ပိတ်ဆို့အရေးယူမှု ဇာတ်လမ်းရှည်

အမေရိကန်ဟာ မြန်မာနိုင်ငံအပေါ် ပိတ်ဆို့မှု အတော်တော်များများကို ဆက်လက်ထားရှိပေမယ့် ပိတ်ဆို့မှုအချို့ကိုတော့ ရုပ်သိမ်းပေးလိုက်ပါတယ်။ ဒါပေမဲ့ ဒီလိုလုပ်တာက စီးပွားရေးတိုးတက်မှုကို နှေးကွေးစေတယ်လို့ လေ့လာဆန်းစစ်သူတွေက ဆိုပါတယ်။

ရှောင် ဂလေစင် ရေးသားသည်။

လွန်ခဲ့တဲ့လကပဲ အမေရိကန်သမ္မတ ဘားရက်အိုဘားမားက အမေရိကန်ဘဏ္ဍာရေးဋ္ဌာနရဲ့ ပိတ်ဆို့မှုတွေကို သူရဲ့ အုပ်ချုပ်ရေးအာဏာအရ ထပ်မံ သက်တမ်းတိုးလိုက်ပါတယ်။ ဒီတခါတော့ နှစ်ဖက်ကုန်သွယ်ရေးကို မြှင့်တင်ဖို့ရယ်၊ အလားအလာရှိတဲ့ အမေရိကန်ရင်းနှီးမြှုပ်နှံသူတွေအတွက် စွန့်စားရတဲ့ အန္တရာယ်ဝန်ထုပ်ဝန်ပိုးကို လျှော့ချဖို့ရယ်ကို ရည်ရွယ်တဲ့ ထင်ရှားတဲ့ ပြောင်းလဲမှုတွေ အများကြီးနဲ့ပါ။

အမေရိကန် ဘဏ္ဍာရေးဝန်ကြီးဋ္ဌာနရဲ့ နိုင်ငံခြားပိုင်ဆိုင်မှုထိန်းချုပ်ရေးရုံး(OFAC)က စီမံခန့်ခွဲတဲ့လက်ရှိ ပိတ်ဆို့မှုစနစ်အပေါ် ပြောင်းလဲမှုတချို့လုပ်မယ်ဆိုတာကို မြန်မာနိုင်ငံဆိုင်ရာ အမေရိကန် သံအမတ်ကြီး စကော့မာစီယယ်ရဲ့ မေ ၁၀ ရက်နေ့က ပေါ်လစီဆိုင်ရာ ပထမဆုံး မိန့်ခွန်းထဲမှာ နိမိတ်ပြေး ပြောကြားခဲ့ပါတယ်။ မြန်မာအပေါ် အရေးယူပိတ်ဆို့မှုတွေက အခါအားလျော်စွာ ကျယ်ပြန့်တဲ့ စီးပွားရေးအပေါ် ကျယ်ကျယ်ပြန့်ပြန့် ထိခိုက်တတ်တယ်ဆိုတာဝန်ခံရင်း မာစီယယ်က အရိပ်အမြွက်ပြောကြားခဲ့တာက အမေရိကန်နိုင်ငံသားများနဲ့ စီးပွားရေးလုပ်ဖို့ တားမြစ်ခံရတဲ့ နိုင်ငံသားများ(Specially Designated Nationals)စာရင်း ပြောင်းလဲမှုတွေကို နောက်ထပ်နိုင်ငံရေး ပြုပြင်ပြောင်းလဲမှုနဲ့ စီးပွားရေးဖွံ့ဖြိုးဖို့ကို အားပေးဖို့ ရည်ရွယ်ချက်နဲ့ ပြုလုပ်မှာဖြစ်တဲ့အကြောင်း ဖြစ်ပါတယ်။

မေ ၁၉ ရက်နေ့က သတင်းထောက်များနှင့် တွေ့ဆုံနေသည့် အမေရိကန်သံအမတ်ကြီး စကော့မာစီယယ်။ ဓာတ်ပုံ- အန်းဝမ်

မေ ၁၉ ရက်နေ့က သတင်းထောက်များနှင့် တွေ့ဆုံနေသည့် အမေရိကန်သံအမတ်ကြီး စကော့မာစီယယ်။ ဓာတ်ပုံ- အန်းဝမ်

မေ ၁၇ ရက်နေ့က OFAC ရဲ့ လုပ်ပိုင်ခွင့်နဲ့ သက်တမ်းတိုးရာမှာ အလားအလာရှိတဲ့ အမေရိကန် ရင်းနှီးမြုပ်နှံသူတွေအပေါ်က စည်းမျဉ်းစည်းကမ်း ဝန်ထုပ်ဝန်ပိုးတွေကို လျော့ကျစေပါတယ်။ အမေရိကန်နိုင်ငံသားတွေဟာ မြန်မာနိုင်ငံမှာ နေထိုင်ရင်း အကြောင်းထူးတစ်ခုခုကြောင့် မြင့်တက်သွားနိုင်တဲ့ ကုန်ကျစရိတ်တွေကနေ တရားဝင် ကင်းလွတ်ခွင့်ရထားပါတယ်။ သာဓကအနေနဲ့ကတော့ ငှားရမ်းခ၊ ကုန်ပစ္စည်းနဲ့ ဝန်ဆောင်မှုတွေ ဝယ်ယူမှုလိုဟာမျိုးတွေပါ။ တာဝန်သိတဲ့ ရင်းနှီးမြုပ်နှံမှုနဲ့ ပတ်သက်တဲ့ အမေရိကန်နိုင်ငံခြားရေးဋ္ဌာနရဲ့ လမ်းညွှန်မှုတွေကို အမေရိကန်ရင်းနှီးမြုပ်နှံသူတွေ လိုက်နာဖို့ အနိမ့်ဆုံးစံသတ်မှတ်ချက်ဟာ အမေရိကန်ဒေါ်လာ ငါးသိန်းကနေ ငါးသန်းအထိ မြင့်တက်သွားပါတယ်။ အလားအလာရှိတဲ့ အမေရိကန် ရင်းနှီးမြုပ်နှံသူတွေအနေနဲ့ ဘဏ္ဍာရေးဝန်ကြီးဋ္ဌာနရဲ့ စည်းမျဉ်းတွေကို မရည်ရွယ်ပဲ ချိုးဖောက်နိုင်တဲ့ အန္တရာယ်ကို လျှော့ချဖို့အတွက် ဘဏ်လုပ်ငန်း၊ ဘဏ္ဍာရေးနဲ့ ကုန်သွယ်ရေးလုပ်ငန်းတွေမှာ လုပ်ကိုင်နေတဲ့ အမည်ပျက်စာရင်းဝင် ကုမ္ပဏီတွေအပေါ် ကင်းလွတ်ခွင့်တွေ ကျယ်ပြန့်အောင် ဒါမှမဟုတ် အမြဲတမ်းကင်းလွတ်ခွင့်တွေ ပေးလိုက်ပါတယ်။

ပြောင်းလဲမှုတွေဟာ မြန်မာနိုင်ငံရဲ့  ဒီမိုကရေအသွင်ကူးပြောင်းရေးလမ်းကြောင်းရဲ့ ရောင်ပြန်ဟပ်မှုဖြစ်တယ်လို့ အမေရိကန်နိုင်ငံခြားရေးဝန်ကြီး ဂျွန်ကယ်ရီက မေ ၂၂ ရက်က သူရဲ့ နေပြည်တော်ခရီးစဉ်အတွင်းမှာ သတင်းထောက်တွေကို ပြောကြားခဲ့ပါတယ်။ ဒါအပြင် မြန်မာနိုင်ငံမှာ ရင်းနှီးမြုပ်နှံမှုအပေါ် OFAC ရဲ့လုပ်ပိုင်ခွင့်မကုန်ဆုံးမီ နောက်ထပ်နိုင်ငံရေး ပြုပြင်ပြောင်းလဲမှု လုပ်ဖို့ လိုအပ်တယ်လို့လည်း ကယ်ရီက ပြောပါတယ်။ “ကျွန်တော်တို့ လက်ရှိပိတ်ဆို့ပိတ်ဆို့မှုစနစ်မှာ ပြောင်းလဲမှုတွေ အများကြီးလုပ်ထားပါတယ်”လို့ သူကဆိုပါတယ်။ “ကျွန်တော်ပြောခဲ့သလိုပဲ ပိတ်ဆို့မှုတချို့တော့ ထားရှိပါသေးတယ်။ ဒါကတော့ ဒီမိုကရေစီ အသွင်ကူးပြောင်းရေးကာလကို ပြီးပြတ်သွားအောင် နောက်ထပ်လုပ်ဆောင်ရဦးမယ်ဆိုတာ လူပုဂ္ဂိုလ်အချို့နဲ့ ကဏ္ဍတချို့ကို ဆက်လက်တွန်းအားပေးဖို့ပါ”လို့ သူကပြောပါတယ်။

ရန်ကုန်မြို့ရှိ အေရှားဝေါလ်ဆိပ်ကမ်း။ အေးရှားဝေါလ်ရဲ့ လုပ်ငန်းတွေကို အမေရိကန်က အရေးယူပိတ်ဆို့ထားပေမယ့် ကုန်သွယ်မှုလုပ်ငန်းတွေ ချောမွေ့စေဖို့ ဆိပ်ကမ်းကိုတော့ ကင်းလွတ်ခွင့်ပေးထားပါတယ်။ ဓာတ်ပုံ- အေအက်ဖ်ပီ/ရဲအောင်သူ

ရန်ကုန်မြို့ရှိ အေရှားဝေါလ်ဆိပ်ကမ်း။ အေးရှားဝေါလ်ရဲ့ လုပ်ငန်းတွေကို အမေရိကန်က အရေးယူပိတ်ဆို့ထားပေမယ့် ကုန်သွယ်မှုလုပ်ငန်းတွေ ချောမွေ့စေဖို့ ဆိပ်ကမ်းကိုတော့ ကင်းလွတ်ခွင့်ပေးထားပါတယ်။ ဓာတ်ပုံ- အေအက်ဖ်ပီ/ရဲအောင်သူ

ဖွံ့ဖြိုးတိုးတက်မှုဆီသို့

နိုင်ငံပိုင်ဘဏ်သုံးခုနဲ့ နိုင်ငံပိုင်လုပ်ငန်းကြီးခုနှစ်ခုကို အမေရိကန်နိုင်ငံသားတွေနဲ့ စီးပွားရေးမလုပ်ရဆိုတဲ့ စာရင်းကနေ ဖယ်ရှားပေးလိုက်ပါတယ်။ အဲဒီအထဲမှာ မြန်မာ့စီးပွားရေးဘဏ်လည်း ပါဝင်ပါတယ်။ ရန်ကုန်စတော့အိပ်ချိန်းဟာ မြန်မာ့စီးပွားရေးဘဏ်လက်အောက်က လည်ပတ်နေတာမို့ ဘဏ်ကို ပိတ်ဆို့တဲ့စာရင်းထဲ ဆက်ထည့်နေမယ်ဆိုရင် သက်တမ်းနုတဲ့ မြန်မာစတော့အိပ်ချိန်းကို ထိခိုက်နိုင်တာမို့ ပြည်တွင်းရင်းနှီးမြုပ်နှံသူတွေက စိုးရိမ်ကြပါတယ်။ SDN စာရင်းထဲက လူတွေနဲ့ ကုန်သွယ်ခွင့်ကို အမေရိကန်လုပ်ငန်းတွေကို ခွင့်ပြုထားတဲ့ ခြောက်လသက်တမ်းကိုလည်း ထပ်မံတိုးချဲ့လိုက်ပါပြီ။

၂၀၁၅ ခုနှစ် နှစ်လယ်မှာ အမေရိကန်ဘဏ္ဍာရေးဝန်ကြီးဋ္ဌာနက ရန်ကုန်က အေးရှားဝေါလ်ဆိပ်ကမ်း(AWPT)ကနေ ကုန်သွယ်မှုပြုလုပ်ခြင်းဟာ ပိတ်ဆို့မှုကို ချိုးဖောက်တာပဲဆိုတဲ့ အလွတ်သဘော လမ်းညွှန်ချက်ကို ထုတ်ပြန်ခဲ့ပါတယ်။ ဒီလိုလုပ်ခြင်းက အမှန်တကယ် သက်ရောက်ခဲ့ရင် နှစ်ဖက်ကုန်သွယ်ရေးကို ထိခိုက်မှုဖြစ်စေမှာဖြစ်ကြောင်း OFAC က ဝန်ထမ်းဟောင်း ပီတာကူစစ်ကဆိုပါတယ်။ ရန်ကုန်ဆိပ်ကမ်းလုပ်ငန်းတွေရဲ့ ၆၀ ရာခိုင်နှုန်းကို AWPT ကနေလုပ်တာပါ။

အဲဒီအချိန်မှာပဲ အေရှားဝေါလ်ရဲ့ လက်အောက်ခံကုမ္ပဏီခြောက်ခုကိုလည်း မေ ၁၇ ရက်မှာ SDN စာရင်းထဲ ပေါင်းထည့်ခဲ့ပါတယ်။ ၂၀၀၇ ခုနှစ်ကတည်းက ပိတ်ဆို့မှုစာရင်းထဲအသွင်းခံရတဲ့ မစ္စတာစတီဗင်လော (ဦးထွန်းမြင့်နိုင်) ဦးဆောင်တဲ့ ကုမ္ပဏီလုပ်ငန်းစုဟာ များပြားတဲ့ လူ့အခွင့်အရေး ချိုးဖောက်မှုတွေမှာ ပတ်သက်နေတယ်လို့ အမေရိကန်အာဏာပိုင်တွေက ဆိုပါတယ်။ ဦးထွန်းမြင့်နိုင်ဟာ ရွှေတြိဂံဒေသ ဘိန်းကုန်ကူးမှုတွေမှာ ပတ်သက်တယ်လို့ အမြဲလိုလို စွပ်စွဲခံနေရသူလည်း ဖြစ်ပါတယ်။

၂၀၀၈ ခုနှစ် မတ်လက အမေရိကန်သံရုံး ကြေးနန်းသတင်းတစ်ခုအရတော့ သူဟာ အမေရိကန်ရဲ့ ပိတ်ဆို့မှုတွေကို ရှောင်လွဲနိုင်ရေး ဆွေးနွေးဖို့အတွက် ထူးအုပ်စုအကြီးအကဲ ဦးတေဇနဲ့ တွေ့ဆုံခဲ့ပါတယ်။ အဲဒီနောက်ပိုင်းနှစ်တွေမှာ သူ ဒါမှမဟုတ် သူ့ဇနီး စေစီလာအဲင် တည်ထောင်ထားတဲ့ အဖွဲ့အစည်းတွေကို စင်ကာပူမှာ ပေါင်းစည်းခဲ့ပါတယ်။ အချိန်နှောင်းမှ အဲဒီအဖွဲ့တွေကို ပိတ်ဆို့စာရင်းထဲ ထည့်ခဲ့ပါတယ်။  OFAC ကအမည်ပျက်စာရင်းသွင်းခံရတဲ့ မြန်မာကုမ္ပဏီတွေရဲ့ ထက်သက်နီးပါးဟာ အေရှားဝေါလ်နဲ့ တနည်းနည်းနဲ့တော့ ဆက်စပ်နေတာပါပဲ။

အမည်ပျက်စာရင်းသွင်းခံရသူတွေထဲမှာ ရန်ကုန်လေဆိပ် တိုးချဲ့မှု ပထမအဆင့်ဆောက်လုပ်ဖို့ ကန်ထရိုက်ရထားတဲ့ Pioneer Aerodrome Services ကုမ္ပဏီလည်း ပါဝင်ပါတယ်။ လေဆိပ်မှာ နေရာငှားရမ်း သုံးစွဲသူအသစ်တွေထဲမှာ အမေရိကန်ရဲ့ အမြန်ရအစားအစာလုပ်ငန်းကြီး KFC ရဲ့ လက်ခွဲလုပ်ငန်းတစ်ခုလည်း ပါဝင်ပါတယ်။ ပိတ်ဆို့ခံရတဲ့ အဖွဲ့အစည်းတွေဟာ ကန့်သတ်ခံရမှုတွေနဲ့ ပတ်သက်လို့ ကာလရှည်ကြာကတည်းက နည်းလမ်းတွေ တွေ့ထားတယ်လို့ လွတ်လပ်တဲ့ ဆန်းစစ်ဝေဖန်သူ ရစ်ချတ်ဟော့ဆေးက Frontier ကို ပြောပါတယ်။ တိုးတက်မှုနဲ့ ရင်းနှီးမြုပ်နှံမှုကို ဖွင့်လှစ်နိုင်ဖို့က အမေရိကန်အနေနဲ့ မြန်မာနဲ့ ပုံမှန်ဆက်ဆံရေးရှိနေဖို့လိုပြီး ပိတ်ဆို့မှုဆိုတာထက် အခြားနည်းလမ်းတွေကို အသုံးပြုပြီး ဆက်လက်ဖြစ်ပေါ်နေတဲ့ တကယ့် စိုးရိမ်စရာတွေကိုလည်း ကိုင်တွယ်ဖို့ လိုတယ်ဆိုပါတယ်။

SDN စာရင်းအပေါ် နောက်ဆုံးပြောင်းလဲမှုတွေက နှစ်ဖက်ကုန်သွယ်ရေးကို လှုံ့ဆော်နိုင်မလားဆိုတာနဲ့ ပတ်သက်လို့ အမြင်တွေက ကွဲလွဲမှုရှိပါတယ်။ မြန်မာနိုင်ငံမှာ ပွင့်လင်းမြင်သာမှုမရှိခြင်းနဲ့ ပြောင်းလဲဖို့ခက်ခဲတဲ့ လုပ်ငန်းဆက်ဆံမှုသဘာဝနဲ့အတူ ပိတ်ဆို့ခံသူဋ္ဌေးကြီးတွေနဲ့ စစ်တပ်ပိုင်လုပ်ငန်းတွေရဲ့ လွန်ကဲတဲ့ အခန်းကဏ္ဍဟာ အလားအလာရှိတဲ့ ရင်းနှီးမြုပ်နှံသူတွေအတွက် ကြီးကြီးမားမား စွန့်စားရမယ့် အခြေအနေမှာ ဆက်ရှိနေမှာပါ။ ဒီထိန်းညှိမှုတွေက မြန်မာနိုင်ငံမှာ စီးပွားရေးလာလုပ်မယ့် အမေရိကန်ကုမ္ပဏီတွေအတွက် စည်းမျဉ်းစည်းကမ်း ဝန်ထုတ်ဝန်ပိုးကို အစွန်းထွက်လောက်ပဲ လျော့ကျစေမှာပါလို့ မေ ၁၈ ရက်က အစီရင်ခံစာတစ်ခုမှာ ဖော်ပြထားပါတယ်။ ဒါပေမဲ့ စစ်တပ်နဲ့ ဆက်နွယ်နေတဲ့ သူဋ္ဌေးကြီးတွေကို ရှောင်ဖို့လို အဓိကအခက်အခဲတွေက အခိုင်အမာရှိနေဦးမှာ ဖြစ်ပါတယ်။

မတ်လအတွင်းက ရန်ကုန်အပြည်ပြည်ဆိုင်ရာလေဆိပ်တိုးချဲ့အဆောက်အအုံ ဖွင့်လှစ်ပွဲကို ထိုစဉ်က သမ္မတဦးသိန်းစိန် တက်ရောက်ခဲ့စဉ်။ ဓာတ်ပုံ-အေအက်ဖ်ပီ

မတ်လအတွင်းက ရန်ကုန်အပြည်ပြည်ဆိုင်ရာလေဆိပ်တိုးချဲ့အဆောက်အအုံ ဖွင့်လှစ်ပွဲကို ထိုစဉ်က သမ္မတဦးသိန်းစိန် တက်ရောက်ခဲ့စဉ်။ ဓာတ်ပုံ-အေအက်ဖ်ပီ

ဦးစားပေးမှု အသစ်များ

မြန်မာနိုင်ငံအပေါ် အမေရိကန်ရဲ့ ပိတ်ဆို့အရေးယူမှုအများစုကို ၂၀၁၂ နဲ့ ၂၀၁၃ ခုနှစ်တွေမှာ စတင်ဖြေလျော့ခဲ့တာ ဖြစ်ပါတယ်။ သမ္မတဦးသိန်းစိန်ဦးဆောင်တဲ့ အရပ်သားတစ်ပိုင်း အစိုးရ အာဏာရရှိလာပြီးနောက် နိုင်ငံရေးနဲ့ စီးပွားရေး ပြုပြင်ပြောင်းလဲမှုတွေ စတင်လုပ်ဆောင်လာချိန်မှာ ဖြစ်ပါတယ်။ အဖိုးတန်ကျောက်မျက်ရတနာတွေ တင်သွင်းခွင့်လို ကွန်ဂရက်ရဲ့ အရေးယူပိတ်ဆို့မှုတွေက လက်နက်ကုန်သွယ်မှုနဲ့ စစ်ရေးပူးပေါင်းဆောင်ရွက်မှု တားမြစ်ချက်တွေလို လက်ရှိ တည်ရှိနေဆဲဖြစ်ပါတယ်။

လက်ရှိ SDN စာရင်းထဲမှာ အဖွဲ့အစည်းနဲ့ ပုဂ္ဂိုလ် ၁၀၀ ကျော်လောက် ကျန်ရှိနေပါသေးတယ်။ ဒီအထဲမှာ အရင် စစ်အစိုးရ ထိပ်တန်းခေါင်းဆောင်တွေ၊ ဒါဇင်ဝက်လောက်ရှိတဲ့ စီးပွားရေးလုပ်ငန်းရှင်တွေနဲ့ သူတို့ရဲ့ မိသားစုဝင်တွေအပြင် ၂၀၁၃ ခုနှစ်က မြောက်ကိုရီးယားနဲ့ လက်နက်အရောင်းအဝယ်လုပ်ငန်းမှာ ပါဝင်ခဲ့တဲ့ ပုဂ္ဂိုလ်နှစ်ဦးလည်း ပါဝင်ပါတယ်။

အမေရိကန်ရဲ့ ပိတ်ဆို့မှုစာရင်းထဲမှာ ပါဝင်နေကြသူတွေဟာ စာရင်းထဲက ပယ်ဖျက်ခံရဖို့အတွက် ဘဏ္ဍာရေးဌာနကို အယူခံတင်ကြပါတယ်။ စီးပွားရေးလုပ်ငန်းရှင် အတော်များများက စာရင်းထဲက ပယ်ဖျက်ခံရဖို့အတွက် စိတ်အားထက်သန်နေကြတယ်လို့ အမေရိကန် အရာရှိတွေက ၂၀၁၄ ခုနှစ်က ပြောခဲ့ပါတယ်။ ၂၀၁၅ ခုနှစ် မေလမှာတော့ ပြည်ထောင်စုမြန်မာနိုင်ငံ ကုန်သည်များနှင့် စက်မှုလုပ်ငန်းရှင်များအသင်းချုပ် ဥက္ကဋ္ဌဦးဝင်းအောင်ဟာ ဒီလိုနည်းလမ်းနဲ့ ပိတ်ဆို့မှုစာရင်းက လွတ်မြောက်လာခဲ့တဲ့ ပထမဆုံးသော သူဋ္ဌေးကြီးဖြစ်လာပါတယ်။

တစ်ချို့စီးပွားရေး လုပ်ငန်းရှင်တွေကတော့ သူတို့ရဲ့ ဒီမိုကရေစီပုံရိပ်ကို အရောင်တင်ဖို့အတွက် ကြိုးစားကြပြီး ပြုပြင်ပြောင်းလဲရေးလုပ်ငန်းတွေကို ထောက်ခံမှုပေးကြပါတယ်။

ပြီးခဲ့တဲ့နှစ် ဧပြီလက ဦးသိန်းစိန်အစိုးရအဖွဲ့ဟာ Podesta အုပ်စုကို ငှားရမ်းခဲ့ပါတယ်။ ဒီလော်ဘီအဖွဲ့ဟာ အမေရိကန် ဒီမိုကရက်တစ်ပါတီနဲ့ နိုင်ငံခြားရေးဝန်ကြီးဟောင်း ဟီလာရီကလင်တန်တို့နဲ့ အတွင်းကျကျ ဆက်သွယ်မှုရှိတဲ့အဖွဲ့ ဖြစ်ပါတယ်။ အမေရိကန် ဝါရှင်တန်မှာရှိတဲ့ မြန်မာသံရုံးကနေတစ်ဆင့် ဆက်သွယ်ခဲ့တာဖြစ်ပြီး ၁၂ လအတွက် အမေရိကန်ဒေါ်လာ ၈၄၀,၀၀၀ နဲ့ ငှားရမ်းခဲ့တယ်လို့ ဆိုပါတယ်။ ပြီးခဲ့တဲ့ နိုဝင်ဘာရွေးကောက်ပွဲမတိုင်မီ အမေရိကန်ရဲ့ အရေးယူပိတ်ဆို့မှုတွေ လုံးဝဖယ်ရှားသွားဖို့အတွက် အမေရိကန်အစိုးရကို ဆက်သွယ်တိုက်တွန်းဆွဲဆောင်ဖို့ကို Podesta က လုပ်ဆောင်ပေးရမယ်လို့ ဆိုပါတယ်။

ရွေးကောက်ပွဲမှာ အမျိုးသားဒီမိုကရေစီအဖွဲ့က အနိုင်မရရှိသေးမီနဲ့ အနိုင်ရရှိပြီးနောက်မှာလည်း ပိတ်ဆို့မှုစာရင်းထဲမှာ ပါနေတဲ့ သူဋ္ဌေးကြီးတွေဟာ ဒေါ်အောင်ဆန်းစုကြည်ကို ထင်ထင်ရှားရှား ထောက်ခံမှု ပေးလာကြပါတယ်။ ဇေကမ္ဘာအုပ်စုရဲ့ အကြီးအကဲ ဦးခင်ရွှေက သူ့မဲဆန္ဒနယ်က ပြည်သူတွေကို ဒေါ်အောင်ဆန်းစုကြည်ကို မဲပေးဖို့ တိုက်တွန်းခဲ့ပါတယ်။ သူဟာ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီကနေ ရွေးကောက်ပွဲဝင်ပြိုင်ခဲ့သေးပေမယ့် ရှုံးနိမ့်ခဲ့ပါတယ်။ ယခုနှစ်အစောပိုင်းကတော့ ဦးတေဇဟာ အမျိုးသားဒီမိုကရေစီအဖွဲ့ချုပ် လွှတ်တော်ကိုယ်စားလှယ်တွေ ဖေဖော်ဝါရီ ၁ ရက်နေ့မှာ လွှတ်တော်ကိုယ်စားလှယ်အဖြစ် စတင် တာဝန်မထမ်းဆောင်မီ ပေးတဲ့သင်တန်းတစ်ခုကို ထောက်ပံ့ပေးခဲ့ပါတယ်။ 

မက်စ်မြန်မာကုမ္ဗဏီများအုပ်စုရဲ့ ဥက္ကဋ္ဌ ဦးဇော်ဇော်ဟာ ပိတ်ဆို့မှုစာရင်းကနေ ထပ်မံရုန်းထွက်နိုင်မယ့် သူလို့ အတော်များများက ထင်ထားကြပါတယ်။ သူဟာ အင်န်အယ်လ်ဒီကို ကာလရှည်ကြာစွာ ထောက်ခံခဲ့ပေမယ့် သူနဲ့ သူ့လုပ်ငန်းတွေဟာ ပိတ်ဆို့မှုစာရင်းထဲမှာ ရှိနေတုန်းပါပဲ။

“အမေရိကန်ရဲ့ ကျန်ရှိနေသေးတဲ့ ပိတ်ဆို့အရေးယူမှုတွေကို တိုင်းပြည်အပေါ်မှာတင်မက ကောင်းမွန်တဲ့ အုပ်ချုပ်မှုကျင့်စဉ်ရှိတဲ့၊ ပွင့်လင်းမြင်သာပြီး တာဝန်ယူမှုရှိတဲ့ အဖွဲ့အစည်းတွေကို လုပ်ကိုင်နေတဲ့ လူပုဂ္ဂိုလ်တွေအပေါ်ကနေပါ အမေရိကန်က ဖယ်ရှားပေးလိမ့်မယ်လို့ ကျွန်တော်တို့ ရိုးရိုးသားသားယုံကြည်ထားပါတယ်” လို့ မက်စ်မြန်မာအုပ်စုရဲ့ Chief Operating Officer ဖြစ်သူ ဒေါက်တာသောင်းဟန်က Frontier ကို ပြောပါတယ်။

အစိုးရသစ်ကတော့ အမေရိကန်ရဲ့ ကျန်ရှိနေတဲ့ ပိတ်ဆို့အရေးယူမှုတွေနဲ့ ပတ်သက်ပြီး သက်တောင့်သက်သာ ရှိပါတယ်ဆိုတာ ပြသခဲ့ပါတယ်။

မေ ၁၇ ရက်နေ့က အရေးယူပိတ်ဆို့မှုအသစ် ကြေညာပြီး သိပ်မကြာခင်မှာပဲ စင်ကာပူ နိုင်ငံခြားရေးဝန်ကြီးနဲ့ သတင်းစာရှင်းလင်းပွဲမှာ ဒေါ်အောင်ဆန်းစုကြည်က ကျန်ရှိတဲ့ ပိတ်ဆို့အရေးယူမှုနဲ့ ပတ်သက်ပြီး စိစစ်မှုတွေကို မြန်မာအစိုးရက ကြိုဆိုတယ်လို့ ပြောကြားလိုက်ပါတယ်။ မေ ၂၂ ရက်နေ့က နေပြည်တော်ကို လာသွားခဲ့တဲ့ အမေရိကန် နိုင်ငံခြားရေးဝန်ကြီး ဂျွန်ကယ်ရီနဲ့ တွေ့ဆုံစဉ် ပြောကြားခဲ့တဲ့အတိုင်း ထပ်မံပြောဆိုလိုက်ခြင်းလည်း ဖြစ်ပါတယ်။

အနာဂတ်မှာ အပြောင်းအလဲတွေ ပြုလုပ်ဖို့အတွက် ဒေါ်အောင်ဆန်းစုကြည်ရဲ့ ပိတ်ဆို့မှုအပေါ် သဘောထားက အရေးပါတယ်လို့ ကယ်ရီက ပြောကြားခဲ့ပါတယ်။

“အတိုင်ပင်ခံပုဂ္ဂိုလ်နဲ့ နိုင်ငံခြားရေးဝန်ကြီးက ဒါဟာသင့်လျော်တယ်လို့ ကျွန်တော်တို့ကို ပြောကြားခဲ့တဲ့အတွက် နောက်ထပ်ဆောင်ရွက်ရမှာတွေကို ကျွန်တော်တို့ စဉ်းစားသွားပါမယ်” လို့ ကယ်ရီက ပြောကြားခဲ့ပါတယ်။ 

ခေါင်းစီးဓာတ်ပုံ- အမေရိကန်နိုင်ငံခြားရေးဝန်ကြီး ဒေါ်အောင်ဆန်းစုကြည်နှင့် နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်တို့ နေပြည်တော်တွင် မေ ၂၂ ရက်နေ့က သတင်းစာရှင်းလင်းပွဲ ပြုလုပ်နေကြစဉ်။ ဓာတ်ပုံ- အေအက်ဖ်ပီ

Share on facebook
Share on twitter
Share on email

More stories

Latest Issue

Stay on top of Myanmar current affairs with our Daily Briefing and Media Monitor newsletters

Our fortnightly magazine is available in print, digital, or a combination beginning at $80 a year

Sign up for our Frontier Fridays newsletter. It’s a free weekly round-up featuring the most important events shaping Myanmar