ၂၀၁၂ ခုနှစ်ကတည်းကပင် ဦးအောင်ဝင်းသည် တက္ကစီကုမ္ပဏီ တစ်ခုကို စတင်ဆောင်ရွက်ခဲ့သည်။

“ကျွန်တော်တို့က ဒီလုပ်ငန်းကို လုပ်ချင်ခဲ့တာ ကြာပါပြီ။ နည်းပညာ အဆင်သင့်ဖြစ်တာနဲ့ ကျွန်တော်တို့ လုပ်ငန်းစခဲ့တာပါ” ဟု ဟယ်လိုကက်ဘ်စ်လုပ်ငန်း စတင်ဆောင်ရွက်မှုကို ရည်ညွှန်း၍  ၎င်းကပြောသည်။

သူတို့၏ အင်တာနက်ပလက်ဖောင်းတွင် နေ့စဉ်ယာဉ်မောင်း ၁,၂၀၀ နှင့် အော်ဒါ ၂,၀၀၀ ရရှိကြောင်း မကြာသေးမီက ပြုလုပ်သော တွေ့ဆုံမေးမြန်းခန်းတစ်ခုတွင် ဟယ်လိုကက်ဘ်စ်၏ အမှုဆောင်ချုပ် မစ္စတာ အနီဘန် ချာကရာဘော်တီက ပြောသည်။

မြန်မာနိုင်ငံတွင် တက္ကစီ ဝန်ဆောင်မှုလုပ်ငန်းသည် အောင်မြင်မှု ရနိုင်ကြောင်းကို ဟယ်လိုကက်ဘ်စ်က သက်သေပြခဲ့ပြီးဖြစ်ကြောင်း ၎င်းကဆိုသည်။

“ကျွန်တော်တို့ အောင်မြင်မှု ရလာတာတွေ့လို့ ဂရက်ဘ်နဲ့ အူဘာက ဈေးကွက်ထဲကို ဝင်လာတာပါ” ဟု ချာကရာဘော်တီက Frontier ကိုပြောသည်။ ယှဉ်ပြိုင်မှု ပိုမိုမြင့်မားလာသည့် ဈေးကွက်ထဲရှိ ၎င်းတို့၏ လုပ်ငန်းစွမ်းဆောင်ရည်ကို ဟယ်လိုကက်ဘ်စ်က ပိုမိုယုံကြည်မှုရှိကြောင်း ၎င်းကထပ်လောင်းပြောကြားသည်။

ဟယ်လိုကက်ဘ် ဒါရိုက်တာ ဦးအောင်ဝင်း(ဝဲဘက်)နှင့် အမှုဆောင်အရာရှိချုပ် အနီဘန် ချာကရာဘော်တီ။ ဓာတ်ပုံ - ငြိမ်းဆုဝေကျော်စိုး

ဟယ်လိုကက်ဘ် ဒါရိုက်တာ ဦးအောင်ဝင်း(ဝဲဘက်)နှင့် အမှုဆောင်အရာရှိချုပ် အနီဘန် ချာကရာဘော်တီ။ ဓာတ်ပုံ – ငြိမ်းဆုဝေကျော်စိုး

ဟယ်လိုကက်ဘ်စ်သည် အကျိုးအမြတ်ကို ထိန်းထားနိုင်အောင် ဆောင်ရွက်မည်ဖြစ်ပြီး “မည်သည့်အခါမျှ” လျှော့ဈေးဖြင့် ဆောင်ရွက်မည်မဟုတ်ကြောင်း လူသစ်များက ဆောင်ရွက်နေသော ဈေးနှုန်းတိုက်ပွဲကို ရည်ညွှန်း၍ ၎င်းကပြောသည်။

“ယှဉ်ပြိုင်မှု ပြင်းထန်နေတယ်ဆိုတာ ကျွန်တော်ဝန်ခံပါတယ်။ ဒါပေမဲ့ ငွေတွေ ဆက်ဖြုန်းလာပြီဆိုရင် ကုမ္ပဏီကြီးတိုင်းမှာ ပြဿနာတစ်ခုခုနဲ့ ရင်ဆိုင်ရတတ်ပါတယ်။ ခင်ဗျားမှာ ငွေတွေ သန်းချီပြီးရှိနေရင် စီးပွားရေးလုပ်ရတာ လွယ်ကူပါတယ်။ အကျိုးအမြတ်လည်း အများကြီး ပိုရနိုင်ပါတယ်” ဟု ချာကရာဘော်တီက ပြောသည်။

ယာဉ်မောင်းတွေမှာ အနည်းဆုံး အတွေ့အကြုံငါးနှစ်နဲ့ ဒေသန္တရရဲစခန်းမှ ထောက်ခံစာရှိဖို့ သတ်မှတ်ထားပြီး မိမိတို့ယာဉ်မောင်းများသည် အခြားတက္ကစီဝန်ဆောင်မှုလုပ်ငန်းများမှ ယာဉ်မောင်းများထက် ဝင်ငွေ ပိုရစေလိုသောဆန္ဒရှိကြောင်း ၎င်းက ဆိုသည်။ ဟယ်လိုကက်ဘ်စ် ယာဉ်မောင်းများက ပေးရသော ကော်မရှင် ငါးရာခိုင်နှုန်းမှာ ဈေးကွက်ထဲတွင် အနည်းဆုံးနှုန်းဖြစ်ကြောင်း ချာကရာဘော်တီက ပြောသည်။ သို့သော် အခြားကုမ္ပဏီများ၏ ကောက်ခံနှုန်းကို မကြေညာသည့်အတွက် သူ၏ပြောကြားချက် မှန်မမှန်စစ်ဆေး၍ မရနိုင်ပေ။

ပြိုင်ဖက်များက မက်လုံးများကို လျှော့ချချိန် သူတို့ဝင်ငွေ ကျဆင်းလာပါက အခြားယာဉ်မောင်းများသည် ဟယ်လိုကက်ဘ်စ်နှင့် ဆက်သွယ်ဆောင်ရွက်ကြလိမ့်မည်ဟု ၎င်းကခန့်မှန်းထားသည်။

ဟယ်လိုကက်ဘ်စ်သည် ဈေးကွက်အတွင်း ပထမဆုံး ဝင်ရောက်လာသူဖြစ်သဖြင့် ခရီးသည်များ၏ အပြုအမူကို ခန့်မှန်းရာ၌ အသာစီးရထားကြောင်း ချာကရာဘော်တီက ပြောသည်။

“ဘယ်အချိန်မှာ အခေါ်ရှိမယ်၊ ယာဉ်မောင်းတွေကို ဘယ်သွားရမယ်ဆိုတဲ့အချက်တွေကို ပြောနိုင်ဖို့ အနည်းဆုံး တစ်နှစ်၊ သို့မဟုတ် တစ်နှစ်ခွဲလောက် အချိန်လိုပါတယ်။ ခြောက်လလောက်နဲ့ မလုံလောက်ပါဘူး” ဟု ၎င်းကပြောသည်။

“အချက်အလက် စုဆောင်းရတာက အကုန်အကျ များပါတယ်။ ဒါပေမဲ့ ကျွန်တော်တို့မှာ ကိုယ်ပိုင်အချက်အလက်တွေ အများကြီးရှိပြီး ကျွန်တော်တို့ရဲ့အတွေ့အကြုံကနေ ကျွန်တော်တို့ ဖောက်သည်တွေကို အကူအညီပေးနိုင်ပါတယ်”

ကုမ္ပဏီ၏ ရည်မှန်းချက်မှာ ရန်ကုန်တက္ကစီ စီးပွားရေးလုပ်ငန်းကို ပြုပြင်ပြောင်းလဲရန်ဖြစ်ကြောင်း ဦးအောင်ဝင်းက ပြောသည်။

“ကျွန်တော်တို့အတွက် အခွင့်အလမ်းတွေ အများကြီး ရနိုင်တာဆိုတော့ တက္ကစီစီးပွားရေးလုပ်ငန်းကို ကျွန်တော်တို့ ပြုပြင်ပြောင်းလဲဖို့ အများကြီးလိုပါမယ်” ဟု ၎င်းကပြောသည်။ သို့သော်လည်း ယှဉ်ပြိုင်မှုက ပြင်းထန်မည်ဖြစ်ကြောင်း ၎င်းကဝန်ခံသည်။

ပြည်တွင်းဈေးကွက်ကို အလေးပေးသော အိုးဝေရိုက်ဒ်

အိုးဝေရိုက်ဒ်သည် ဝန်ဆောင်မှုလုပ်ငန်းများကို ၂၀၁၆ ခုနှစ်မှ စတင်ဆောင်ရွက်ခဲ့ပြီး လွန်ခဲ့သော ငါးနှစ်မှစ၍ အွန်လိုင်းဘွတ်ကင် ဝန်ဆောင်မှုကို ဆောင်ရွက်ခဲ့သော အိုးဝေဂရု(ပ်)၏ အစိတ်အပိုင်းတစ်ခုဖြစ်သည်။

နိုင်ငံခြားသား ခရီးသွားများနှင့် နိုင်ငံခြားမှ လာရောက်နေထိုင်သူတို့နှင့် နှိုင်းယှဉ်ပါက မြန်မာဖောက်သည်များ၏ တိုးတက်မှု အလားအလာက အများကြီး ပိုမိုတိုးတက်လာနိုင်သည့်အတွက် အိုးဝေရိုက်ဒ်သည် မြန်မာဖောက်သည်များကို အဓိကထားကြောင်း အိုးဝေကုမ္ပဏီလီမိတက်၏ အမှုဆောင်အရာရှိချုပ်နှင့် အုတ်မြစ်ချခဲ့သူ ဦးနေအောင်က ပြောသည်။

“ထုထယ်ကြီးမားတဲ့ ဈေးကွက်ကြီးနဲ့အတူ နေထိုင်ပြီး ဖွံ့ဖြိုးတိုးတက်အောင် ဆောင်ရွက်ဖို့ ကျွန်တော်တို့ ဒီမှာရှိနေပါတယ်။ ပြည်တွင်းဖောက်သည်တွေရဲ့လိုအပ်ချက်က အလွန်ကျယ်ပြန့်ပါတယ်။ သူတို့က အလုပ်အကိုင်၊ စီးပွားရေးလုပ်ငန်းနဲ့ လူမှုရေးကိစ္စတွေအတွက် ဝန်ဆောင်မှုတွေကို မြို့တော်တစ်ခုလုံးမှာ နေရာမရွေး နိစ္စဓူဝ လိုအပ်နေပါတယ်”

ကိန်းဂဏန်းများ ဖော်ပြရန် ၎င်းကငြင်းဆန်သော်လည်း အိုးဝေရိုက်ဒ်သည် ခရီးသည်၊ ယာဉ်မောင်းနှင့် စာရင်းပေးသွင်း မှတ်ပုံတင်သူဦးရေမှာ လစဉ် လျင်မြန်စွာ ဖွံ့ဖြိုးတိုးတက်နေကြောင်း ဦးနေအောင်က ပြောသည်။

ပိုမိုထူးခြားသော အတွေ့အကြုံကို ဖန်တီးပေးရန် ရည်ရွယ်သည့် အစီအစဉ်များကို ထုတ်ဖော်ကြေညာရန် အိုးဝေရိုက်ဒ်က စီစဉ်နေကြောင်း ၎င်းကဆိုသည်။

၂၀၁၆ ဧပြီလအတွင်းက စတင်ဆောင်ရွက်သည့် အိုးဝေရိုက်ဒ်ကုမ္ပဏီ၏ အမှုဆောင်အရာရှိချုပ်နှင့် တည်ထောင်သူ ဦးနေအောင်။ ဓာတ်ပုံ - သိမ့်မွန်စိုး(ဂျေ)

၂၀၁၆ ဧပြီလအတွင်းက စတင်ဆောင်ရွက်သည့် အိုးဝေရိုက်ဒ်ကုမ္ပဏီ၏ အမှုဆောင်အရာရှိချုပ်နှင့် တည်ထောင်သူ ဦးနေအောင်။ ဓာတ်ပုံ – သိမ့်မွန်စိုး(ဂျေ)

အဆင့်တိုးမြှင့်ဆောင်ရွက်မှုများက ဖောက်သည်ဝန်ဆောင်မှုနှင့် ဟယ်လိုကက်ဘ်စ် ကွန်ပျူတာစနစ်အတွက် တိုးတက်မှုများကို ဆောင်ကြဉ်းပေးမည်ဖြစ်သည်။

မန္တလေးတွင်လည်း လုပ်ငန်းတိုးချဲ့ဆောင်ရွက်ရန် စိတ်ကူးစီစဉ်ထားကြောင်း ဦးနေအောင်က ပြောသည်။

ယှဉ်ပြိုင်မှု ပြင်းထန်နေချိန်တွင် အိုးဝေရိုက်ဒ်က အသုံးပြုသူများနှင့် ရေရှည်တည်တံ့ခိုင်မြဲရေးကို အလေးပေး ဆောင်ရွက်လျက်ရှိသည်။

“ခင်ဗျားကားလိုလို့ ခေါ်တဲ့အချိန်မှာ ကားကို အမြန်ဆုံးရဖို့ ကောင်းတာပေါ့” ဟု ၎င်းကဆိုသည်။

ယာဉ်မောင်းများ

အချင်းချင်း ယှဉ်ပြိုင်နေကြသည့်နည်းတူ တက္ကစီ ဝန်ဆောင်မှုလုပ်ငန်းများသည် တက္ကစီယာဉ် ၆၀,၀၀၀ ကျော်နှင့်အတူ ရန်ကုန်တိုင်း ဒေသကြီးအတွင်း၌ လမ်းများကို မျှဝေသုံးစွဲလျက်ရှိသည်။ ယင်းတို့အနက် အများစုမှာ သစ္စာရှိ ပုံမှန်ဖောက်သည် ထုထယ်ကြီးမားစွာ ရရှိထားသူများ ဖြစ်ကြသည်။

ထိုအထဲတွင် အသက် ၅၄ နှစ်ရှိ ဦးသက်နိုင်လည်း ပါဝင်သည်။ ၎င်း၏ အိမ်နီးနားချင်း ပုံမှန်စီးသူများနှင့်ပင် လက်မလည်နိုင်အောင် ရှိနေသည့်အတွက် တက္ကစီဝန်ဆောင်မှုလုပ်ငန်းများ၏ ယှဉ်ပြိုင်မှုက ၎င်းအတွက် အဟန့်အတားမဖြစ်ကြောင်း Frontier ကိုပြောသည်။

“အိမ်နားနီးချင်းတိုင်းက ကျွန်တော့်ကို သိကြတယ်။ တခါတလေမှာ တက္ကစီတွေက ဘေးအန္တရာယ် မလုံခြုံဘူးတဲ့။ ကျွန်တော့်ကိုတော့ ယုံကြည်စိတ်ချရလို့ ကျွန်တော့်ကို သူတို့ခေါ်ကြတယ်” ဟု တက္ကစီ ဝန်ဆောင်မှုလုပ်ငန်းများနှင့် ပူးပေါင်းဆောင်ရွက်နေသော ယာဉ်မောင်းများထက်ပို၍ ၎င်း၏ဖောက်သည်များထံမှ ဝင်ငွေပိုမိုရနိုင်သည်ဟု ယုံကြည်ကြောင်း ဦးသက်နိုင်က ပြောသည်။

တက္ကစီ ဝန်ဆောင်မှုလုပ်ငန်းများသည် အဓိကအားဖြင့် ပိုမိုဘေးအန္တရာယ်ကင်းရှင်းစွာ စီးနိုင်ရေးအတွက် ငွေကြေးပိုပေးနိုင်မည့် ဖောက်သည်များကို ဆွဲဆောင်နိုင်လိမ့်မည်ဟု ၎င်းကခန့်မှန်းသည်။

၎င်းရသောဝင်ငွေထဲမှ ကော်မရှင်အဖြစ် ရာခိုင်နှုန်းဖြင့် ခွဲမပေးလိုသည့်အတွက် တက္ကစီ ဝန်ဆောင်မှုကုမ္ပဏီအတွက် မောင်းနှင်ပေးရန် စိတ်မဝင်စားကြောင်း အသက် ၆၅ နှစ်ရှိ တက္ကစီယာဉ်မောင်း ဦးအောင်လွင်က ပြောသည်။

သို့သော်လည်း ကုမ္ပဏီများအတွက် မောင်းပေးနေသော မိတ်ဆွေများထံမှ ကော်မရှင်ပေးရသော အချက်အလက်များကို ပိုမိုရရှိပြီးမှသာ တက္ကစီ ဝန်ဆောင်မှုကုမ္ပဏီတစ်ခုနှင့် ဆက်သွယ်ဆောင်ရွက်ရန် စဉ်းစားနေကြောင်း အသက် ၄၉ နှစ်ရှိ ဦးအောင်ထွေးက ပြောသည်။

တက္ကစီဝန်ဆောင်မှုလုပ်ငန်းတစ်ခုထဲ ဝင်ရောက်လုပ်ကိုင်ဖို့ စဉ်းစားနေသည့် ဒရိုင်ဘာ ဦးအောင်ထွေး။ ဓာတ်ပုံ - ငြိမ်းဆုဝေကျော်စိုး

တက္ကစီဝန်ဆောင်မှုလုပ်ငန်းတစ်ခုထဲ ဝင်ရောက်လုပ်ကိုင်ဖို့ စဉ်းစားနေသည့် ဒရိုင်ဘာ ဦးအောင်ထွေး။ ဓာတ်ပုံ – ငြိမ်းဆုဝေကျော်စိုး

အဆမတန် လျှော့ချထားသော အရောင်းမြှင့်တင်ရေး ဈေးနှုန်းများပေးခြင်းဖြင့် တက္ကစီ ဝန်ဆောင်မှုလုပ်ငန်းများက ဖောက်သည်အများအပြား ဆွဲဆောင်လျက်ရှိသည်ကို ၎င်းသတိထားမိကြောင်း ဦးအောင်ထွေးက ပြောသည်။

တက္ကစီ ဝန်ဆောင်မှုကုမ္ပဏီနှင့် ဆက်သွယ်ဆောင်ရွက်ခြင်းအားဖြင့် ဝင်ငွေပိုမိုရရှိနိုင်မည်ဟူသောအချက်ကို သံသယရှိကြောင်း အသက် ၅၆ နှစ်ရှိ အခြားယာဉ်မောင်း ဦးသိန်းရွှေကလည်း ပြောသည်။ ငွေရှာရန်အလို့ငှာ လမ်းများပေါ်တွင် ကားလျှောက်မောင်းနေရသည်ကို ငြီးငွေ့လာသည့်အချိန်၌မူ သူစိတ်ပြောင်းကောင်း ပြောင်းလိမ့်မည်ဖြစ်ကြောင်း ၎င်းက ထပ်လောင်းပြောကြားသည်။

ဉာဏ်တင် ဘာသာပြန်သည်။

Share on facebook
Share on twitter
Share on email

More stories

Latest Issue

Stay on top of Myanmar current affairs with our Daily Briefing and Media Monitor newsletters

Our fortnightly magazine is available in print, digital, or a combination beginning at $80 a year

Sign up for our Frontier Fridays newsletter. It’s a free weekly round-up featuring the most important events shaping Myanmar