ပြည်တွင်းအင်န်ဂျီအိုများ၏ ပြောခွင့်သာလာမှု

မိမိတို့၏ ဒေသန္တရ ဗဟုသုတများမှာ လူသားချင်း စာနာမှုဆိုင်ရာ အကူအညီများနှင့် ဖွံ့ဖြိုးတိုးတက်ရေး၊ ပိုမိုများပြားသော ထောက်ပံ့ငွေ ရရှိရေးတို့အတွက် ဆုံးဖြတ်ချက်များတွင် ပြောရေးဆိုခွင့် ပိုရှိစေမည့် ကြောင်းကျိုးရှင်းပြချက်ပင် ဖြစ်သည်ဟု မြန်မာအင်န်ဂျီအိုများက ပြောကြားလိုက်သည်။ 

ဂျက်ကော့ဘ် ခရမ်ဇိုး ရေးသားသည်။

ပြီးခဲ့သည့် သီတင်းပတ်များက မြစ်ချောင်းများ ရေကြီးမှုသည် မြန်မာနိုင်ငံ နေရာအနှံ့အပြား၌ ကသောင်းကနင်း ဖြစ်စေခဲ့ပြီး ယင်းမှာ ယမန်နှစ်ကဲ့သို့ မဆိုးရွားခဲ့သည့်တိုင် မြန်မာ အင်န်ဂျီအိုများသည် အရေးပေါ် လူသားချင်း စာနာမှုဆိုင်ရာ အကူအညီများ ပေးအပ်ဝေမျှခြင်းအားဖြင့် အစိုးရ၏ ကယ်ဆယ်ရေးလုပ်ငန်းများကို အထောက်အကူ ဖြစ်စေသော လျင်မြန်သည့် တုံ့ပြန်မှုများ လုပ်ကိုင်ခဲ့ကြသည်။

အရပ်ဘက် လူမှုအဖွဲ့အစည်းများ ကွန်ရက်တစ်ခုဖြစ်သည့် Local Resource Centre (LRC) မှ ဒေါ်ပင်စီထွန်းသိန်းက နိုင်ငံအနှံ့အပြားတွင် ယခုကဲ့သို့ အဖွဲ့အစည်းပေါင်း ၁၀,၀၀၀ ခန့် ရှိနေသည်ဟု ခန့်မှန်းသည်။ အများစုမှာ အဖွဲ့ငယ်များ ဖြစ်ကြပြီး မှတ်ပုံတင်ထားခြင်း မရှိကြသောကြောင့် အရေအတွက် အတိအကျသိရှိရန် ခက်ခဲစေသည်။

မြန်မာအင်န်ဂျီအိုတစ်ခု၏ အထင်ကရ ဥပမာတစ်ခုဖြစ်သည့် LRC သည် အရပ်ဘက်အဖွဲ့အစည်းဝင်ပေါင်း ၆၀၀ ခန့်နှင့် အခြားကွန်ရက် ၃၀ တို့ဖြင့် ချိတ်ဆက်မှုများ ရှိနေသည်။ မြန်မာနိုင်ငံ၌ အဆိုးရွားဆုံး မုန်တိုင်းတစ်ခုဖြစ်ပြီး ၂၀၀၈ ခုနှစ် မေလတွင် ဧရာဝတီမြစ်ဝကျွန်းပေါ်ဒေသသို့ ပြင်းပြင်းထန်ထန် ဝင်ရောက်တိုက်ခိုက်ရာမှ လူပေါင်း ၁၄၀,၀၀၀ ကို သေကြေ၊ ပျက်စီးစေခဲ့သည့် နာဂစ်မုန်တိုင်းအပြီး၌ ယင်းအဖွဲ့ကို တည်ထောင်ခဲ့ခြင်းဖြစ်သည်။

အကူအညီများ အလွန်အမင်း လိုအပ်ခဲ့သော်လည်း အစောပိုင်းတွင် နိုင်ငံတကာ အဖွဲ့အစည်းများထံမှ လူသားချင်း စာနာမှုဆိုင်ရာ အကူအညီများကို လက်ခံရယူရန် စစ်အာဏာရှင်အစိုးရက ငြင်းဆန်ခဲ့သည်။ သာမန်ပြည်သူများက နာဂစ်မုန်တိုင်းအတွင်း အသက်ရှင်ကျန်ရစ်သူများအတွက် ကယ်ဆယ်ရေးလုပ်ငန်းများကို ချက်ချင်းဆောင်ရွက်ကာ ဆိုးရွားသော အခြေအနေများကို တုံ့ပြန်ခဲ့သည်။ မြန်မာ့လူမှုအသိုင်းအဝိုင်းက ပြုလုပ်ခဲ့သော တုံ့ပြန်မှု၏ ထိရောက်မှုမှာ ပါဝင်ဆောင်ရွက်သူများကို အတွေ့အကြုံ ကြွယ်ဝသွားစေခဲ့ပြီး မြန်မာအင်န်ဂျီအို အရေအတွက် တိုးမြင့်သွားခဲ့ရသည်။

LRC သည် ယင်း၏ လှုပ်ရှားဆောင်ရွက်မှုများကို ဖြည်းဖြည်းချင်း မတိုးချဲ့မီ အစောပိုင်းကာလများတွင် သဘာဝကပ်ဘေးများနှင့် ပြည်တွင်းစစ်ကဲ့သို့ လူသားများ ဖန်တီးသည့် အခြေအနေများကြောင့် ဒုက္ခရောက်နေရသူများအား အရေးပေါ် အကူအညီများ ပေးအပ်ခြင်းကို ဇောင်းပေးဆောင်ရွက်ခဲ့သည်။ ဤအဖွဲ့၌ ပါဝင်နေသော အရပ်ဘက်အဖွဲ့အစည်းများမှာ ဖွံ့ဖြိုးရေး ကိစ္စရပ်များ၊ လူ့အခွင့်အရေး ကြိုးပမ်းဆောင်ရွက်မှုများနှင့် ဥပဒေကြောင်းဆိုင်ရာ ပြုပြင်ပြောင်းလဲရေးတို့တွင် ပါဝင်လျက်ရှိသည်။

LRC ၏ လှုပ်ရှားဆောင်ရွက်မှုများမှာ နိုင်ငံအနှံ့ ပျံ့နှံ့ပြီး ပုံသဏ္ဍာန် အမျိုးမျိုး ကွဲပြားလျက်ရှိသည်။ ယင်းတို့ထဲတွင် လိင်အကြမ်းဖက် ခံကြရသော အမျိုးသမီးနှင့် ကလေးငယ်များက ကျူးလွန်သူများကို တရားစွဲဆိုခြင်းနှင့် မြေယာသိမ်းဆည်း ခံရမှုများတွင် လယ်သမားများက ဥပဒေကြောင်းအရ အခိုင်အမာ ပြောဆိုခြင်းတို့အတွက် ကူညီမှုများ ပါဝင်သည်။

ထို့ပြင် သီတင်းပတ်ကုန်တိုင်းတွင် စေတနာ့ဝန်ထမ်းအဖွဲ့များက ရေဘေးသင့်ခံ ပြည်သူများကိုလည်း ဆန်၊ သောက်သုံးရေနှင့် လိုအပ်ချက်ရှိသူများအတွက် ငွေကြေးများကိုပါ လိုက်လံကူညီလျက်ရှိသည်။

နာဂစ်မုန်တိုင်းအပြီး ဖွဲ့စည်းခဲ့သည့် အခြားအင်န်ဂျီအိုတစ်ခုမှာ အကြမ်းဖျင်းအားဖြင့် “တံတား” ဟု အနက်ပြန်နိုင်သည့် ပေါင်းကူးအဖွဲ့ပင်ဖြစ်သည်။ ဤအဖွဲ့ကိုလည်း မိမိတို့ကိုယ်ကိုယ် ကွန်ရက်တစ်ခုဟု မှတ်ယူထားပြီး အမျိုးမျိုးသော အရပ်ဘက်အဖွဲ့အစည်းများတွင် ပါဝင်ဆောင်ရွက်သူများအား ၎င်းတို့ရည်မှန်းချက်များ ပေါက်မြောက်အောင်မြင်စေရေးအတွက် စွမ်းရည်တည်ဆောက်ပေးသော လုပ်ငန်းများကို ချိတ်ဆက်လုပ်ကိုင်ရန် ကြိုးပမ်းလျက်ရှိသည်။

ယင်း၏ လှုပ်ရှားဆောင်ရွက်မှုများတွင် ထားဝယ် အထူးစီးပွားရေးဇုန် စီမံချက်နှင့်ပတ်သက်သည့် လူ့အခွင့်အရေးကိစ္စရပ်များတွင် ထိုင်းအင်န်ဂျီအို တစ်ခုနှင့် ပူးပေါင်းဆောင်ရွက်ခြင်းမှသည် ပြည်တွင်းပဋိပက္ခဒဏ်ခံ ရွှေ့ပြောင်းနေထိုင်သူများအတွက် အကူအညီများ ထောက်ပံ့ပေးခြင်းအထိ ပါဝင်သည်။ ထို့အတူ မြစ်ဆုံရေကာတာ လုပ်ငန်းများ ဆိုင်းငံ့သွားခဲ့ရသည့် ၂၀၁၁ ခုနှစ် ဆန္ဒပြလှုပ်ရှားမှုတွင်လည်း ပါဝင်ခဲ့သည်။

နောက်ဆုံးပေါ်ပေါက်ခဲ့သော ရေဘေးကိစ္စရပ်တွင် မန္တလေးလူမှုအသိုင်းအဝိုင်းစင်တာနှင့် ရန်ကုန်ပရဟိတ ကွန်ရက်ကဲ့သို့သော အဖွဲ့များနှင့် ပူးပေါင်းကာ ရေဘေးသင့်ပြည်သူများအတွက် စားနပ်ရိက္ခာနှင့် သောက်သုံးရေများ ဖြန့်ဝေခဲ့သည်။

မြန်မာအင်န်ဂျီအို အသိုင်းအဝိုင်းတွင် စွမ်းဆောင်နိုင်စွမ်းနှင့် မိမိကိုယ်ကိုယ် တန်ဖိုးထားမှုတို့မှာ သိသိသာသာ မြင့်တက်လာခဲ့ပြီး ဖြစ်သည်။ လူသားချင်း စာနာမှုဆိုင်ရာ အကူအညီများ ပေးအပ်ခြင်းတွင် ၎င်းတို့က တက်ကြွစွာ ပါဝင်ဆောင်ရွက်လာကြ၍ပင် ဖြစ်သည်။

“နာဂစ်ဖြစ်အပြီးမှာ ကျွန်တော် နားလည်ခဲ့တာက အရေးပေါ် အခြေအနေတွေနဲ့ ဘေးအန္တရာယ် ကျရောက်တဲ့ အချိန်တွေမှာ ကိုင်တွယ်ဖြေရှင်းဖို့အတွက် အကောင်းဆုံး စေခိုင်းနိုင်သူတွေက ဒေသခံတွေဖြစ်တယ် ဆိုတာပါပဲ” ဟု ဒေါ်ပင်စီထွန်းသိန်းက ဆိုသည်။ အကူအညီ ပေးအပ်ရေးနှင့် ဖွံ့ဖြိုးရေး ကိစ္စရပ်များတွင် မြန်မာလူမှုအဖွဲ့အစည်းများ ပါဝင်မှု တိုးတက်လာခြင်းသည် ၎င်းတို့အား နိုင်ငံတကာ အင်န်ဂျီအိုများ၊ အကူအညီ ပေးအပ်ရေးအဖွဲ့များနှင့် ပြန်လည်စေ့စပ်နိုင်စေခဲ့သည်။

မြန်မာအင်န်ဂျီအိုများ အဆိုအရ ယင်းတို့သည် ဒေသန္တရအခြေအနေများကို အကောင်းဆုံး နားလည်ထားပြီး အလျင်မြန်ဆုံး တုံ့ပြန်နိုင်ကြသော်လည်း ရံဖန်ရံခါ ရန်ပုံငွေ မလုံလောက်မှုများ ရှိနေပြီး ဤကိစ္စရပ်အတွက် နိုင်ငံတကာ အသိုင်းအဝိုင်းကို ဝေဖန်ခဲ့ကြပြီးဖြစ်သည်။ အရေးပေါ်အခြေအနေများရှိ ဒေသခံ အင်န်ဂျီအိုများ၏ ကြီးမားသော အကျိုးပြု ဆောင်ရွက်မှုကို ကျယ်ကျယ်ပြန့်ပြန့် အသိအမှတ်ပြုထားသော်လည်း ကုလသမဂ္ဂအဖွဲ့က ယခုနှစ်အစောပိုင်း၌ ထုတ်ပြန်ခဲ့သော ကိန်းဂဏန်းများတွင် ဖွံ့ဖြိုးဆဲနိုင်ငံများရှိ အင်န်ဂျီအိုများသည် နိုင်ငံတကာ လူသားချင်း စာနာမှု အကူအညီများ၏ ၀ ဒသမ ၂ ရာခိုင်နှုန်းကိုသာ ရရှိခဲ့ကြကြောင်း ပါရှိသည်။

အစိုးရက လယ်ယာမြေများ သိမ်းဆည်းနေမှုကို ဆန့်ကျင်ဆန္ဒပြသူ လယ်သမားအချို့အား ရန်ကုန်မြို့လယ်တစ်နေရာတွင် တွေ့ရစဉ်။ ဓာတ်ပုံ - စတိဗ် တစ်ခ်နာ

အစိုးရက လယ်ယာမြေများ သိမ်းဆည်းနေမှုကို ဆန့်ကျင်ဆန္ဒပြသူ လယ်သမားအချို့အား ရန်ကုန်မြို့လယ်တစ်နေရာတွင် တွေ့ရစဉ်။ ဓာတ်ပုံ – စတိဗ် တစ်ခ်နာ

မြန်မာ့လူမှုအဖွဲ့အစည်းများသည် အကူအညီပေးအပ်ရေးနှင့် ဖွံ့ဖြိုးရေးကိစ္စရပ်များနှင့်စပ်လျဉ်းသည့််  ဆုံးဖြတ်ချက်ချမှတ်သော လုပ်ငန်းစဉ်များတွင် ကျယ်ကျယ်ပြန့်ပြန့် မပါဝင်သေးကြောင်း ပေါင်းကူးအဖွဲ့မှ ကိုကျော်သူက စောဒကတက်ခဲ့သည်။ ထို့အတူ ပိုမိုကြီးမားသော အခန်းကဏ္ဍတစ်ရပ်တွင် ပါဝင်ခွင့်ရရန်လည်း တောင်းဆိုလိုက်သည်။

ပေါင်းကူးအဖွဲ့၏ အစီရင်ခံစာတစ်စောင်တွင် နိုင်ငံတကာ အင်န်ဂျီအိုများစွာမှာ မြန်မာအင်န်ဂျီအိုများနှင့် အတူတကွ ပူးပေါင်းဆောင်ရွက်နေသည့်တိုင် ယင်းဆက်ဆံရေးမှာ အကျိုးတူ ပူးပေါင်းဆောင်ရွက်သူများအသွင် မဆောင်ယူကြောင်း ရေးသားဖော်ပြထားသည်။ ဤဆက်ဆံရေးမှာ လက်အောက်ခံအဖွဲ့ပုံစံ ဆောင်ယူနေသည်ဟု ကိုကျော်သူက ရှင်းပြသည်။ မြန်မာအဖွဲ့များမှာ ဆုံးဖြတ်ချက်ချရာတွင် မပါဝင်ဘဲ အောက်ခြေ၌ လုပ်ငန်းဆောင်ရွက်သူများအဖြစ်သာ လှုပ်ရှားဆောင်ရွက်လျက်ရှိသည်။

စီမံကိန်းရေးဆွဲသော လုပ်ငန်းစဉ်တွင် မြန်မာအင်န်ဂျီအိုများ ပိုမိုပါဝင်ဆောင်ရွက်ခြင်းသည် ယင်းတို့  ဖော်ထုတ်လိုက်သော လူသားချင်း စာနာမှုဆိုင်ရာ အကူအညီပေးရေး ကိစ္စရပ်များအတွက် ပြည်တွင်းက ဆန်းသစ်တီထွင်မှုများ ဖန်တီးရန် အလားအလာရှိခဲ့ပြီး အရှည်သဖြင့် တည်တံ့သော ဖြေရှင်းချက်များကို ပိုမိုရရှိစေခဲ့ပြီဟုလည်း ကိုကျော်သူက ဆိုသည်။

ထိုသို့သော ဝေဖန်မှုများသည် အကူအညီ ပေးအပ်ရေး အသိုင်းအဝိုင်း၌ ဒေသန္တရပြုရေးဟု လူသိများသော ကိစ္စရပ်တစ်ခုအတွက် နိုင်ငံတကာ အင်န်ဂျီအိုများစွာအကြား ဆွေးနွေးမှုများ ပေါ်ပေါက်လာစေခဲ့သည်။

အော့ခ်စ်ဖန် Oxfam အဖွဲ့၏ မြန်မာနိုင်ငံဆိုင်ရာ ဒါရိုက်တာ မစ္စတာ ပေါလ် ဂျွိုက်စီ၏ အဆိုအရ နိုင်ငံတကာ အင်န်ဂျီအိုများစွာက ဤကိစ္စရပ်ကို ဖြေရှင်းလိုလျက်ရှိကြောင်း သိရသည်။

ဒေသန္တရပြုရေးနှင့် လူသားချင်း စာနာမှုဆိုင်ရာ အကူအညီများ ဖော်ဆောင်ပေးခြင်း၏ အကျိုးရှိမှုအပေါ် ဆွေးနွေးငြင်းခုံခြင်းကို ရည်ညွှန်း၍ ၎င်းက ရန်ပုံငွေထောက်ပံ့ခြင်းနှင့် ဆုံးဖြတ်ချက် ချမှတ်ခြင်းများတွင် မြန်မာအင်န်ဂျီအိုများ ပါဝင်ခြင်းကို နိုင်ငံတကာ အင်န်ဂျီအိုများက ကြိုဆိုအားပေးသင့်ကြောင်း ဆိုသည်။

၂၀၁၅ ခုနှစ်က ထုတ်ပြန်ခဲ့သော အစီရင်ခံစာတွင် အကောင်းဆုံး နိုင်ငံတကာ လူသားချင်း စာနာမှုဆိုင်ရာ အကူအညီစနစ်သည် ပေါ်ပေါက်လျက်ရှိသော အခြေအနေနှင့် သိသိသာသာ ကွဲပြားခြားနားလိမ့်မည်ဟု Oxfam မှ ရေးသားထားသည်။ ‘လူသားချင်းစာနာမှု အကူအညီပေးအပ်ရေး စနစ်၏ ရှေ့ဆောင်လားရာကိုရွှေ့ခြင်း’ ဟု အမည်ပေးထားသော ဤအစီရင်ခံစာတွင် အကောင်းဆုံး အနေအထားမှာ အစိုးရများနှင့် ပြည်တွင်း လူမှုအဖွဲ့အစည်းများသည် အချက်အချာနေရာတွင် ရှိနေပြီး နိုင်ငံတကာ အသိုင်းအဝိုင်းက ပြင်ပအကူအညီ ပေးအပ်သူအဖြစ် ရှိနေခြင်းပင် ဖြစ်လိမ့်မည်ဟု တင်ပြထားသည်။

Oxfam အပါအဝင် နိုင်ငံတကာ အင်န်ဂျီအို မဟာမိတ်အဖွဲ့နှင့် အလှူရှင်နိုင်ငံကြီးများသည် ဤအရေးကိစ္စရပ်ကို မေလတွင် အစ္စတန်ဘူလ်၌ ကျင်းပခဲ့သည့် ကမ္ဘာ့လူသားချင်း စာနာမှုဆိုင်ရာ ထိပ်သီးတွေ့ဆုံပွဲတွင် ဖြေရှင်းရန် ဆောင်ရွက်ခဲ့ကြသည်။ ညွှန့်ပေါင်းအဖွဲ့ဝင်များက မိမိတို့ရန်ပုံငွေ၏ ၂၀ ရာခိုင်နှုန်းကို ပြည်တွင်းအင်န်ဂျီအိုများထံ ၂၀၁၈ ခုနှစ် မေလမတိုင်မီ ပေးအပ်ရန် ရည်မှန်းချက်အတွက် ကြိုးပမ်းဆောင်ရွက်မည့် ပြောင်းလဲရေး ပဋိညာဉ်စာချုပ်တစ်ရပ်ကို လက်မှတ်ရေးထိုးခဲ့သည်။

ဤပဋိညာဉ်စာချုပ်အရ နိုင်ငံတကာ အဖွဲ့အစည်းများတွင် အကျိုးတူ ပူးပေါင်းဆောင်ရွက်ရေး၊ တန်းတူရည်တူ ဆုံးဖြတ်ချက်ချမှတ်ခြင်း အခြေခံမူပေါ် ခိုင်မာစွာ ရပ်တည်လျက် လူသားချင်း စာနာမှုဆိုင်ရာ အရေးပေါ် အခြေအနေများအတွင်း ဒေသခံ အင်န်ဂျီအို ဝန်ထမ်းများကို အပိုင်စီးခြင်းအားဖြင့် ဒေသခံအင်န်ဂျီအိုများ၏ စွမ်းဆောင်နိုင်စွမ်းကို လျော့ပါးစေသော ဆောင်ရွက်မှုများ မပြုရန် တာဝန်ရှိသေးသည်။

မေတ္တာဖောင်ဒေးရှင်းမှ ဒေါ်ဆိုင်းရော်မှာ အစ္စတန်ဘူလ် ထိပ်သီးအစည်းအဝေးရှိ မြန်မာကိုယ်စားလှယ်အဖွဲ့၌ အဖွဲ့ဝင်တစ်ဦးဖြစ်ပြီး ဒေသန္တရပြုရေးအတွက် လှုပ်ရှားဆောင်ရွက်နေသူများတွင်လည်း တစ်ဦးအပါအဝင်ဖြစ်သည်။ နိုင်ငံတကာ အသိုင်းအဝိုင်းက ဒေသခံအင်န်ဂျီအိုများကို ယုံကြည်ရန်နှင့် တာဝန်ခံနိုင်မှုအပေါ် သံသယရှိမှုများကြောင့် ရန်ပုံငွေ တိုက်ရိုက်ထောက်ပံ့ခြင်းကို အဟန့်အတား မပြုရန် ဒေါ်ဆိုင်းရော်က  တောင်းဆိုခဲ့သည်။ ၎င်းက အစ္စတန်ဘူလ် ထိပ်သီးအစည်းအဝေးပွဲတွင် ပေးအပ်ခဲ့သော ကတိကဝတ်ကို ပိုမိုတိကျသော ရည်မှန်းချက်များ သတ်မှတ်ထားသည့် လုပ်ငန်းအစီအစဉ်ဖြင့် ဆက်လက်ဖော်ဆောင်သင့်ကြောင်း ဆိုသည်။

လူသားချင်း စာနာမှု အကူအညီဆိုင်ရာ ညှိနှိုင်းမှုအတွက် ကုလသမဂ္ဂရုံးကလည်း ဖွံ့ဖြိုးဆဲနိုင်ငံများမှ အင်န်ဂျီအိုများ၏ ဒေသန္တရပြုရေးနှင့် ဒေသန္တရခေါင်းဆောင်မှုတို့အတွက် တောင်းဆိုချက်များကို ထောက်ခံလျက်ရှိသည်။ OCHA ရန်ကုန်ရုံးခန်းရှိ မစ္စတာ ပိုင်ရီ ပါရွန်က မြန်မာအင်န်ဂျီအိုများ၏ တောင်းဆိုချက်ကို အားလုံးကြားသိစေရန်နှင့် ဒေသခံအဖွဲ့များ အခွင့်အလမ်း ရရှိစေမည့် ရန်ပုံငွေ ပေးအပ်မှုစနစ် ဖော်ဆောင်ရန်တို့ကို မဖြစ်မနေ ဆောင်ရွက်ရန် မိမိတို့အဖွဲ့သည် ညှိနှိုင်းဆောင်ရွက်သူ အခန်းကဏ္ဍမှ ဆောင်ရွက်နိုင်ရေး ကြိုးပမ်းမည်ဟု ဆိုသည်။

လူသားချင်း စာနာမှုဆိုင်ရာ အကူအညီများကို ဒေသတွင်း အသုံးပြုနိုင်စေခြင်းနှင့် စီမံကိန်းရေးဆွဲရာတွင် ဒေသခံ အင်န်ဂျီအိုများ ပါဝင်နိုင်သော အတိုင်းအတာများဆိုင်ရာ ကိစ္စရပ်များမှာ လူသားချင်း စာနာမှုဆိုင်ရာ အသိုင်းအဝိုင်း၏ လုပ်ငန်းစဉ်တွင် ဆက်လက်ကျန်ရှိနေဦးမည်မှာ သေချာလှသည်။

ထိရောက်မှုပိုင်း အလုံးစုံ ရည်မှန်းချက်ကို အခြေတည်သော ချဉ်းကပ်မှုနှင့် ဒေသန္တရ စွမ်းရည်မြှင့်တင်ရေးကို  အာရုံပြု ချဉ်းကပ်မှုနှစ်ခုတို့သည် ဤအရေးကိစ္စကို လားရာတူသို့ ဆက်လက်တွန်းတင်မည်လော၊ သို့မဟုတ် ဤရည်မှန်းချက်များ ကွဲပြားကာ ပဋိပက္ခအသွင်ဆောင်ပြီး သဟဇာတမဖြစ်သော အခြေအနေသို့ ဦးတည်သွားမည်လောဆိုသည်ကိုမှု ဆက်လက်စောင့်ကြည့်ရပေဦးမည်။

အောင်မင်း ဘာသာပြန်သည်။

Share on facebook
Share on twitter
Share on email

More stories

Latest Issue

Stay on top of Myanmar current affairs with our Daily Briefing and Media Monitor newsletters

Our fortnightly magazine is available in print, digital, or a combination beginning at $80 a year

Sign up for our Frontier Fridays newsletter. It’s a free weekly round-up featuring the most important events shaping Myanmar